IZENZO ZABAPOSTOLI 10 - IsiNdebele 2012 Translation

UPitrosi noKorneliyasi

¹ EKhesariya bekukhona indoda, ibizo layo linguKorneliyasi umphathimabutho ebekuthiwa mabutho weTariyana.

² Yena nomndenakhe bekubabantu abesaba uZimu nabazinikeleko kuye. Gade abela abadududu, ahlala njalo athandaza uZimu.

³ Kwathi langelinye ngesimbi yesithathu malangantambama waba nombono. Ngokucacileko wabona ingilozi kaZimu ifika kuye isithi: “Korneliyasi!”

⁴ Yena wayiqala ngokuyesaba, wabuza wathi: “Kosi, kwenze njani?” Ingilozi yaphendula yathi: “Imithandazwakho nokwabela kwakho abadududu kwenyukele kuZimu njengesikhumbuzo.

⁵ Nje-ke, thumela amadoda eJopa ayokubiza uSimoni ekuthiwa nguPitrosi.

⁶ Yena uhlala kwaSimoni umtjhukiinkhumba onendlu hlanu kwelwandle.”

⁷ Kwathi lokha ingilozi egade ikhuluma naye nasele ikhambile, uKorneliyasi wabiza iinsebenzi zakhe ezimbili nejoni elesaba uZimu egade limelusa.

⁸ Wabatjela koke ekwenzekileko bewabathuma eJopa.

⁹ Ngakusasa basesesendleleni, sele batjhidele edorobheni, uPitrosi wenyukela phezu kwephahla lekumba wayokuthandaza kusemini ekulu.

¹⁰ Walamba bewakhanuka kobana angadla. Nje-ke kwathi ukudla kusalungiswa waba semmoyeni.

¹¹ Wabona izulu livuleka, kwaba nento eyehlako injengetjhila elikhulu lehliselwa phasi ngeentsutsungu zalo zozine.

¹² Ngaphakathi kwalo bekukhona imihlobohlobo yazo zoke iimbandana ezineenyawo ezine, iimphili ezikhakhabako neenyoni zomkayi.

¹³ Nje-ke ilizwi lathi kuye: “Pitrosi, vuka, uhlabe, ugome!”

¹⁴ Kodwana uPitrosi wathi: “Awa, Kosi ngombana azange khengigome okusilapheleko namkha okungakahlambuluki.”

¹⁵ Ilizwi lakhuluma naye godu, lathi: “Lokho uZimu akuhlambululileko ungakubizi bona kusilaphele.”

¹⁶ Lokho kwenzeka amahlandla amathathu, yeke itjhilelo lathathwa khonokho labuyiselwa ezulwini.

¹⁷ UPitrosi asararekile bona umbono utjho ukuthini, amadoda athunywe nguKorneliyasi sele afunyene indlu kaSimoni bona ikuphi, ajama esangweni layo.

¹⁸ Arhuwelela, abuza bona kungabe ukhona umyeni lapha, ibizo lakhe elinguSimoni Pitrosi na?

¹⁹ Kuthe uPitrosi asazindla ngombono lowo, uMoya oCwengileko wathi kuye: “Qala, kunamadoda amathathu afuna ukukubona!

²⁰ Sikima, wehle uye kiwo! Ungazazi ukukhamba nawo ngombana athunyelwe ngimi.”

²¹ Yeke uPitrosi wehla waya kiwo, wafika wathi: “Nginguye enimfunako. Alo, nize ngani?”

²² Aphendula athi: “Umphathimabutho, uKorneliyasi usithumile. Uyindoda eqotho eyesaba uZimu begodu ukhulunywa kuhle esizweni soke samaJuda. Uyalwe yingilozi ecwengileko bona akumemele emzinakhe ukuze ezwe bonyana umphathele ndaba bani.”

²³ UPitrosi wawabawa bona angene ngendlini; wahlala nawo ubusukobo. Ngakusasa wakhamba nawo; nabanye abazalwana beJopa bakhamba naye.

²⁴ Ngelanga elilandelako wafika eKhesariya, lapha uKorneliyasi gade abalindele khona begodu gade ameme iinhlobo nabangani bakhe abakhulu.

²⁵ UPitrosi asangena endlini, uKorneliyasi wamhlangabeza wahloma ihloko phasi eenyaweni zakhe ngokumhlonipha.

