IZENZO ZABAPOSTOLI 2 - IsiNdebele 2012 Translation

Ukwehla kwakaMoya oCwengileko

¹ Lokha ilanga lePentekoste nalifikako, bebaboke bahlangene ndawonye.

² Kungakatjhejeki kwaba khona itjhada elavela ezulwini lazwakala njengommoya omkhulu uvunguza, lazala ikumba yoke egade bahlezi kiyo.

³ Babona amalangabu anjengamalimu ahlukeneko ehlela phezu kwaloyo naloyo wabo.

⁴ Boke bazala ngoMoya oCwengileko bebathoma ukukhuluma ngeenlimi ezitjhili njengombana uMoya wabapha ukukhuluma.

⁵ Nje-ke bekukhona amaJuda ebegade esaba uZimu ahlala eJerusalema, avela ezizweni zoke ezingaphasi kwezulu.

⁶ Kuthe lokha nakuzwakala itjhadeli, isiqubuthu sahlangana ngokuphithizela ngombana ngiloyo naloyo wezwa bakhuluma ngelimi lekhabo.

⁷ Ngokurareka nangokukakamala isiqubuthweso sabuza sathi: “Angitjho woke amadoda akhulumako la, amaGalile?

⁸ Alo, kuza njani bona omunye nomunye wethu abezwe ngelimi adabuka kilo na?

⁹ AmaPhathiya, amaMede ama-Elamu, abahlali beMesopotamiya, beJudiya beKaphadosiya, bePontusi nebe-Asiya;

¹⁰ beFrigiya, bePhamfiliya, beGibhide nebeengceyeni zeLibhiya hlanu kweSirene iinthekeli zeRoma;

¹¹ amaJuda nabatjhugulukele ebuJudeni; amaKrete nama-Arabhu, soke sibezwa bakhuluma iimangaliso zakaZimu bengamalimi wemakhethu!”

¹² Boke bamangala bebasambatheka, babuzana bodwa bathi: “Kutjho ukuthini lokhu na?”

¹³ Kodwana abanye bebenza amahlaya ngabo, bathi: “Baburhenge!”

Umlayezo kaPitrosi

¹⁴ Alo-ke uPitrosi wasikima nabalitjhumi nanye, waphakamisela ilizwi lakhe esiqubuthwini wathi: “Madoda wamaJuda nani noke enihlala eJerusalema, kufuze nazi begodu nilalele engikutjhoko:

¹⁵ Amadoda la akasiburhenge njengombana nidlumbana ngombana kusese yisimbi yethoba ekuseni.

¹⁶ Kodwana lokhu ngokwakhulunywa mphorofidi uJuweli nakasithi,

¹⁷ “ ‘USomnini uthi: Ngemihla yokuphela ngizakuthululela uMoyami kibo boke abantu; amadodanenu namadodakazenu azakuphorofida, abatjha benu bazakubona imibono, abadala benu babhudange amabhudango.

¹⁸ Iye, emalangeni lawo ngizakuthululela uMoyami naphezu kweenceku neencekukazi, ziphorofide.

¹⁹ Ngizakuveza amabono ezulwini nephasini okutjho iingazi nomlilo nesimukumuku sentuthu.

²⁰ Ilanga lizakuphenduka libe nzima nenyezi ibe ziingazi ngaphambi kokuza kwelanga lakaSomnini elikhulu nelesabekako.

²¹ Kuzakuthi boke ababiza ibizo lakaSomnini basindiswe.’

²² “Nje-ke lalelani la, nina ma-Israyeli: UJesu weNazaretha bekumumuntu ofakazelwe kini nguZimu ngemikarisomraro, ngeemangaliso nangeembonakaliso uZimu azenza phakathi kwenu ngaye, njengombana nani ngokwenu nazi.

²³ Umuntu lo, owanikelwa kini ngokuya ngokwehlelo lakaZimu nangokwazi kwakhe ngaphambili, nina nambethela esiphambanweni benambulala ngezandla zabanganamthetho.

