IZENZO ZABAPOSTOLI 17 - IsiNdebele 2012 Translation

Isiphithiphithi seThesalonika

¹ Kuthe uPowula noSilasi sebadabule e-Amfipolisi ne-Apoloniya, bafika eThesalonika, lapha bekukhona isinagogi lamaJuda.

² Njengesiqhelo sakhe, uPowula wangena ngesinagogini waphikisana nawo ngemitlolo ecwengileko amaSabatha amathathu ngokulandelana;

³ ahlathulula awabonisa kiyo bona uKrestu bekufanele afe abuye avuke godu kabafileko, asithi: “UJesu lo engikhuluma ngaye kini, kazi nguKrestu.”

⁴ Amanye amaJuda akholwa abe alandela uPowula noSilasi. Senza njalo nesiqubuthu esikhulu samaGirigi ebegade esaba uZimu kanye nabafazi abanesithunzi abangasibancani ngesibalo.

⁵ Kodwana amaJuda aba nomona, abuthelela etatawini isiqhema sabolova abumba isitlamu kobana avuse umguruguru edorobheni. Isitlameso sasahlela indlu kaJasoni, sazumana noPowula noSilasi kobana sibakhuphele phambi kwewoma labantu.

⁶ Kuthe amaJuda nakangabafumaniko, adosela uJasoni nabanye abazalwana phambi kweenkhulu zedorobho, arhuwelela athi: “Amadoda la enze umonakalo iphaseli loke nje, njesi sele afike nalapha.

⁷ UJasoni ubamukele endlinakhe. Boke baphula imithetho yombusi omkhulu, ngokuthi batjho kukhona enye ikosi, ibizo layo nguJesu.”

⁸ Ngokuzwa lokho isitlamu neenkhulu zedorobho zavungama.

⁹ Ngemva kobana iinkhulu zithethe imali yehlawulo kuJasoni nakabanye zabalisa bakhamba.

UPowula noSilasi eBheriya

¹⁰ Kuthe bona kurhwaqele, abazalwana bathumela uPowula noSilasi eBheriya. Ekufikeni kwabo lapho baya ngesinagogini lamaJuda.

¹¹ Abantu balapho bebakhanyelwe khulu kunabantu beThesalonika; nje-ke bamukela ilizwi ngokuzimisela okukhulu begodu bahlolisisa imitlolo malanga woke kobana zinjalo izintwezo na.

¹² Inengi lamaJuda lakholwa; ukufaka phakathi abafazi bamaGirigi abanesithunzi namadoda amanengi wamaGirigi.

¹³ Kuthe lokha amaJuda weThesalonika nakezwa bona uPowula utjhumayela ilizwi lakaZimu eBheriya, nawo eza lapho kobana azokunyakazisa abe aphehle isiqubuthu.

¹⁴ Khonokho abazalwana bathumela uPowula eligwini lelwandle kodwana uSilasi noThimothi basala.

¹⁵ Amadoda abekakhamba noPowula amphekelela amfikisa e-Athene; abuyela emuva nomlayezo othi uSilasi noThimothi kufuze bamlandele msinyazana.

UPowula e-Athene

¹⁶ Kwathi uPowula, asabalindele e-Athene, wadana kwamambala ukubona idorobho lizele iinthombe zabosingazimu.

¹⁷ Yeke waphikisana namaJuda namaGirigi esaba uZimu ngesinagogini. Wenza njalo woke amalanga nebantwini ebebafunyaneka ematatawini.

¹⁸ Godu nezinye izazi zama-Ephikuru namaSitoyika zaphikisana naye. Abanye bathi: “Ongazizwako lo uzama ukuthini na?” Abanye baphawula bathi: “Kwangathi utjhumayela abosingazimu abatjhili.” Lokhu bakutjho ngombana bekatjhumayela ivangeli ngoJesu nokuvuka kwabafileko.

¹⁹ Nje-ke bamthatha bamusa phambi kwehlangano ye-Areyophagusi bathi: “Ungakhese usihlathululele bona iyini ifundiso etja oyikhulumako le?

²⁰ Izinto ozikhulumakwezi, ziyasirara thina; yeke besithanda ukuzazi bona zitjho ukuthini.”

²¹ (Woke ama-Athene nabaqhamuki abahlala lapho bebangazilibazisi ngalitho ngaphandle kokukhuluma nokuzwa izinto ezitja.)

²² Nje-ke uPowula wasikima phambi kwehlangano ye-Areyophagusi wathi: “Madoda we-Athene, ngiyabona bonyana nikholwe khulu ngazo zoke iindlela.

²³ Kuthe nangikhambakhambako ngiqala eendaweni lapha nithandazela khona, ngifumene kujame i-aldari litlolwe lathi, ‘NgelakaZimu ongaziwako.’ Nje-ke lokho enikukhonza ningakwazi, ngikho engikutjhumayelako kini.

²⁴ UZimu obumbe iphasi nakho koke okukilo, oyiKosi yezulu nephasi, akahlali ngemathempelini akhiwe babantu.

²⁵ Begodu akakhonzwa ngezandla zabantu inga udinga ilitho ngombana nguye opha koke okuphilako ipilo, umphefumulo nezinto zoke.

²⁶ Ngomuntu oyedwa wadala zoke izizwe kobana zihlale ebusweni balo loke iphasi. Wazibeka iinkhathi zokuphila kwazo waziquntela nemikhawulo lapha zizakuhlala khona.

²⁷ Wakwenza lokho ukuze zimfune, mhlamunye zingamfunyana lokha nazimfunako, nanyana angasikude ngitjho nakubani wethu.

²⁸ Ngaye siyaphila, siyakhambakhamba begodu sikhona, njengombana abanye beembongi zenu batjhwile bona, “ ‘Nathi siziinzukulwana zakhe.’

²⁹ “Yeke, njengombana siziinzukulwana zakaZimu, asikafaneli sidlumbane bonyana ubuZimu bufana negolide namkha isiliva nanyana ilitje eliqandulwe ngobuhlakani nelwazi lomuntu obhubhako.

³⁰ Ngalokho uZimu wathalalisa iinkhathi zokungazi, kodwana kwanjesi uyayala bonyana kuphi nakuphi abantu boke baphenduke

³¹ ngombana sele abeke ilanga azokugweba ngalo iphasi ngokulunga ngaloyo amkhethileko. Ngalokho ukukhombisile ngokwenza isiqiniseko sokumvusa kabafileko.”

³² Kuthe nabezwa ngokuvuka kwabafileko, abanye bamtshima, kodwana abanye bathi: “Sizakubuya sikulalele godu ngalokho.”

³³ Yeke uPowula wabasukela, wakhamba.

³⁴ Kodwana abanye babo bamnamathela babamakholwa, sekubalwa nomAreyophagusi uDiyonisiyosi nomfazi okuthiwa nguDamarisi nabanye kanye nabo.