²⁶ Kodwana uPitrosi wamphakamisa wathi kuye: “Sikima, nami ngimumuntu nje.”

²⁷ Asakhuluma naye njalo, wangena ngendlini, wafumana kuhlangene abantu abanengi.

²⁸ Wathi kibo: “Nani ngokwenu niyazi bona kuphambene nomthetho wethu kobana umJuda ahlanganyele namkha athekele wesinye isizwe. Kodwana uZimu ungibonisile bona ngingathi umuntu othileko usilaphele namkha akakahlambuluki.

²⁹ Nje-ke kungalokho kuthe nangibizwako ngeza ngaphandle kokuzaza. Alo-ke, ngingabuza bona kubayini ningibizile na?”

³⁰ UKorneliyasi waphendula wathi: “Amalanga amane adlulileko, bengithandaza ngingendlinami ngesikhathesi, ngesimbi yesithathu malangantambama: Khonokho kwajama phambi kwami indoda yembethe izambatho eziphazimako.

³¹ Yathi kimi, ‘Korneliyasi! UZimu uwuzwile umthandazwakho bewakhumbula nokwabela kwakho izipho kwabadududu.

³² Nje-ke, thumela eJopa, uyokubiza uSimoni ekuthiwa nguPitrosi. Yena umyeni emzini kaSimoni umtjhukiinkhumba, ohlala hlanu kwelwandle.’

³³ Yeke ngathumela bona bayokubiza msinyana; wenze kuhle wafika. Soke sesilapha phambi koZimu, sesilindele ukuzwa koke uZimu akuyale bona usitjele khona.”

Ikulumo kaPitrosi

³⁴ UPitrosi wathoma ukukhuluma, wathi: “Sekuyangikhanyela bona uZimu akakhethi ubuso.

³⁵ Kodwana omesabako enze okulungileko nanyana angewasiphi isizwe uyamukeleka kuye.

³⁶ Niyawazi umlayezo uZimu awuthumela ebantwini bakwa-Israyeli, akhuluma ivangeli lokuthula eliza ngoJesu Krestu oyiKosi yabo boke.

³⁷ Niyakwazi bona kwenzekeni kilo loke iJudiya, kusukela eGalile ngemva kombhabhadiso owatjhunyayelwa nguJwanisi;

³⁸ kobana uZimu wajamisa uJesu weNazaretha ngoMoya oCwengileko namandla, wakhamba yoke indawo enza okuhle, apholisa boke egade bangaphasi kwamandla kaSathana ngombana uZimu gade anaye.

³⁹ Sibofakazi bakho koke akwenzileko elizweni lamaJuda neJerusalema. Bambulala ngokumphanyeka esiphambanweni,

⁴⁰ kodwana uZimu wamvusa kabafileko ngelanga lesithathu, wenza bona abonwe,

⁴¹ ingasingibo boke abantu, kodwana abonwe ngithi uZimu asikhetha njengabofakazi. Iye, thina esadla besasela naye emva kokuvuka kwakhe kabafileko.

⁴² Wasiyala bona sitjhumayele ebantwini besifakaze bona nguye uZimu amkhethileko bona abe mgwebi wabaphilako nabafileko.

⁴³ Boke abaphorofidi bafakaza ngaye bona woke okholwa kuye wamukeliswa ukulitjalelwa kwezono ngebizo lakhe.”

Abantu abatjhili baphiwa uMoya oCwengileko

⁴⁴ Kwathi uPitrosi asakhuluma amezwi la, uMoya oCwengileko wehlela phezu kwabo boke egade balalele umlayezo.

⁴⁵ Amakholwa asokiweko nebegade eze noPitrosi, arareka khulu ngombana isipho sakaMoya oCwengileko besithelwe naphezu kwabatjhili.

⁴⁶ Babezwa bakhuluma ngeenlimi ezitjhili badumisa uZimu. Nje-ke uPitrosi wathi:

⁴⁷ “Ukhona ongakhandela bona abantwaba babhajadiswe ngamanzi na? Nabo bamukele uMoya oCwengileko njengathi.”

⁴⁸ Yeke wathi ababhajadiswe ebizweni lakaJesu Krestu. Bambawa bona ahlale nabo amalangana.