IZENZO ZABAPOSTOLI 18 - IsiNdebele 2012 Translation

EKorinte

¹ Ngemva kwalokho uPowula wasuka e-Athene waya eKorinte.

² Lapho wafunyana umJuda ekuthiwa ngu-Akhwila obelethwa ePontusi, ogade aqeda ukubuya eTariyana nomkakhe uPrisila ngombana umbusi uKlawudiyusi bekayale woke amaJuda bona asuke eRoma. UPowula waya kibo.

³ Ngebanga lomsebenzakhe ofana nowabo, wahlala wasebenza nabo ngombana gade basenza ukuthunga amatende.

⁴ Njalo ngeSabatha bekaphikisana namaJuda namaGirigi ngesinagogini, alinga ukuwazuza.

⁵ Kuthe bona kufike uSilasi noThimothi bavela eMasedoniya, uPowula wazinikela ngokupheleleko ekutjhumayeleni, afakaza emaJudeni bona uJesu unguKrestu.

⁶ Kuthe lokha nabamphikisako bakhuluma kumbi ngaye, wazibilayeza ngokuthintitha ithuli ezambathweni zakhe, wathi kibo: “Iingazi zenu azibe phezu kweenhloko zenu! Mina anginamlandu. Kusukela kwanjesi, ngizakuya kabatjhili.”

⁷ Yeke watjhiya isinagogi waya endlini yomuntu okuthiwa nguTitiyusi Justusi, obekesaba uZimu, indlwakhe ihlanu kwesinagogi.

⁸ UKrisposi umphathi wesinagogi, wakholwa eKosini yena nawo woke umndenakhe; nabanengi ebezwa uPowula eKorinte, bakholwa babhajadiswa.

⁹ Ngobusuku obunye iKosi yakhuluma noPowula ngombono yathi kuye: “Ungesabi, kodwana raga ukhulume, ungathuli

¹⁰ ngombana nginawe. Akakho noyedwa ozakukubeka isandla akulimaze ngombana banengi ngedorobheni le okubabantu bami.”

¹¹ Yeke uPowula wahlala lapho umnyaka nesiquntu, afundisa ilizwi lakaZimu phakathi kwabo.

¹² Kuthe bona uGaliyo abe mbusi we-Arhaya, amaJuda ahlangana asahlela uPowula amdosela phambi kwekundla,

¹³ athi: “Indoda le idosa abantu bona besabe uZimu, ngendlela ephambene nomthetho!”

¹⁴ Kwathi uPowula asathi uyakhuluma, uGaliyo wathi emaJudeni: “Nangabe lokho bekulicala namkha ubukhohlakali obukhulu, bengizakwamukela ukusola kwenu maJuda.

¹⁵ Kodwana njengombana kukuphikisana ngamezwi namabizo nangomthetho wenu, kulungiseni ngokwenu lokho. Angithandi ukuba mgwebi weendabezi!”

¹⁶ Nje-ke wabaqotjha ekundleni.

¹⁷ Boke babhudungela uSosithenesi umphathi wesinagogi, bambetha phambi kwekundla. Kodwana uGaliyo akhange akunake lokho.

Ukubuyela e-Anthiyorhiya

¹⁸ UPowula sele ahlezi isikhatjhana lapho, walayelisa abazalwana wathayela eSiriya aphekelelwa nguPrisila no-Akhwila. EKhengirheriya waguda ihlokwakhe ngombana gade angaphasi kwesifungo.

¹⁹ Kwathi nabafika e-Efesu wabatjhiya khona, kodwana yena waya ngesinagogini wakhulumisana namaJuda.

²⁰ Kuthe lokha nabambawa bona ahlale nabo isikhatjhana, wala.

²¹ Kodwana ekubalayeliseni wathi: “UZimu navumako, ngizakubuya godu.” Yeke wathaya wasuka e-Efesu.

²² Kuthe bona afike eKhesariya, wakhuphuka wayokubingelela ibandla, emva kwalokho wehlela e-Anthiyorhiya.

²³ Kwathi bona ahlale isikhatjhana lapho, wasuka, wakhamba wadabula esifundeni seGalatiya neseFrigiya aqinisa boke abafundi.

U-Apolo e-Efesu neKorinte

²⁴ UmJuda othileko, okuthiwa ngu-Apolo, obelethwa e-Alekzandriya, weza e-Efesu. Gade asikhulumi esikwaziko ukukhuluma nesinelwazi ngemitlolo.

²⁵ Yena-ke bekafundiswe ngendlela kaSomnini, ngokuzimisela okukhulu wakhuluma bewafundisa kuhle ngeendaba ezimayelana noJesu, nanyana bekasazi umbhabhadiso kaJwanisi kwaphela.

²⁶ Nje-ke wathoma ukukhuluma ngesibindi ngesinagogini. Kodwana kuthe bona uPrisila no-Akhwila bamuzwe, bamthatha baya naye ekhaya bamhlathululela kuhle indlela kaZimu.

²⁷ U-Apolo asafisa bona ayamele ngaphetjheya e-Arhaya, abazalwana bamkhuthaza babe batlolela abafundi kobana bamamukele. Ekufikeni kwakhe waba lisizo elikhulu kilabo abathe ngomusa kaZimu baba makholwa

²⁸ ngombana ngamandla amakhulu waphikisa amaJuda epepeneneni, atjengisa ngokwemitlolo bona uJesu unguKrestu.