IZENZO ZABAPOSTOLI 12 - IsiNdebele 2012 Translation

Ukubulawa kwakaJakopo nokubotjhwa kwakaPitrosi

¹ Ngesikhatheso uHerode ikosi wabamba amanye amalunga webandla kobana awahlukumeze.

² Wabulala uJakopo, umnakwabo kaJwanisi, ngesabula.

³ Nakabona bonyana lokhu kuwakarile amaJuda, waraga wabopha noPitrosi. Lokho kwenzeka ngesikhathi somnyanya wesiKwa esinganaNgumelo.

⁴ Ngemva kokumbopha wamdlhunya ngesikhungweni, wamnikela ngaphasi kweenqhema ezine, sisinye sinamajoni amane; bekaneqhinga lokumkhuphela phambi kwabantu emva kwePhasika.

⁵ Yeke uPitrosi wagcinwa ngesikhungweni, kodwana ibandla lamthandazela ngesineke kuZimu.

UPitrosi ukhutjhwa ngesikhungweni

⁶ Kuthe khona ngabo ubusukobo phambi kobana uHerode akhuphele uPitrosi phambi kwabantu, uPitrosi bekalele hlangana namajoni amabili, abotjhwe ngeenketani ezimbili, begodu kukhona nabalindisango ababili emsebenzini.

⁷ Khonokho kwabonakala ingilozi yeKosi bekwaba khona ukukhanya ngaphakathi kwesikhungo. Yapasula uPitrosi ehlangothini, yamvusa yathi: “Vuka! Yenza msinyana!” Khonokho iinketani zakhithika ezandleni zakaPitrosi.

⁸ Nje-ke ingilozi yathi kuye: “Thekeleza ufake amapatlagwanakho.” UPitrosi wenza njalo. Ingilozi yathi kuye godu: “Yembatha isambatho sakho ungilandele.”

⁹ UPitrosi wayilandela, baphuma ngesikhungweni. Kodwana akhange azi bona ingilozi leyo ekwenzako gade ingikho na; wadlumbana bona gade abona umbono.

¹⁰ Badlula esiqhemini sabalindi bokuthoma nabesesibili bebafika esangweni lesimbi elivulekela ngedorobheni. Isango lazivulekela ngokwalo, baphuma. Sebadlule indledlana yaba yinye, khonapho ingilozi yamtjhiya uPitrosi.

¹¹ Yeke uPitrosi sele asangulukile wathi: “Kwanje ngiyazi bona ngambala uZimu uthumele ingilozakhe kobana ingisindise emandleni kaHerode nakizo zoke izinto amaJuda agade alindele bona zizokwenzeka.”

¹² Sekumkhanyele lokho, waya emzini wakaMariya, unina lakaJwanisi godu okuthiwa nguMarkosi, lapha bekuhlangene khona abantu abanengi bathandaza.

¹³ UPitrosi wakokoda emnyango wangaphandle, incekukazi uRoda weza azokuhlola bona ngubani.

¹⁴ Kuthe lokha nakalemukako bona lilizwi lakaPitrosi, wathaba kwamambala bewagijima wabuyela emuva angakavuli, warhuwelela wathi, “UPitrosi ujame ngaphandle emnyango!”

¹⁵ Bona bathi: “Uyarhapha!” Kodwana nalokhu aphikelele bona liqiniso, bathi: “Yingilozakhe.”

¹⁶ UPitrosi waphikelela akokoda. Kuthe bona bavule umnyango bambone, barareka kwamambala.

¹⁷ Watjengisa ngesandla bona bathule, nje-ke wabahlathululela bona iKosi imkhuphe njani ngesikhungweni, bewathi: “Tjelani uJakopo nabazalwana ngalokhu.” Wakhamba waya kenye indawo.

¹⁸ Ngakusasa, kwaba khona ukuphithizela hlangana namajoni afuna ukwazi bonyana kwenzekeni ngoPitrosi.

¹⁹ Emva kobana uHerode akhuphe umlayezo bona afunwe kodwana angafunyaneki, waphenyisisa abalindi bewayala bona babulawe. Emva kwalokho uHerode wasuka eJudiya waya eKhesariya, wahlala lapho isikhatjhana.

Ukufa kwakaHerode

²⁰ UHerode wasilingeka khulu ngabantu beTirosi neTsidoni; bona baya kuye basiqubutjhwana ukuyombona. Sele bazuze uBhulastusi obegade ayinceku ethembekileko yekosi bona abe ngakibo, babawa ukuthula ngombana inarha yekhabo beyifumana ukudla okuvela enarheni yekosi uHerode.

²¹ Ngelanga elibekiweko uHerode wembatha isambatho sakhe sobukhosi wahlala esihlalweni sakhe sobukhosi, wethula ikulumo ebantwini.

²² Barhuwelela bathi: “Akusimumuntu okhulumako, kodwana nguzimu!”

²³ Msinyazana ngebanga lokobana uHerode angakhange adumise uZimu, ingilozi kaSomnini yamdula phasi, bewadliwa ziimpethu, wafa.

²⁴ Kodwana ilizwi lakaZimu laragela phambi ngokwanda nokwenaba.

²⁵ UBharinabhasi noSawula baqeda ikhambo labo, babuyela eJerusalema, bathatha noJwanisi okuthiwa nguMarkosi.