IZENZO ZABAPOSTOLI 1 - IsiNdebele 2012 Translation

Isingeniso

¹ Indaba yokuthoma Theyofilusi, ngatlola ngazo zoke izinto uJesu athoma ukuzenza nokuzifundisa,

² kufikela mhlana enyuselwa ezulwini, emva kobana ayale ngoMoya oCwengileko abapostoli abakhethileko.

³ Wazibonakalisa kibo aphilile ngemva kokuhlupheka kwakhe, wabakhombisa ngeendlela ezinengi eziliqiniso bona uyaphila. Wabonakala kibo esikhathini esimalanga amatjhumi amane, akhuluma ngombuso kaZimu.

⁴ Ngesikhathi asahlanganyele nabo asidla, wabayala wathi: “Ningasuki eJerusalema, kodwana lindelani isipho uBaba anithembisa sona, okutjho leso enezwa ngikhuluma ngaso

⁵ ngombana uJwanisi wabhabhadisa ngamanzi, kodwana nina nizokubhajadiswa ngoMoya oCwengileko emalangeni ambalwa ezako.”

UJesu wenyukela ezulwini

⁶ Labo ebebahlangene ndawonye, bambuza bathi: “Kosi, ingabe esikhathinesi sewuzowubuyisela umbuso ku-Israyeli na?”

⁷ Yena wabaphendula wathi: “Akusikho kwenu ukwazi iinkhathi namkha amalanga uBaba awabeke ngentando yakhe.

⁸ Kodwana nizakwamukela amandla lokha uMoya oCwengileko nasele ehlele phezu kwenu. Nizakuba bofakazi bami eJerusalema, kiyo yoke iJudiya neSamariya kufikela emaphethelweni wephasi.”

⁹ Emva kokutjho lokho, wenyuselwa ezulwini bamqalile; ilifu lamsusa emehlwenabo.

¹⁰ Basasoloko baqhusululele amehlwabo phezulu, yena enyuka, khonokho kwabonakala kujame hlanu kwabo amadoda amabili embethe ezimhlophe,

¹¹ athi: “Madoda weGalile, nijameleni lapho niqale ezulwini na? Yena uJesu lo osuswe kini owenyuselwe ezulwini, uzakubuya ngawo wona umukghwa lo enimbone enyuka ngawo.”

Owathatha isikhundla sakaJudasi

¹² Nje-ke babuyela eJerusalema basuka entabeni ekuthiwa yi-Oliva egade ilibanga lekhambo leSabatha ukusuka edorobheni.

¹³ Kuthe bona bafike, balunga elawini eliphezulu egade bahlala kilo; bekunguPitrosi, uJwanisi, uJakopo no-Andrisi, uFlebhe noTomasi, uBharitholomeyusi noMatewu, uJakopo umsa ka-Alifiyosi, uSimoni umZelothe noJudasi indodana kaJakopo.

¹⁴ Boke laba bebaphele bahlangane njalo bazokuthandaza ndawonye kanye nabesifazana noMariya unina lakaJesu nabafowabo.

¹⁵ Emihleni leyo uPitrosi wasikima wakhuluma hlangana nabazalwana ebebangaba likhulu namatjhumi amabili,

¹⁶ wathi: “Bazalwana, kufuze kuzaliseke imitlolo eyakhulunywa nguMoya oCwengileko ngomlomo kaDavida, waphorofida ngoJudasi ogade amhlahli walabo ababamba uJesu.

¹⁷ Yena bekangomunye wethu begodu ayingcenye yomsebenzi lo.

¹⁸ “Nje-ke, ngomvuzo azizuzela wona ngobukhohlakali bakhe, uJudasi wathenga isimu lapha awa khona ngobuso, kwadabuka isisu amathumbakhe aphareka phasi.

¹⁹ Boke beJerusalema bezwa ngalokho; nje-ke babiza isimu leyo ngesikhabo bonyana yi-Akelidama, okutjho bona ‘Yisimu yeengazi’.

²⁰ “Kutloliwe encwadini yamaRhubo bona, ‘Ikumbakhe ayigedeze, kungahlali namunye ngaphakathi kwayo.’ “Begodu kutloliwe bona, ‘Kwanga omunye angathatha isikhundla sakhe.’

²¹ “Nje-ke kufanelekile ukukhetha yinye yamadoda walawo ebegade asoloko anathi isikhathi soke lokha uJesu nabekanande aphuma angena phakathi kwethu,

²² kusukela ekubhabhadiseni kwakaJwanisi kufikela lapha uJesu enyuselwa khona ezulwini asuswa kithi. Kumele bona enye kiwo ibe ngufakazi kanye nathi wokuvuka kwakaJesu.”

²³ Yeke baphakamisa amadoda amabili: uJosefa, ogade abizwa bona nguBharisabhasi, obekabuye abizwe nguJustusi, kanye noMatiyasi.

²⁴ Alo-ke bathandaza bathi: “Kosi, wena wazi ihliziyo yomunye nomunye umuntu. Nje-ke, sitjengisa bona ngubani wababilaba omkhethileko

²⁵ bona azokuthatha isikhundla sobupostoli, esitjhiywe nguJudasi waziyela endawenakhe.”

²⁶ Benza ifumbe, yona yadla uMatiyasi, nje-ke wabalwa kanye nabapostoli abalitjhumi nanye.