IZENZO ZABAPOSTOLI 16 - IsiNdebele 2012 Translation

UThimothi ukhamba noPowula noSilasi

¹ UPowula wafika eDerbe neListra, lapha bekuhlala khona umfundi ekuthiwa nguThimothi; unina amJuda okholiweko, kodwana uyise amGirigi.

² Abazalwana beListra ne-Ikhoniyo bebambuka.

³ UPowula bekafuna ukuthatha uThimothi akhambe naye, yeke wamsokisa ngebanga lamaJuda ahlala endaweni leyo ngombana boke bebasazi bona uyise liGirigi.

⁴ Lokha nabalokhu bakhamba umuzi nomuzi bebanande bakhuluma bona kufuze kulondwe iimphetho ezathathwa bapostoli nabaphathi eJerusalema.

⁵ Yeke amabandla aqiniswa ekukholweni akhula malanga woke.

UPowula uya eMasedoniya

⁶ UPowula noThimothi badabula isifunda seFrigiya neGalatiya, ngombana uMoya oCwengileko wabakhandela ukutjhumayela e-Asiya.

⁷ Kuthe bona bafike emkhawulweni weMusiya, balinga ukuya endaweni yeBhithiniya, kodwana nalapho uMoya wakaJesu akhange abavumele.

⁸ Alo-ke bakhamba badabula eMusiya behlela eTrowasi.

⁹ Phakathi kobusuku uPowula waba nombono wendoda yeMasedoniya egade ijamile imncenga ithi: “Akhese uze eMasedoniya hle, uzosisiza!”

¹⁰ Kuthe bona uPowula abone umbono lo, sazilungiselela msinyana ukuya eMasedoniya, sikholwa bona uZimu usibizele ukuyokutjhumayela ivangeli kibo.

Ukutjhuguluka kwakaLidiya

¹¹ Sasuka eTrowasi ngomkhumbi sathayela poro eSamothirake, ngelanga elilandelako saya eNeyapoli.

¹² Kusuka lapho saya eFilipi okulidorobho eliqakathekileko esifundeneso seMasedoniya eliphasi kombuso weRoma. Sahlala amalangana edorobheneli.

¹³ Ngelanga leSabatha saphumela ngaphandle kwesango ledorobho saya ngemlanjeni, lapha besilindele ukufunyana khona indawo yokuthandaza. Sahlala phasi sakhuluma nabafazi egade bahlangene lapho.

¹⁴ Omunye wabagade balalele bekungumma obizwa bona nguLidiya, amthengisi wezambatho ezibubende edorobheni leThiyathira. Gade alotjha uZimu; nje uZimu wavula ihliziywakhe bona ilalelisise lokho uPowula akutjhoko.

¹⁵ Kuthe bona yena nomndenakhe babhajadiswe, wasimemela endlinakhe wathi: “Naningithatha njengomuntu okholwa yiKosi, yizani nizokuhlala kwami.” Yeke wasitomatomela bona sihlale.

Ngesikhungweni eFilipi

¹⁶ Langelinye nasiya endaweni yokuthandaza, sahlangatjezwa likhobokakazi ebelinommoya wobungoma. Belenzela abaninilo imali enengi ngokubhula kwalo.

¹⁷ Lalandela uPowula nathi, lirhuwelela lithi: “Amadoda la aziinsebenzi zakaZimu ongoPhezulu; banibikela indlela yokusindiswa!”

¹⁸ Lakwenza lokhu amalanga amanengi, kufikela lapho uPowula wabe wanyenya khona waphendukela kilo, wathi emmoyeni: “Ebizweni lakaJesu Krestu ngiyakuyala bona uphume kuye!” Khonokho ummoya wobungoma waphuma kuye.

¹⁹ Kuthe bona abaninilo babone bona ithuba lokwenza imali ngalo alisekho, babamba uPowula noSilasi babadosela etatawini kobana baqalane nabomthetho.

²⁰ Babaletha phambi kwabagwebi bathi: “Amadoda la amaJuda, begodu abanga ihlangahlangano edorobheni lekhethu

²¹ ngokufundisa amasiko aphikisana nomthetho wethu thina esimaRoma bona siyamukele besiyenze.”

²² Isiqubuthu saba semdibini wokusahlela uPowula noSilasi; abagwebi bayala bona bahlutjuliswe bebarithwe.

²³ Ngemva kokudulwa kabuhlungu badlhunywa ngesikhungweni, kwathiwa umphathisikhungo ababeke ilihlo elibukhali.

²⁴ Ngemva kokwamukela umyalo lo, umphathisikhungo wabadlhunya ngesikhungweni esingaphakathi, wabopha iinyawo zabo hlangana neengaqa ezibudisi zeengodo.

²⁵ Phakathi kobusuku uPowula noSilasi bebathandaza bavuma iingoma badumisa uZimu, ezinye iimbotjhwa zibalalele.

²⁶ Khonokho kwaba khona ukusikinyeka okukhulu kwephasi kangangobana kwadengezela iinsekelo zesikhungo. Khonapho zoke iimvalo zesikhungo zavuleka, iimbopho zatjhaphuluka kizo zoke iimbotjhwa.

²⁷ Umphathisikhungo wavuka, kwathi bona abone iimvalo zesikhungo zivulekile, warhwatjha isabulakhe wafuna ukuzibulala ngombana wadlumbana bona zoke iimbotjhwa zibalekile.

²⁸ Kodwana uPowula warhuwelela wathi: “Ungazikhubazi ngombana soke sisesekhona.”

²⁹ Umphathisikhungo wathi akukhanyiswe, wangena agijima waguqa phambi kweenyawo zakaPowula noSilasi aqhaqhazela.

³⁰ Nje-ke waya nabo ngaphandle wababuza wathi: “Banimzana, kufuze ngenzeni ukuze ngisindiswe na?”

³¹ Baphendula bathi: “Kholwa eKosini uJesu, nje-ke uzakusindiswa wena nomndenakho.”

³² Yeke batjhumayela ilizwi leKosi kuye nakibo boke ebebasendlinakhe.

³³ Ngalo i-awara lobusukwelo umphathisikhungo wabathatha wabahlambisa amanceba; nje-ke kwathi khonokho yena nawo woke umndenakhe babhajadiswa.

³⁴ Sekabangenise ngendlinakhe, wabapha ukudla. Yena nomndenakhe bebanethabo ngombana gade sebakholwe kuZimu.

³⁵ Ngelanga elilandelako ngamasa abagwebi bathumela amapholisa kumphathisikhungo nomyalo othi: “Thukululani amadoda lawo.”

³⁶ Yeke umphathisikhungo watjela uPowula wathi: “Iinkhulu zinithumele umlayezo bona sinithukulule. Yeke phumani nikhambe ngokuthula.”

³⁷ Kodwana uPowula wathi emapholiseni: “Basibetha phambi kwabantu ngaphandle kokusigweba, basidlhunya ngesikhungweni, thina esizizakhamuzi zombuso weRoma. Manjesi bafuna ukusibuyisela emva ngasese na? Awa! Iinkhulu azize ngokwazo kobana zizosikhupha.”

³⁸ Amapholisa athula amezwi la eenkhulwini. Kwathi bona zizwe bonyana uPowula noSilasi bebazizakhamuzi zombuso weRoma, zesaba.

³⁹ Zeza kibo zazokuncancabeza. Zabakhupha ngesikhungweni, zababawa bona bakhambe edorobheni.

⁴⁰ Emva kobana uPowula noSilasi baphume ngesikhungweni, baya endlini kaLidiya, lapha bahlangana khona nabazalwana. Kuthe sebabakhuthazile, bakhamba.