IZENZO ZABAPOSTOLI 15 - IsiNdebele 2012 Translation

Umbuthano eJerusalema

¹ Kwehla abathileko bavela eJudiya, bafundisa abazalwana, bathi: “Ngaphandle kobana nisokwe njengombana umthetho kaMosi usitjho, angekhe nasindiswa.”

² Kwaba khona ukuphambana nokuphikisana phakathi kwabo noPowula banoBharinabhasi. Nje-ke kwaquntwa bona uPowula noBharinabhasi nabanye abafundi baye eJerusalema bayokubonana nabapostoli nabaphathi ngendaba le.

³ Ibandla labathumela bona bakhambe, nje-ke basadabula iFunisiya neSamariya, babika bona abatjhili batjhugulukele njani kuZimu. Iindabezi zaletha ithabo elikhulu ebazalwaneni boke.

⁴ Kuthe bona bafike eJerusalema, bamukelwa libandla, abapostoli nabaphathi. Bababikela koke uZimu akwenzileko ngabo.

⁵ Kodwana amanye amakholwa ebegade asesiqhemeni sabaFarisi, asikima athi: “Abatjhili kufanele basokwe bebatjelwe bona bahloniphe umthetho kaMosi.”

⁶ Abapostoli nabaphathi bahlangana ukuhlolisisa indaba le.

⁷ Emva kokuphikisana isikhathi eside, uPitrosi wasikima wathi: “Bafowethu, niyazi kusukela kade bona uZimu wangikhetha hlangana nani ukutjhumayela umlayezo wevangeli kabatjhili ngomlomami, khona bazakuzwa bebakholwe.

⁸ UZimu owazi ihliziyo, wabonisa bona nabo uyabamukela ngokubanikela uMoya oCwengileko njengombana enza kithi.

⁹ Akhange akhe enze umehluko hlangana nathi nabo, wahlambulula iinhliziyo zabo ngokukholwa.

¹⁰ Alo-ke kungani nifuna ukulinga uZimu ngokuthwesa abafundi umthwalo esingakghoni ukuwuthwala thina namkha abokhokho bethu na?

¹¹ Nje-ke thina siyakholwa bona kungomusa weKosethu uJesu kobana sisindiswe; nabo ngokunjalo.”

¹² Isiqubuthu soke sathula du salalela uBharinabhasi noPowula ebebasibikela ngeembonakaliso nangeemangaliso uZimu azenzileko ngabo hlangana nabatjhili.

¹³ Kuthe bona baqede ukukhuluma, uJakopo wathi; “Bafowethu, ngilalelani!

¹⁴ USimoni usihlathululele bona ekuthomeni uZimu bekanetjisakalo kangangani ngokuthatha kabatjhili isizwe esibizwa ngebizo lakhe.

¹⁵ Amezwi wabaphorofidi avumelana poro nalokhu, njengombana kutloliwe kwathiwa,

¹⁶ “ ‘Mhlokho ngizakuvuselela itende lakaDavida eliwileko. Ngilungise iindawo zalo ezonakeleko, ngibuyisele isithunzi salo, ngilakhe libe njengombana gade linjalo phambilini

¹⁷ ukuze imisalela yabantu ifune uSomnini ngitjho nabo boke abatjhili ababizwa ngebizo lami. Kutjho uSomnini, owenza izintwezi

¹⁸ ebezazeka ekadeni.’

¹⁹ “Ngalokho kumkhumbulwami bona singabakhathazi abatjhili abatjhugulukela kuZimu.

²⁰ Endaweni yalokhu, asibatloleleni incwadi sibatjele bona batjhide emanyaleni weenthombe, batjhide ebungwadleni, bangadli isilwana esikghanyiweko kanye nobubende

²¹ ngombana eenkhathini zaphambilini umthetho kaMosi utjhunyayelwe kiwo woke amadorobho begodu bewafundwa ngemasinagogini woke amaSabatha.”

Incwadi eyathunyelwa kabatjhili abamakholwa

²² Yeke abapostoli nabaphathi kanye nebandla loke, baqunta ukukhetha amadoda athileko, bawathume e-Anthiyorhiya noPowula noBharinabhasi. Bakhetha uJudasi, okuthiwa nguBharisabhasi noSilasi okumadoda amabili agade abarholi hlangana nabazalwana.

²³ Bathumela ngabo incwadi elandelako ethi: Abapostoli, abaphathi nabafowenu, kabakholwako abatjhili abahlala e-Anthiyorhiya, eSiriya neSilisiya. Siyabingelela.

²⁴ Sizwile bona amanye amadoda wangekhethu asuka lapha ngaphandle kokulayelwa ngithi afese aniwurubaja abe ahlukumeza umkhumbulwenu ngamezwi.

²⁵ Yeke sizwene soke bonyana sikhethe iinthunywa sizithumele kini kanye nabangani bethu esibathandako, uBharinabhasi noPowula,

²⁶ amadoda adele ubuphilo bawo ngebanga lebizo leKosethu uJesu Krestu.

²⁷ Yeke, sithumela uJudasi noSilasi, abazakufakaza esikutlolileko ngomlomo.

²⁸ Nje-ke kubonakele kukuhle kuMoya oCwengileko nakithi kobana singanidisibezi ngalitho ngaphandle kwalokhu okufaneleko, kokuthi:

²⁹ Tjhidani ekudleni okuhlatjelwe iinthombe, ekudleni ububende nokukghanyiweko, nitjhide nebungwadleni. Naningenzi izintwenzi, nizabe nenza kuhle. Salani kuhle.

³⁰ Sebalayelisiwe, bakhamba, behlela e-Anthiyorhiya lapha babuthelela ndawonye ibandla balinikela incwadi.

³¹ Mbala abantu bayifunda incwadi, bathokoza ngomlayezo okhuthazako.

³² UJudasi noSilasi nabo egade babaphorofidi, bakhuluma okunengi okukhuthazako nokuqinisa abazalwana.

³³ Emva kokuhlala isikhatjhana lapho, abazalwana babaphekelela ngesibusiso sokuthula. Nje-ke babuyela kilabo egade babathumile.

³⁴ Kodwana uSilasi wacabanga ukuhlala lapho.

UPowula noBharinabhasi bayahlukana

³⁵ UPowula noBharinabhasi basala e-Anthiyorhiya, bafundisa batjhumayela ilizwi leKosi bakanye nabanye abanengi.

³⁶ Ngemva kwamalanga athileko uPowula wathi kuBharinabhasi: “Asibuyele emuva sithekele abazalwana kiyo yoke imizi lapha sakhe satjhumayela khona ilizwi leKosi, besibone nokuthi baraga njani.”

³⁷ UBharinabhasi bekafuna kukhanjwe noJwanisi okuthiwa nguMarkosi,

³⁸ kodwana uPowula wabona kungasikuhle bona bakhambe naye ngombana wabahlubuka basePhamfiliya, wangasaragela phambili nokusebenza nabo.

³⁹ Kwavuka ukuphikisana phakathi kwabo, bebahlukana. UBharinabhasi wathatha uMarkosi bathaya baya eSayipurasi,

⁴⁰ kodwana uPowula sele anikelwe bazalwana emseni weKosi, wakhetha uSilasi wakhamba.

⁴¹ Wadlula eSiriya neSilisiya, aqinisa amabandla.