IZENZO ZABAPOSTOLI 21 - IsiNdebele 2012 Translation

UPowula uya eJerusalema

¹ Kwathi sesihlukene nabo sathaya sanqomba eKhose, ngakusasa safika eRodosi. Ukusuka lapho saya ePatara.

² Lapho safumana umkhumbi oya eFunisiya; sakhwela sathaya.

³ Sathi nasele sibona iSayipurasi, sadlula ngesewula yakhona sathayela eSiriya, sehlika eTirosi ngombana lapho umkhumbi gade uyokwehlisa ipahla.

⁴ Sesifunyene abafundi lapho, sahlala nabo amalanga alikhomba. NgoMoya oCwengileko batjela uPowula bona angalibhadi eJerusalema.

⁵ Kodwana kuthe bona amalanga wethu lapho aphele, sasuka bona siragele phambili nekhambo lethu. Boke abafundi, abomkabo nabantwababo basiphekelela besaphumela ngaphandle kwedorobho. Lapho-ke saguqa eligwini lelwandle sathandaza.

⁶ Emva kokulayelisana nabo sangena ngemkhunjini, bona babuyela emakhaya.

⁷ Saraga ngethayo lethu ukusuka eTirosi besafika ePitolemayisi; lapha safika sabingelela abazalwana sahlala nabo ilanga elilodwa.

⁸ Ngelanga elilandelako sakhamba safika eKhesariya, sangena kwaFlebhe umvangeli ongomunye wabalikhomba, sahlala kwakhe.

⁹ Yena ubanamadodakazi amane angakendi agade aphorofida.

¹⁰ Kuthe sisahlezi lapho amalangana, kwafika umphorofidi u-Agabhusi avela eJudiya.

¹¹ Weza kithi wathatha ibhande lakaPowula, wazibopha ngalo iinyawo nezandla, wathi: “Nakhu okutjhiwo nguMoya oCwengileko, ‘Ngayo indlela le, umninibhandeli uzokubotjhwa maJuda ngeJerusalema, amkhaphele kabatjhili.’ ”

¹² Kuthe bona sizwe lokho, thina nabanye abantu lapho, sancenga uPowula bona angakhuphukeli eJerusalema.

¹³ Kodwana uPowula waphendula wathi: “Nenzani, nilila kangaka nidanisa ihliziywami na? Angikalungeli kwaphela ukubotjhwa ngeJerusalema, kodwana nokufela khona ngebanga lebizo leKosi uJesu.”

¹⁴ Sesihlulekile ukumvimba, sazithulela samukela sathi: “Intando yeKosi ayenziwe.”

¹⁵ Emva kwamalangana lawo, sazilungiselela sakhuphukela eJerusalema.

¹⁶ Abanye babafundi beKhesariya bakhamba nathi, basisa ekhayeni kwaMnasoni weSayipurasi, ebegade amfundi omdala kobana sihlale khona.

UPowula ufika eJerusalema

¹⁷ Kuthe bona sifike ngeJerusalema amakholwa asamukela ngethabo.

¹⁸ Kwathi ngakusasa uPowula wakhamba nathi sayokubona uJakopo nabaphathi boke abebalapho.

¹⁹ Sele ababingelele, wabika koke ngakunye uZimu agade akwenze hlangana nabatjhili ngomsebenzakhe.

²⁰ Kuthe bona bezwe lokho, badumisa uZimu. Nje-ke bathi kuPowula: “Uyabona mfowethu bonyana kuneenkulungwana ezinengi kangangani hlangana namaJuda ezimakholwa, begodu zoke zitjhisakalela umthetho.

²¹ Manje zitjeliwe ngawe bona wena ufundisa woke amaJuda ahlala eenarheni zabatjhili bona alise umthetho kaMosi; uwatjelile bonyana angasoki abantwana bawo begodu bangalandeli amasiko.

