IZENZO ZABAPOSTOLI 13 - IsiNdebele 2012 Translation

UBharinabhasi noSawula bayathunywa

¹ Ebandleni elise-Anthiyorhiya bekukhona abaphorofidi nabafundisi okutjho uBharinabhasi, uSimiyoni okuthiwa nguNigeri, uLukiyusi weSirene, uManayeni, owakhula noHerode umtetrarerhesi noSawula.

² Kuthe basadumisa iKosi bazilile, uMoya oCwengileko wathi: “Ngahlukaniselani uBharinabhasi banoSawula kobana baye emsebenzini engibabizele wona.”

³ Emva kobana bazile ukudla bathandaza, bababeka izandla.

UBharinabhasi noSawula eSayipurasi

⁴ UBharinabhasi noSawula, bathunywa nguMoya oCwengileko baya eSelukiya, bathaya kusuka lapho basiya eSayipurasi.

⁵ Kuthe bona bafike eSalamisi, batjhumayela ilizwi lakaZimu ngesinagogini lamaJuda. UJwanisi bekanabo azobasiza.

⁶ Bakhamba badabula soke isihlengele bebafika ePhafosi. Lapha-ke bahlangana nomJuda ongusomlingo nomphorofidi wamanga okuthiwa nguBhari-Jesu.

⁷ Yena bekazihlanganise nombusi wesihlengeleni, uSerigiyusi Powula, obekayindoda ehlakaniphileko. Umbusi loyo wabiza uBharinabhasi noSawula ngombana bekafuna ukuzwa ilizwi lakaZimu.

⁸ Kodwana u-Elimasi, ibizo lakhe ngesiGirigi elitjho bona ngusomlingo, walinga ukuphambukisa umbusi ekukholweni.

⁹ Yeke uSawula ogade aziwa bona nguPowula, azele uMoya oCwengileko; waqala usomlingo eenhlonzeni wathi:

¹⁰ “Wena ndodana kaSathana! Usisitha sayo yoke into elungileko. Uzele yoke imihlobo yamano amambi, ulinga njalo ukuphendula iqiniso leKosi ulenze amanga!

¹¹ Isandla sakaZimu sizokwehlela phezu kwakho khona nje; uzakuba siphofu, awuzukubona umkhanyo welanga isikhathi esithileko.” Khonokho wembeswa yikungu nobumnyama, wakhamba aphumbutha afuna umuntu ongamdosa ngesandla.

¹² Kuthe lokha umbusi nakabona okwenzekileko wakholwa begodu bekararwe ngilokho akufunde ngeKosi.

Nge-Anthiyorhiya esePhisidiya

¹³ UPowula nabalandeli bakhe bathaya kusukela ePhafosi ukuya ePherge ngePhamfiliya, lapha uJwanisi Markosi abatjhiya khona wabuyela emva eJerusalema.

¹⁴ Kusukela ePherge bakhamba bafika e-Anthiyorhiya esePhisidiya. NgeSabatha baya ngesinagogini bahlala phasi.

¹⁵ Emva kokufunda umthetho kaMosi nemitlolo yabaphorofidi, abaphathi besinagogi baphosa ilizwi ngakibo bathi: “Bafowethu, nakube kukhona umlayezo wokukhuthaza ebantwini, sibawa nikhulume.”

¹⁶ UPowula wasikima waphakamisa isandla wathi: “Ma-Israyeli nani bakosozizwe enesabe uZimu, ngilalelani!

¹⁷ UZimu wabantu bakwa-Israyeli laba wakhetha abokhokho bethu, bewabenza isizwe esikhulu ngesikhathi basahlezi njengeenkhonzi eGibhide. Nje-ke wabakhupha enarheni leyo ngamandla amakhulu.

¹⁸ Wababekezelela baserhalawumbeni iminyaka ematjhumi amane.

¹⁹ Warhayila izizwe ezilikhomba enarheni yeKanana, wanikela inarha leyo abantu bakhe bona ibe lilifa labo.

²⁰ Koke lokho kwathatha pheze iminyaka emakhulu amane namatjhumi amahlanu. “Emva kwalokho wabanikela abagwebi kufikela ngesikhathi somphorofidi uSamyela.

²¹ Nje-ke abantu babawa ikosi, uZimu wabanikela uSawula umsa kaKhitjhi, wekoro yakwaBhenjamini, owabusa iminyaka ematjhumi amane.

²² “Emva kokususa uSawula, uZimu wabeka uDavida bona abe yikosabo bewafakaza ngaye wathi, ‘Ngifunyene uDavida indodana kaJese, umuntu wehliziywami, uzakwenza koke engifuna bona akwenze.’

²³ Esizukulwaneni sakhe uZimu wavusela u-Israyeli uMsindisi uJesu njengombana athembisa.

²⁴ “Kodwana ngaphambi kokuza kwakaJesu, uJwanisi watjhumayela ukuphenduka nombhabhadiso kibo boke bakwa-Israyeli.

