IZAGA 7 - IsiNdebele 2012 Translation

Isiyeleliso ngeenhlobongi

¹ Ndodanami, londa amezwami, ufihle imiyalwami ehliziywenakho.

² Nawulonda imiyalwami uzakuphila. Iye, ulonde ifundiswami njengehlavu yelihlo lakho;

³ ibophelele eminwenakho, uyitlole emiqebethwini yehliziywakho.

⁴ Yithi ekuhlakanipheni: “Wena ungudadwethu”, bese ubiza ukuzwisisa ngesihlobo sakho.

⁵ Lokho kuzakulonda esihlobongini, iye, emfazini otjhili onamezwi abutjhelelezi.

⁶ Lokha nangisefesidereni lekumbami ngihlola emlukweni wefesidere,

⁷ ngabona hlangana nabanganalwazi, ngayelela hlangana namasokana umuntu omutjha onganangqondo

⁸ adlula ehla ngendledlana eduze nejika lekumba yesihlobongi, anqombe nca ngekumbenaso,

⁹ nakuhlwako entambama, sele kuthoma ukurhwaqela.

¹⁰ Qala, nangu umfazi azomhlangabeza, embethe zobungwadla, anobuqili;

¹¹ akhulumela futhi, anganakuthula begodu alunywa ziinyawo:

¹² njenje useendledlaneni, njenje usetatawini ledorobho; emajikeni woke ucuphile.

¹³ Wamtjhuba wamumanga, akhange abe neenhloni, wathi kuye:

¹⁴ “Namhlanje ngifeza iimfungo zami, yeke nginomhlabelo wetjhebiswano ekhaya.

¹⁵ Ngalokho ngiphume bona ngikuhlangabeze, bengiseze ngikufuna, nje-ke ngikufumene!

¹⁶ Ngendlale umbhedami ngamatjhila iye, amibalabala welineni abuya eGibhide.

¹⁷ Ngiwufafaze ngemire, iqolo lesikghopha nesinamoni.

¹⁸ Yewize sizanelise ngomseme bekuse, iye, sizitike ngethando!

¹⁹ Qala, indodami ayikho ekhayapha, ithethe ikhambo elide.

²⁰ Ibhade imbadayo yemali, izabe ibuye inyanga nayigcweleko.”

²¹ Wamsomasoma ngelimu elithambileko, wamwunga ngeembhena ezibutjhelelezi.

²² Khonapho isidlhadlhakazeso sasuka samlandela, njengekomo isiya ebuhlabelweni nehlokwayo irhobelwe ngomutja,

²³ kufikela lapha umkhonto uhlaba khona isibindi sayo. Sinjengenyoni irhabela esifini ingalemuki bonyana izakulahlekelwa yipilo.

²⁴ Nje-ke ndodanami, yewungilalele yelela amezwami.

²⁵ Ungavumeli ihliziywakho iphendukele eendleleni zesihlobongi, ungakhambakhambi emizilenaso.

²⁶ Banengi abongazimbi esibawisileko, sibulele iwoma elikhulu.

²⁷ Ikumbaso imasango wokuya ekufeni, ehlela phasi emalawini wokufa.