²² Alo, sizokwenza njani na? Nanyana kunjani azokuzwa bonyana ufikile,

²³ yeke yenza lokho esikutjela khona: Kunamadoda amane lapha azibophe ngesifungo,

²⁴ nje-ke khambisana nawo uhlanganele nawo esikweni lokuhlanjululwa ukhuphe iindleko zokugudwa kweenhloko zawo. Ngendlela le boke bazakwazi bona akukho iqiniso kilokho abatjelwe ngawe ngakho, kodwana bazakwazi bona nawe uphila njengaloyo ogcina umthetho kaMosi.

²⁵ “Nakungabatjhili esele bamakholwa, sibathumele incwadi nesimiso sethu sokobana abatjhide kokuhlatjelwe abosingazimu, ebubendeni, kokukghanyiweko nebufebeni.”

²⁶ Ngomuso uPowula wathatha amadoda lawo, kwathi sele azihlambululile, wangena nawo ngethempelini, wabika emtarini ukupheleliswa kwamalanga wehlambuluko lokha kuzakwenziwa umhlabelo womunye nomunye wabo.

Ukubotjhwa kwakaPowula

²⁷ Kuthe amalanga alikhomba nakaya ngekupheleni, amaJuda we-Asiya agade abone uPowula ngethempelini atjitjizela isiqubuthu. Abamba uPowula,

²⁸ arhuwelela athi: “Ma-Israyeli, sizani! Lo, mumuntu okhamba yoke indawo afundisa omunye nomunye, okuphambene nabantu bekhethu, umthetho nendawo le. Ngaphandle kwalokho sele angenise namaGirigi ngethempelini, yeke usilaphaze indawo ecwengileko le!”

²⁹ Ngebanga lokobana bebabone uTrofimusi we-Efesu anoPowula ngedorobheni, badlumbana bona uPowula bekamngenise ngethempelini.

³⁰ Nje-ke idorobho loke laphithizela nabantu beza bagijimela ndawonye; babamba uPowula bamrhudulela ngaphandle kwethempeli kwavalwa neminyango khonokho.

³¹ Kuthe basathi balinga ukumbulala, kwafika ilizwi enduneni yebutho bona loke iJerusalema liyavungazela.

³² Khonokho yathatha amajoni nabaphathimabutho; yarhaba yehlela kibo. Kuthe bona abantu babone induna yebutho namajoni, balisa ukubetha uPowula.

³³ Induna yafese yambamba yathi akabotjhwe ngeenketani ezimbili; yabuza bona ungubani nokobana wenzeni.

³⁴ Abanye hlangana nesiqubuthu barhuwelela into yinye, abanye okhunye. Kwathi ngebanga lokobana ingakhange ikghone ukuzwisisa kuhle ngebanga lokuvungazela, yakanye yayala bona asiwe ekampeni yamajoni.

³⁵ Kwathi uPowula sele afike emiqaqadweni, umguruguru wesiqubuthu wadlanga ngamandla kangangoba kwafuneka bona athwalwe majoni.

³⁶ Isiqubuthu ebesilandela ngemva kwawo besisoloko sirhuwelela sithi: “Akasisusele thina!”

UPowula uyazivikela

³⁷ Kuthe sele bazomngenisa ngekampeni yamajoni, wathi enduneni: “Ngingaba nengingakutjhoko kuwe na?” Induna yamphendula yathi: “Kanti uyasazi isiGirigi na?

³⁸ Nakunjalo, alo, awusimrhali loya womGibhide okhe wathi mhlapha nje walinga ukuvukela umbuso ngokubutha ababulali abaziinkulungwana ezine waya nabo erhalawumbeni?”

³⁹ UPowula waphendula wathi: “Mina ngimJuda odabuka eTarsusi yeSilisiya, ngisisakhamuzi sedorobho eliqakathekileko. Yeke ngiyakubawa, akhe ungivumele ngikhulume ebantwinaba.”

⁴⁰ Sele afunyene imvumo, uPowula wajama phezu komqaqado waphakamisela abantu isandla. Kuthe bona bathule, wakhuluma nabo ngesiHebheru, wathi: