IZENZO ZABAPOSTOLI 22 - IsiNdebele 2012 Translation

¹ “Bafowethu nabobaba, kwanjesi akhese nilalele ukuzivikela kwami kini!”

² Kwathi bona bamuzwe bonyana ukhuluma nabo ngesiHebheru, bathulisisa. Nje-ke wathi:

³ “Kokwakho mina ngimJuda, ngabelethelwa eTarsusi yeSilisiya, kodwana ngakhulela khona edorobhenelo eenyaweni zakaGamaliyeli, ngafundiswa ngokutjhubileko ngokuya ngomthetho wabokhokho, ngitjhisakalela uZimu njengombana nani noke ninjalo namhlanje.

⁴ Abanengi egade bakhamba ngeNdlela le ngabazuma bekwaba sekufeni. Bengibopha amadoda nabafazi ngibaphosa ngesikhungweni,

⁵ njengombana nomphristi omkhulu nomkhandlu woke wabaphathi bangaba nobufakazi ngami. Ngamukela incwadi evela kibo itlolelwe abafowethu okumaJuda weDamaseku; ngaya lapho kobana ngiyokubopha, ngibalethe eJerusalema bona bazokuhlunguphazwa.

⁶ “Ngisatjhitjhinga njalo ngitjhidele eDamaseku, pheze emini ekulu, kwehla ezulwini umkhanyo omkhulu wamanyaza kimi mazombe.

⁷ Ngawela phasi ngezwa ilizwi lisithi kimi, ‘Sawula, Sawula! Ungizumelani na?’

⁸ Ngabuza ngathi, ‘Ungubani wena, Kosi, na?’ Yathi kimi, ‘NginguJesu weNazaretha lo ozumana naye.’

⁹ “Abantu ebenginabo bakubona ukukhanya, kodwana akhange balizwe ilizwi laloyo ogade akhuluma nami.

¹⁰ Ngabuza ngathi, ‘Alo-ke ngingenzani, Kosi, na?’ IKosi yathi kimi, ‘Vuka ukhambe uye ngeDamaseku, lapho-ke uzafese uzwe koke obekelwe bona ukwenze.’

¹¹ Njengombana bengingasaboni ngebanga lomkhanyo, labo ebebanami bangibamba ngesandla bangisa ngeDamaseku.

¹² “Umuntu ekuthiwa ngu-Ananiyasi, indoda egade ilandela umthetho ngokupheleleko nekhulunywa kuhle maJuda ahlala lapho,

¹³ yeza kimi yajama hlanu kwami yathi, ‘Mfowethu Sawula, buya ubone godu!’ Khonokho ngabona godu bengayiqala.

¹⁴ Yathi kimi, ‘UZimu wabokhokho ukhethe wena bona wazi intando yakhe, ubone oLungileko wakhe bewuzwe iphimbo lomlomakhe;

¹⁵ ngalokho uzakuba ngufakazakhe kibo boke abantu ngokubonileko nokuzwileko.

¹⁶ Alo, usalindeleni? Sikima ubhajadiswe, kuhlanjwe izono zakho ngokubiza ibizo lakhe!’

UPowula ulathisa ngokuthunyelwa kwakhe kabatjhili

¹⁷ “Kwathi sele ngibuyele eJerusalema, ngisathandaza ngethempelini, ngaba nesiyezi,

¹⁸ ngabona iKosi ikhuluma nami isithi, ‘Rhaba uphume msinyana eJerusalema ngombana abazubamukela ubufakazi bakho ngami.’

¹⁹ Nje-ke ngathi, ‘Kosi, bayazi ngokwabo bona kelinye nelinye isinagogi bengibopha, ngibethe boke ebebagade bakholwa kuwe.

²⁰ Godu lokha iingazi zakaStefani ufakazakho nazithulukako, gade ngijame mina ngokwami lapho, ngivumelana begodu ngiqale nezambatho zalabo abambulalako.’

²¹ Yathi kimi, ‘Khamba ngombana ngizokuthumela kude kabatjhili.’ ”

²² Abantu bebalokhu balalele uPowula bekwaba semagameni lawo; emva kwalokho, bathoma ukurhuwelela bathi: “Msuseni onje ephasini ngombana akakafaneli ukuphila!”

²³ Kwathi basarhuwelela njalo, badabula izambatho zabo, bavusa nethuli,

²⁴ induna yebutho yayala bona alethwe ngekampeni yamajoni; yahlongoza bona akahlolisiswe ngokurithwa khona kuzakwazeka bona itjhada elingakeli libangwe yini ngaye.

²⁵ Kuthe basambhambalalisa bona bamrithe, uPowula wathi kumphathimabutho ebekajame lapho: “Kumthetho yini bona nirithe isakhamuzi sombuso weRoma singakabi ukulahlwa licala na?”

²⁶ Kuthe bona umphathimabutho ezwe lokho, walunga enduneni yebutho wathi kiyo: “Uzokwenzani ngomuntu lo? Usisakhamuzi sombuso weRoma!”

²⁷ Yeke induna yeza kuPowula yambuza yathi: “Akhese ungitjele, kanti wena usisakhamuzi sombuso weRoma na?” Yena wathi: “Iye.”

²⁸ Induna yathi: “Kwangibiza imali enengi mina ukufunyana ilungelwelo.” UPowula waphendula wathi: “Mina-ke ngisisakhamuzi ngokubelethwa.”

²⁹ Khonokho labo egade kumele bamhlole bamkghaduka, induna nayo yangenwa livalo ngombana yalemuka bona uPowula sisakhamuzi sombuso weRoma nokobana beyimbophile.

UPowula ujame esigungwini sabarholi bamaJuda

³⁰ Ngebanga lokobana induna beyifuna ukwazi bona yini into amaJuda amsola ngayo uPowula, ngelanga elilandelako yamthukulula beyayala abaphristi abakhulu nesigungu sabarholi bamaJuda soke bona khebahlangane. Yeke yathatha uPowula yamjamisa phambi kwabo.