²⁵ Ekuphetheni kwakhe umsebenzi, uJwanisi wathi ebantwini: ‘Nicabanga bona ngingubani na? Angisinguye enimlindileko. Kodwana qalani, uyeza ngemva kwami, loyo engingakafaneli ukutjhaphulula amapatlagwanakhe.’

²⁶ “Nje-ke bafowethu, nzukulwana zaka-Abrahamu nani enesaba uZimu, umlayezo wesindiso lo uthunyelwe kithi.

²⁷ Abantu beJerusalema nabarholi babo akhange bamazi uJesu; nje-ke ngokumlahla bazalisa amezwi wabaphorofidi afundwa njalo ngeSabatha.

²⁸ Nanyana bangazange bafunyane isizathu sokumgwebela ukufa, babawa uPilatu bona abulawe.

²⁹ “Sele benze koke ebekutlolwe ngaye, bamphanyula esiphambanweni bambulunga ngelibeni.

³⁰ Kodwana uZimu wamvusa kabafileko.

³¹ Amalanga amanengi wabonwa ngilabo agade akhamba nabo kusukela eGalile ukuya eJerusalema. Labo-ke ngibo esele babe bofakazi ebantwini bekhethu.

³² “Thina sinitjela ivangeli: Lokho uZimu akuthembisa abokhokho bethu,

³³ ukuzalisile kithi, thina nzukulwana zabo ngokuvusa uJesu, njengombana kutloliwe eRhubeni lesibili bona, “ ‘Wena uyiNdodanami; namhlanje ngiyakuvuselela.’

³⁴ “Indaba yokuthi wamvusa kabafileko kobana angabuyi abole, kukhulunywe emezwini la, ‘Ngizaninikela iimbusiso ezicwengileko zamambala engazithembisa uDavida.’

³⁵ “Njengombana asitjho kenye indimana asithi, ‘Angekhe uvumele othembekileko wakho abone ithuna.’

³⁶ “Emva kokobana uDavida aqede ukukhonza esizukulwaneni sakhe ngokwehloso kaZimu, walala; wabulungwa kiboyisemkhulu, wabola.

³⁷ Kodwana loyo uZimu amvusa kabafileko akhange abone ukubola.

³⁸ “Ngalokho bafowethu, ngithanda nazi bona kungebanga lakaJesu ukuthethelelwa kwezono kumenyezelwa kini.

³⁹ Ngaye woke okholwako ulungisiswa kikho koke egade ningekhe nalungisiswa ngakho ngomthetho kaMosi.

⁴⁰ Nje-ke yelelani, bona lokho abaphorofidi abakutjhwileko kungenzeki kini.

⁴¹ Bathi, “ ‘Qalani nina nyefuli ndina, nizitjhejisise nikakamale benikhungatheke ngombana kunento engizayenza emihleni yenu; eningazukuyikholwa nanyana sele niyitjelwa.’ ”

⁴² Kuthe uPowula noBharinabhasi basaphuma ngesinagogini, abantu babawa bona baragele phambili ngeendabezi ngeSabatha elilandelako.

⁴³ Nje-ke kwathi bona ikonzo iphume, amaJuda amanengi nalabo abesaba uZimu abatjhugulukele ebuJudeni balandela uPowula noBharinabhasi. Labo-ke bakhuthazwa ngokuragela phambili emseni kaZimu.

⁴⁴ NgeSabatha elilandelako, pheze woke umuntu edorobheni weza ukuzokulalela ilizwi leKosi.

⁴⁵ Kwathi bona amaJuda abone isiqubuthu esikhulu azala umona abe anyefula lokho uPowula agade akutjhoko.

⁴⁶ Nje-ke uPowula noBharinabhasi bawaphendula ngesibindi bathi: “Bekufanele bona ilizwi lakaZimu litjhunyayelwe kini qangi. Kodwana njengombana nililahlile benazibona ningakafaneli ipilo engapheliko, yelelani, sesiphendukela kabatjhili

⁴⁷ ngombana nakhu uSomnini asiyale ngakho, “ ‘Ngikubeka bona ube mkhanyo ezizweni ukuze ulethe isindiso emikhawulweni yephasi.’ ”

⁴⁸ Kuthe abatjhili bona bezwe lokhu, bathaba tle, badumisa ilizwi leKosi. Boke labo abakhethe ukuphila okungapheliko baba makholwa.

⁴⁹ Ilizwi leKosi lenaba kizo zoke iimfunda.

⁵⁰ Kodwana amaJuda atjitjizela abafazi abesaba uZimu nabanesithunzi kanye namadoda aziinkhulu edorobheni kobana badunge uPowula noBharinabhasi, babaqotjhe esifundeni sabo.

⁵¹ Nje-ke bona babahloboka abantu balapho bathintitha iinyawo zabo, bakhamba baya e-Ikhoniyo.

⁵² Abafundi nge-Anthiyorhiya bebazele uMoya oCwengileko, bathabile.