IZAGA 8 - IsiNdebele 2012 Translation

Ukumema kokuhlakanipha

¹ Ukuhlakanipha akubizi na? Ukuzwisisa akurhuweleli na?

² Kujame embundwini hlanu kwendlela, lapha kuhlangana khona imizila,

³ kurhuwelela eqadi kwamatatawu ngedorobheni ebungenweni bamasango kuhlokoma kuthi:

⁴ “Ngiyanibiza nina madoda, ngirhuwelela boke abantu!

⁵ Nina eninganalwazi, zuzani ilemuko! Nina enidlhayeleko, zuzani ukuzwisisa!

⁶ Lalelani ngombana nginezinto ezinetlha, iimbhena zami zikhuluma okufaneleko.

⁷ Umlomami umemezela okuliqiniso, ubukhohlakali busikghabhudlho eembheneni zami.

⁸ Woke amezwi womlomami alungile, alikho nalinye lawo eligwegwesileko namkha elonakeleko.

⁹ Woke anqophile kozwisisako begodu alungile kabafumana ilwazi.

¹⁰ Khethani ukusola kwami kunesiliva, nirhuluphele ilwazi kunegolidembala,

¹¹ ngombana ukuhlakanipha kuhle kunamaparele, mbala akunalitho olifisako elingafana nakho.

¹² “Mina, unokuhlakanipha ngiphila nelemuko; ngihlanganyela nelwazi lengqondo ehle.

¹³ Ukwesaba uSomnini kukuzonda ubumbi, Ngizonda ukuzitjhaya nokuziphakamisa kanye nekulumo ephambeneko.

¹⁴ Kimi kunokweluleka nepumelelo; mina nginokuzwisisa, nginamandla.

¹⁵ Ngami amakhosi ayabusa nababusi benza imithetho elungileko.

¹⁶ Iinkhulu nabosaziwako babusa ngami, iye, boke abaphatha ngokulungileko.

¹⁷ Ngithanda labo abangithandako, abangifunako bayangifunyana.

¹⁸ Kimi kunobunjinga nedumo, umnotho othandwako nepumelelo.

¹⁹ Isithelo sami singcono kunegolide, ngitjho negolidembala nomkhiqizwami ungcono kunesiliva ekhethekileko.

²⁰ Ngikhamba emizileni yokulunga, phakathi kweendlela zobulungiswa,

²¹ ukuze ngiphe abangithandako umnotho kube lilifa labo, ngizalise iinlulu zabo.”

²² “USomnini ungidale ekuthomeni kwendalwakhe, ngaphambi kwemisebenzakhe yendulo.

²³ Ngabunjwa mandulondulo, ekuthomeni, ngaphambi komlando womhlaba.

²⁴ Ngabelethwa amanzi amanengi angakabiphi, kungakabiphi nemithombo ephuphuma amanzi;

²⁵ ngaphambi kobana iintaba zinzinziswe, iye, ngaphambi kobana kube nemibundu,

²⁶ ngaphambi kobana adale ihlabathi nemimango, ngitjho namathomo weentuli zephasi.

²⁷ Ngasele ngikhona lokha uZimu najamisa amazulu, lokha nathala umthala phezu kobuso bamalwandle;

²⁸ nasungula isibhakabhaka phezulu, abeka imikhawulo yeeyalu zamanzi amanengi;

²⁹ nanikela amalwandle amaphethelwawo ukuze amanzi angeqi umyalwakhe. Lokha nathala iinsekelo zephasi

³⁰ bengiseqadi kwakhe ngingusosino, ngimthabela imihla ngemihla, ngihlala ngijabulile phambi kwakhe,

³¹ ngijabulile ngelizwe lephasi lakhe, ngithabele abantu.

³² “Nje-ke, madodana, yeningilalele; ngithi babusisiwe abalonda iindlela zami.

³³ Lalelani ukusola kwami. Nakube nihlakaniphile, angeze nakudela.

³⁴ Ubusisiwe umuntu ongilalelako, oqapha eminyangwenami imihla ngemihla alinde emathurini wamasangwami.

³⁵ Ofumana mina ufumene ipilo begodu uzuza umusa kuSomnini.

³⁶ Kodwana ohlulwa kungifumana uzilimaza yena ngokwakhe, boke abangizondako bathanda ukufa!”