²⁴ Kodwana uZimu wamvusa kabafileko; wamthukulula ebuhlungwini bokufa ngombana bekungekhe kwenzeke bona abanjwe ngikho.

²⁵ UDavida wathi ngaye, “ ‘Ngesikhathi soke ngibeka uSomnini phambi kwami, njengombana angesidleni sami angeze nganyakaziswa.

²⁶ Ngalokho ihliziywami yenamile; ngihlokoma ngamandla ngombana umzimbami ulondekile.

²⁷ Angeze watjhiya umphefumulwami endaweni yabafileko, namkha uvumele othembekileko wakho abone ukubola.

²⁸ Wena ungikhombisa indlela yokuphila. Ukujabula okwanelisako kuphambi kwakho.’

²⁹ “Nje-ke bafowethu, kufuze nginitjele ngesibindi bona ukhokho uDavida wahlongakala bewangcwatjwa nethuna lakhe lisesekhona lapha nanamhlanjesi.

³⁰ Yena gade amphorofidi owazi bona uZimu ufunge ngesifungo bona uzakubeka omunye wesizukulwana sakhe esihlalweni sakhe.

³¹ Abona okungaphambili, wakhuluma ngokuvuka kwakaKrestu bonyana akhange atjhiywe endaweni yabafileko namkha umzimbakhe ubone ukubola.

³² “UZimu uvuse uJesu lo kabafileko begodu soke sibofakazi balokho.

³³ Sele akhutjhulelwe ngesigomeni sakaZimu, wamukela kuYise isithembiso sakaMoya oCwengileko, nje-ke uthulule lokho nani enikubonako nenikuzwako.

³⁴ UDavida akakakhutjhulelwa ezulwini, kodwana wathi, “ ‘Naku umlayezo kaSomnini oya ekosinami: Hlala ngesidleni sami

³⁵ bekube kulokha nangenza izitha zakho zibe sinabelo seenyawo zakho.’

³⁶ “Ngalokho indlu yoke yakwa-Israyeli kufuze yazi bona kwamambala uZimu wenze uJesu enambethela esiphambanweni lo, abe yiKosi noKrestu.”

³⁷ Lokha abantu nabezwa lokho, bahlabeka eenhliziyweni bebathi kuPitrosi nabanye abapostoli: “Alo-ke bafowethu, sizakwenza njani na?”

³⁸ UPitrosi wathi kibo: “Phendukani, omunye nomunye wenu abhajadiswe ebizweni lakaJesu Krestu ukuze nithethelelwe izono, khona nizakwamukela isipho sakaMoya oCwengileko

³⁹ ngombana isithembiso singesenu nabantwana benu nakibo boke abakude; iye, boke uSomnini uZimethu azababizela kuye.”

⁴⁰ Wafakaza nangamanye amezwi amanengi wabakhalima wathi: “Zisindiseni nina ngokwenu esizukulwaneni esonakelekwesi!”

⁴¹ Labo abamukela umlayezwakhe, babhajadiswa. Mhlokho kwangezeleleka pheze iinkulungwana ezintathu zabantu.

Ipilo hlangana nabazalwana

⁴² Abazalwana bebazinikele efundisweni yabapostoli nebudlelwaneni, ekwabelaneni isikwa nemthandazweni.

⁴³ Woke umuntu wafikelwa kukwesaba ngombana abapostoli benza iimangaliso neembonakaliso ezinengi.

⁴⁴ Woke amakholwa araga ndawonye ahlanganyela ezintweni zoke.

⁴⁵ Athengisa ipahlawo neengugudlhelo zawo, abelana omunye nomunye njengokwesidingo sakhe.

⁴⁶ Woke amalanga araga ngokuhlangana ngethempelini. Ukusuka lapho angena ikhaya ngekhaya ahlephulelana isikwa, agoma ndawonye anamile neenhliziyo zimhlophe,

⁴⁷ adumisa uZimu begodu athatjelwa babantu boke. Nje-ke imihla ngemihla uSomnini wangezelela ebandleni labo abasindiswako.