IZENZO ZABAPOSTOLI 11 - IsiNdebele 2012 Translation

Umbiko kaPitrosi ebandleni

¹ Abapostoli nabazalwana kilo loke iJudiya bezwa bona nabatjhili sebamukele ilizwi lakaZimu.

² Nje-ke kwathi bona uPitrosi aye eJerusalema, labo ebegade bafuna ukusoka abatjhili bamsola,

³ bathi: “Wena uye emzini wabatjhili abangakasoki, wagoma nabo!”

⁴ UPitrosi wathoma ukubahlathululela koke njengombana kwenzekile, wathi:

⁵ “Bengithandaza, ngisedorobheni leJopa, khonapho ngehlelwa siyezi ngabona umbono. Ngabona into efana netjhila isehliselwa phasi ngeentsutsungu zayo ezine ivela ezulwini; yehlela lapha ngikhona.

⁶ Ngaqalisisa ngaphakathi kwayo, ngabona iinlwana zephasi ezineenyawo ezine, iimbandana, iimphili ezikhakhabako neenyoni zomkayi.

⁷ Ngezwa ilizwi lithi kimi, ‘Pitrosi, vuka, uhlabe, ugome!’

⁸ Kodwana ngaphendula ngathi, ‘Awa Kosi, akunalitho elisilapheleko namkha elingakahlambuluki elakhe langena ngemlonyenami.’

⁹ Ilizwi elivela ezulwini lakhuluma kwesibili lathi, ‘Lokho uZimu akuhlambululileko, ungakubizi bona kungokusilapheleko.’

¹⁰ Lokho kwenzeka amahlandla amathathu, nje-ke koke kwabuyiselwa ezulwini godu.

¹¹ Khonokho amadoda amathathu agade avela eKhesariya athunywe kimi, afikela ngendlini ebengihlala kiyo.

¹² UMoya oCwengileko wangitjela bona ngikhambe nawo ngaphandle kokuzaza. Abazalwana abasithandathu laba bakhamba nami nje-ke soke sangena ngendlini yendoda leyo.

¹³ Yona yasitjela bona yabona njani ingilozi egade ijame endlinayo isithi, ‘Thumela umuntu eJopa ayokubiza uSimoni okuthiwa nguPitrosi.

¹⁴ Uzokulethela umlayezo ozakusindisa wena nomndenakho woke.’

¹⁵ Kwathi ngisathoma ukukhuluma, uMoya oCwengileko wehlela phezu kwabo, njengombana wehlela phezu kwethu ekuthomeni.

¹⁶ Alo-ke ngakhumbula lokho iKosi eyakutjhoko nayithi, ‘UJwanisi wabhabhadisa ngamanzi, kodwana nina nizakubhajadiswa ngoMoya oCwengileko.’

¹⁷ Nje-ke, nakube uZimu wabapha isipho njengombana apha thina esakholwa kuJesu Krestu; alo-ke, bengingubani mina bona bengingaliya uZimu?”

¹⁸ Kwathi bona bezwe lokho, balisa ukusola, badumisa uZimu basithi: “Yeke uZimu selabaphile abatjhili ithuba lokutjhugulukela ekuphileni!”

Ibandla e-Anthiyorhiya

¹⁹ Labo abahlakazeka ngebanga lokuhlutjhwa okwathoma ngemva kokufa kwakaStefani, bafika ngitjho eFunisiya, eSayipurasi ne-Anthiyorhiya, barhatjha umlayezo emaJudeni kwaphela.

²⁰ Kodwana phakathi kwawo bekumadoda avela eSayipurasi neSirene, wona aya e-Anthiyorhiya ayokhuluma ilizwi nemaGirigini awatjela ivangeli ngeKosi uJesu.

²¹ Amandla weKosi gade anamadoda lawo nenani elikhulu labantu lakholwa latjhugulukela eKosini.

²² Iindaba ngalokho zafika eendlebeni zebandla eJerusalema, yeke bathumela uBharinabhasi e-Anthiyorhiya.

²³ Kwathi lokha nakafikako abona umusa kaZimu, wathaba kwamambala bewabakhuthaza boke bonyana bathembeke eKosini ngokudzimelela ngeenhliziyo zabo zoke.

²⁴ Bekuyindoda elungileko, izele uMoya oCwengileko nokukholwa; abantu abanengi bazinikela eKosini.

²⁵ Yeke uBharinabhasi waya eTarsusi ukuyokufuna uSawula.

²⁶ Kwathi bona amfunyane, wamusa e-Anthiyorhiya. Nje-ke umnyaka woke bahlanganyela nebandla bafundisa abantu abanengi. Kwaba se-Anthiyorhiya lapha abafundi babizwa khona kokuthoma bona maKrestu.

²⁷ Ngesikhatheso kwehla abanye babaphorofidi basuka eJerusalema baya e-Anthiyorhiya.

²⁸ Omunye wabo okuthiwa ngu-Agabhusi, wasikima wathukula ngoMoya oCwengileko bona kuzakuba khona indlala ekulu kilo loke iphasi. Kwamambala yaba khona ngesikhathi sokubusa kombusi omkhulu uKlawudiyusi.

²⁹ Abafundi omunye nomunye ngokukghona kwakhe waqunta ukusiza abazalwana abahlala eJudiya.

³⁰ Lokho bakwenza ngokuthumela izipho zabo ebaphathini ngoBharinabhasi noSawula.