IZENZO ZABAPOSTOLI 24 - IsiNdebele 2012 Translation

UPowula phambi kombusi eKhesariya

¹ Ngemva kwamalanga amahlanu umphristi omkhulu u-Ananiyasi wehla weza nabaphathi negqwetha uTertulusi, bafese bendlala indababo ngoPowula phambi kombusi uFeliksi.

² Kuthe bona uPowula abizwe, uTertulusi wathoma ukumbeka icala wathi: “Sibe nokuthula isikhathi eside ngawe begodu ukuthuthuka kube kunengi esizwenesi ngebanga lokuhlakanipha kwakho.

³ Lokho-ke, Feliksi odumileko, sikwamukela ngeendlela zoke endaweni zoke begodu siyathokoza.

⁴ Angifuni ukuba siqedamlozi, yeke, ngibawa ngobuntu bakho ukhe usilalele kafitjhani.

⁵ Indoda le siyifumane imumuntu oyipehli nebanga ukuhlubuka phakathi kwamaJuda ephasini loke, begodu imrholi wesiqhema ekuthiwa maNazaretha.

⁶ Yalinga ngitjho nokusilaphaza ithempeli, nje-ke sayibopha.

⁷ Kodwana kwafika induna uLisiya yayidzwebula ngamandla ezandleni zethu,

⁸ yabe yayala bona beze nayo kuwe kobana nawe ngokwakho uzoyihlola ngalokho esiyimangalele ngakho.”

⁹ AmaJuda nawo akufakazela lokho ngokugandelela bona koke kunjalo.

¹⁰ Kwathi uPowula sele akhonjwe mbusi bona akhulume, waphendula wathi: “Ngebanga lokobana ngiyazi bona sekuminyaka eminengi umgwebi esizwenesi ngalokho ngiziphendulela ngithabile.

¹¹ Njengombana nawe ungazibonela nje, akukapheli ngitjho amalanga alitjhumi nambili ngikhuphukele eJerusalema kobana ngiyokuthandaza.

¹² Akhange bangifumane ngiphikisana namunye ngethempelini namkha ngidunga abantu ngesinagogini namkha kukuphi edorobheni.

¹³ Begodu angekhe bakulethela ubufakazi bezinto abangithwesa umlandu ngazo njenganje.

¹⁴ Kodwana nakhu engikuvumako kuwe kobana ngesaba uZimu wabokhokho bami ngokulandela iNdlela leyo abathi kuqhema, godu ngiyakholwa kizo zoke izinto ezitlolwe emthethweni neencwadini zabaphorofidi.

¹⁵ Nginalo ithemba kuZimu, iye, ithemba nabo abalamukelako lokobana kuzakuba khona ukuvuka kwabafileko kwabo boke abalungileko nabangakalungi.

¹⁶ Yeke ngalinga ngamandlami woke bona ngibe nomkhumbulo otsengileko phambi koZimu nabantu.

¹⁷ “Nje-ke emva kweminyaka embalwa ngeza bona ngilethe izipho ebantwini bekhethu nokobana ngizokwenza imihlabelo.

¹⁸ Bengihlambulukile ngihlobile ngesikhathi bangifumana ngingetempeleni ngenza lokhu. Bekungekho isiqubuthu sabantu kimi kungekho nokuvungama.

¹⁹ Kodwana bekukhona amaJuda wesifundeni se-Asiya, wona-ke gade afanele abe khona azongithwesa umlandu phambi kwakho, nakube kukhona abanakho ngami.

²⁰ Namkha bona laba, abakhulume bonyana ngiwuphi umlandu abawufumana kimi lokha nabe ngijame phambi kwesigungu sababarholi bamaJuda;

²¹ ngaphandle kwento eyodwa engiyitjhwileko nangijame phambi kwabo ngathi, ‘Namhlanje ngimangalelwe ngendaba yokuvuka kwabafileko.’ ”

²² Nje-ke uFeliksi owakhe watjelwa kuhle ngeNdlela le, waqeda ikulumo le ngokuphawula wathi: “Ngizakuba nequnto lendaba le lokha induna uLisiya nasele yehlile yafika.”

²³ Wayala umphathimabutho bona amlonde ngesikhungweni, kodwana amvumele athukuluke angakhandeli nabangani bakhe bona bamnikele itjhejo alifunako.

²⁴ Ngemva kwamalanga uFeliksi weza nomkakhe uDrusila obegade amJuda. Wabiza uPowula wamlalela lokha nakhuluma ngokukholwa kuKrestu Jesu.

²⁵ UPowula asakhuluma ngokulunga, ukuzibamba nokuza kwelanga lokugwetjwa, uFeliksi wafikelwa kukwesaba wathi: “Okwanje ungakhamba, ngizakubiza godu nanginesikhathi.”

²⁶ Khonapho bekanethemba bona uPowula uzamfumbathisa. Ngesizathwesi bekanande ambiza bona akhulume naye.

²⁷ Sekudlule iminyaka emibili, uPorkiyusi Festusi wangena esikhundleni sakaFeliksi njengombusi. Ngebanga lokobana uFeliksi afuna ukuthabisa amaJuda, walisa uPowula ngesikhungweni.