IZENZO ZABAPOSTOLI 20 - IsiNdebele 2012 Translation

EMasedoniya neGirisi

¹ Emva kobana ukuguruzela kuphele, uPowula wabizela abafundi ndawonye. Kuthe sele abakhuthaze ngamezwi, wabalayelisa wakhamba waya eMasedoniya.

² Sele adabule eemfundenezo bewakhuthaza amakholwa ngamezwi amanengi, wafika eGirisi,

³ lapha ahlala khona iinyanga ezintathu. Begade asele azilungisela ukuthayela eSiriya, kodwana njengombana amaJuda gade sele enze ubukhwebetjhana ngaye, waqeda ngokuthi abuye ngeMasedoniya.

⁴ Bekaphekelelwa nguSopatrosi umsa kaPhuru weBheriya, ngu-Aristarirhusi noSekhundusi beThesalonika, nguGayusi weDerbe, nguThimothi, nguTikhikhusi noTrofimusi besifundeni se-Asiya.

⁵ Kodwana laba-ke basandulela, bayosilindela eTrowasi.

⁶ Thina-ke sathaya sisuka eFilipi emva komnyanya wesiKwa esinganaNgumelo safika kibo eTrowasi ngemva kwamalanga amahlanu; sahlala lapho amalanga alikhomba.

Ukuvuswa kwesokana ekufeni

⁷ Ngelanga lokuthoma leveke, lokha nabesihlangene bona sihlephule isikwa, uPowula wakhuluma ebantwini. Njengombana gade azakukhamba ngakusasa, wasolo akhuluma bekwaba kuphakathi kobusuku.

⁸ Bekukhona iimbani ezinengi ngelawini elingaphezulu lapha besihlanganele khona.

⁹ Isokana, ekuthiwa ngu-Ewuterhusi ebelihlezi ngefesidereni lathoma layenda belabanjwa buthongo obunzima, khisibe uPowula bekasakhuluma. Ngokubindwa buthongo lawela phasi ukusuka emgangadelweni wesithathu; ladojwa lapho sele libhubhile.

¹⁰ Kodwana uPowula wehlela phasi waziphosa phezu kwalo walisingatha, wathi: “Ningatshwenyeki ngombana liyaphila.”

¹¹ Wabuyela godu emuva elawini elingehla, kwathi emva kobana sele ahlephule isikwa wagoma, waragela phambili wakhuluma bekwasa; wabese uyakhamba.

¹² Abantu balithatha isokaneli balisa ekhaya liphila, iinhliziyo zabo zaba mhlophe.

Ikhambo ukusuka eTrowasi ukuya eMiletusi

¹³ Saraga saya emkhunjini sakhwela sathayela e-Asusi, lapha besizakufese sithathe khona uPowula. Bekahlele njalo ngombana yena gade azokukhamba ngeenyawo.

¹⁴ Kuthe bona ahlangane nathi e-Asusi, samkhweza saya naye eMithileni.

¹⁵ Sathaya ukusuka lapho, kwathi ngakusasa safika malungana neRhiyosi. Ngelanga elilandelako sabandamela eSamosi, kwathi ilanga emva kwalapho safika eMiletusi.

¹⁶ UPowula yena wacabanga ukuthaya adlule e-Efesu, khona angazukulahlekelwa sikhathi ngesifundeni se-Asiya ngombana bebarhabele ukuyokufika eJerusalema nakungakghoneka ngelanga lePentekoste.

UPowula ulayelisa ebaphathini be-Efesu

¹⁷ UPowula wathumela umlayezo usuka eMiletusi usiya e-Efesu, abawa abaphathi bebandla bona bamhlangabeze.

¹⁸ Kuthe bona bafike, wathi kibo: “Nani niyazi bona bengiphila njani isikhathi soke nginani, kusukela elangeni lokuthomo engafika ngalo esifundeni se-Asiya.

¹⁹ Ngilotjhe iKosi ngokuzithoba okukhulu nangeenyembezi, nganyamezelela iinlingo engahlangana nazo ngobukhwebetjhana bamaJuda.

²⁰ “Azange ngigodle ilitho ebelingaba lisizo kini, ngatjhumayela nginifundisa emtarini nendlu ngendlu.

²¹ Ngamemezela emaJudeni nakwabezizwe ukuphendukela kuZimu nekukholweni eKosini uJesu.

²² Alo-ke, njengesibotjhwa kuMoya, ngisendleleni eya eJerusalema, kungekho engikwaziko bona kuzakwenzekani lapho kimi,

²³ ngaphandle kokuthi uMoya oCwengileko ufakaza kimi emadorobheni woke ukuthi isikhungo nokuhlunguphazwa kungilindile.

²⁴ Ubuphilo bami angisabuthathi njengento eligugu kimi, kwaphela nange ngaqeda ibanga lami nekonzwami engayamukela eKosini uJesu kobana ngifakaze ivangeli lomusa kaZimu.

²⁵ “Nje-ke sengiyazi bona akakho noyedwa wenu kilabo engikhambe ngimemezela ivangeli kibo ozabe asangibona godu.

²⁶ Ngalokho ngiyafakaza kini kilelilanga ngithi anginamlandu eengazini zabo boke abantu

²⁷ ngombana akhange ngigodle ilitho kini ngokufakaza loke ihlelo lakaZimu.

²⁸ Zilondeni ngokuzitjheja nina ngokwenu, nawo woke umhlambi uMoya oCwengileko anibeke bona nibe babonisi bawo kobana neluse ibandla lakaZimu azizuzele lona ngeengazi zeNdodanakhe.

²⁹ Ngiyazi bona kuzakuthi nasele ngikhambile kuze hlangana nenu iimpisi ezikhwabithako, zangawuncenekeli umhlambi.

³⁰ Ngitjho naphakathi kwenu kuzakuvela abanye abahlanakezela iqiniso ukuze bawunge abafundi babalandele.

³¹ Ngalokho qaphelani, nikhumbule bona iminyaka emithathu yoke ubusuku nemini akhange ngilise ukukhalimela omunye nomunye wenu ngeenyembezi.

³² “Nje-ke nginibeka kuZimu nelizwini lakhe lomusa, lona elikwazi ukunakha nokuninikela ilifa hlangana nabo boke abacwengisiweko.

³³ Akhange ngikhanukele isiliva, igolide namkha izambatho zomuntu.

³⁴ Nani ngokwenu niyazi bona ngezandla zamezi ngasebenzela iindingo zami nezalabo abanami.

³⁵ Kikho koke lokhu, nginitjengise bona ngokusebenza kabudisi ngendlela le kufanele sibasize abadududu; sikhumbule amezwi weKosi uJesu eyawatjho yona ngokwayo yathi: ‘Kubusiseke khulu ukupha kunokwamukela!’ ”

³⁶ Kuthe bona atjho lokho, waguqa phasi nabo boke wathandaza.

³⁷ Kwabakhona ukulila okukhulu kibo boke ngesikhathi bagona uPowula, bamcwanga emhlathini.

³⁸ Bajabha khulu ngamezwi awatjhoko bona angekhe basambona godu. Nje-ke bamphekelela emkhunjini.