IZENZO ZABAPOSTOLI 14 - IsiNdebele 2012 Translation

UPowula noBharinabhasi e-Ikhoniyo

¹ E-Ikhoniyo, uPowula noBharinabhasi baya ngesinagogini lamaJuda njengokuvamileko. Lapho bakhuluma kangangobana inani elikhulu lamaJuda nabatjhili lakholwa.

² Kodwana amaJuda lawo agade ala ukukholwa ahlohlozela abatjhili abenza babe nehliziyo embi ebazalwaneni.

³ Nokho uPowula noBharinabhasi bahlala lapho isikhathi eside, bakhuluma ngesibindi ngeKosi, eyafakazela ilizwi lomusa wayo ngokubanikela amandla wokwenza iimbonakaliso neemangaliso.

⁴ Abantu bedorobho lelo bebahlukene kabili; abanye banyula amaJuda, abanye banyula abapostoli.

⁵ Kwathi lokha abatjhili, amaJuda kanye nabarholi bakhona nabasongela ukubalimaza nokubakhanda ngamatje,

⁶ bakulemuka lokho, yeke babalekela emadorobheni weLikhawoniya okuyiListra neDerbe neendaweni eziseduze.

⁷ Lapho baragela phambili nokutjhumayela ivangeli.

EListra neDerbe

⁸ Bekukhona indoda ehlala eListra iinyawo zayo bezirholophele, isirhole kwekubelethweni kwayo ingazange ikhe ikhambe.

⁹ Yona beyisoloko ilalele uPowula nakakhulumako. Nje-ke uPowula wayiqala poro, wayibona bona iyakholwa bonyana ingaphuluka.

¹⁰ Wathi ngelizwi elikhulu: “Sikima, ujame thwi ngeenyawo zakho!” Indoda yeqa, yathoma ukukhambakhamba.

¹¹ Kwathi bona isiqubuthu sibone bonyana uPowula wenzeni, sathoma ukurhuwelela ngelimi lesiLikhawoniya sathi: “Abozimu bafane nabantu behlela kithi!”

¹² Bathiya uBharinabhasi ibizo bona nguZewusi uPowula bathi nguHerimesi ngombana nguye ogade asikhulumi.

¹³ Umphristi kasingazimu uZewusi, ogade anethempeli ngaphandle kwedorobho, waletha iinkunzi namakhwa esangweni ledorobho. Yena nesiqubuthu bebafuna ukwenzela abapostoli imihlabelo.

¹⁴ Kodwana kuthe bona abapostoli, uBharinabhasi noPowula, bezwe ngalokho, badabula izambatho zabo bagijimela hlangana nesiqubuthu barhuwelela,

¹⁵ bathi: “Madoda! Nikwenzelani lokhu na? Nathi sibabantu njengani nje! Silapha ukuzokutjhumayela ivangeli, ukunitjhugulula ezintwenezi ezililize, nitjhugulukele kuZimu ophilako, owadala izulu nephasi nelwandle nakho koke okukilo.

¹⁶ Esikhathini esadlulako wavumela zoke izizwe bona zikhambe ngeendlela zazo.

¹⁷ Kodwana akhange aliselele bona kungabi nobufakazi ngezinto ezihle azenzako: Waninisela izulu elivela ezulwini wanipha nesikhathi esinomnotho somnyaka nenala yokudla bewazalisa iinhliziyo zenu ngokwenama.”

¹⁸ Ngitjho nangawo amezwi la abapostoli babhalelwa ukusola isiqubuthu bona singabenzeli umhlabelo.

¹⁹ Nje-ke kuthe amanye amaJuda avela e-Anthiyorhiya ne-Ikhoniyo nasele athumbele isiqubuthu esikhulu ngakiwo, akhanda uPowula ngamatje, amrhurhubisela ngaphandle kwedorobho, adlumbana bona ufile.

²⁰ Kodwana kuthe bona abafundi bamzombe, wavuka wabuyela emva edorobheni. Ngelanga elilandelako yena noBharinabhasi baya eDerbe.

Ukubuyela e-Anthiyorhiya engeSiriya

²¹ UPowula noBharinabhasi batjhumayela ivangeli ngeDerbe, bazuza abafundi abanengi. Nje-ke babuyela eListra, e-Ikhoniyo ne-Anthiyorhiya,

²² baqinisa bebakhuthaza abafundi bona baragele phambili ngokukholwa, bathi: “Kufuze sidlule ebunzimeni obunengi ngaphambi kobana singene embusweni kaZimu.”

²³ Kelinye nelinye ibandla bazikhethela abaphathi; ngomthandazo nokuzila babanikela kuZimu, ogade babeke ithemba labo kuye.

²⁴ Sele badabule iPhisidiya, bafika ePhamfiliya;

²⁵ kwathi sele batjhumayele ilizwi ePherge, behlela e-Athaliya.

²⁶ Ukusuka lapho bathayela emuva e-Anthiyorhiya, lapha bebanikelwe khona emseni kaZimu ngomsebenzi esebawuqedileko.

²⁷ Nabafika e-Anthiyorhiya, babuthelela ibandla ndawonye balibikela koke uZimu akwenzileko ngabo, nokuthi wavula njani indlela bona abatjhili bakholwe.

²⁸ Bahlala lapho isikhathi eside nabafundi.