IZAGA 9 - IsiNdebele 2012 Translation

Isimemo sokuhlakanipha nesobudlhadlha

¹ Unokuhlakanipha uzakhele ikumba, wazibazela iinsika ezilikhomba.

² Uhlabe isitjhebo, wawumela iwayini, wendlala itafula

³ bewathuma iincekukazi zakhe. Ubiza asesiqongolweni sedorobho uthi:

⁴ “Wena onganalwazi jikela lapha!” Abuye athi kabanganangqondo:

⁵ “Yizani nizogoma ukudla kwami, nisele newayini lami engiliwumeleko.

⁶ Fulathelani ubudlhadlha, khona nizakuphila benikhambe endleleni yokuzwisisa.

⁷ Loyo osola isinyefuli, uzibizela ihlamba. Naloyo okhalimela isikhohlakali ufumana ukurhubutjhwa.

⁸ Nawukhalimela isinyefuli sizakuzonda, kodwana nawukhalimela ohlakaniphileko, uzakuthanda.

⁹ Nawunikela ilwazi kohlakaniphileko, uzakwanda ngobuhlakani; nawufundisa olungileko, uzazengezela ingqondo.

¹⁰ “Ukwesaba uSomnini kukuthoma kokuhlakanipha nokwazi oCwengileko kukuzwisisa.

¹¹ Ngami amalangakho azakwanda, kungezelelwe neminyaka yokuphila kwakho.

¹² Nakube uhlakaniphile, ukuhlakanipha kwakho kuzakuhlomulisa, nakube usinyefuli, uzazithwalela umthwalo wedwa.”

¹³ Unobudlhadlha unetjhada akakhalimeki begodu akanalwazi.

¹⁴ Uhlala emnyango wekumbakhe, esihlalweni esisesiqongolweni sedorobho,

¹⁵ urhuwelela abadlula ngendlela, labo abakhamba ngendlela enqombileko, uthi:

¹⁶ “Wena onganalwazi jikela lapha!” Abuye athi kabanganangqondo:

¹⁷ “Amanzi wokwetjiwa ehla esiphundu, nokugoma kwangemsitheleni kuyanandipha!”

¹⁸ Kodwana abalemuki bonyana abafileko balapho neenthekeli zobudlhayela obusamfazi zisekuzikeni kweliba.