IZAGA 6 - IsiNdebele 2012 Translation

Ukuyeleliswa ebudlhayeleni

¹ Ndodanami, nawenze isibambiso kumakhelwanakho, wambamba isandla, wazibophelela esikhundleni somqhamuka,

² iye, nakube sewubanjwe yikulumakho, wagolwa mamezwi womlomakho,

³ yeke yenza lokhu ndodanami: Zitjhaphulule ngombana uwele ezandleni zakamakhelwanakho. Rhaba, ulandelele umakhelwanakho loyo, umkhole.

⁴ Ungavumeli ubuthongo emehlwenakho, nokuyenda eenkopheni zakho.

⁵ Zithukulule njengetsephe kumzumi, nanjengenyoni esandleni somthiyi.

⁶ Yewuye ebutjhontjhwaneni vila ndina! Uqale iindlela zabo khona uzakuhlakanipha!

⁷ Ubutjhontjhwani abunamrholi, umtjhotjhozeli nombusi,

⁸ kodwana ehlobo buzibekela umphakwabo, bubuthelele ukudla kwabo nakuvunwako.

⁹ Uzokurabhalala lapho bekube nini vila ndina? Uzokuvuka nini ebuthongweni bakhobo?

¹⁰ Uyalalalala, uyendayende, usongasonge izandla uphumule,

¹¹ ngalokho ubuchaka buzakubhudungela njengesela, nokweswela njengendoda ehlomileko.

¹² Isibhidlamnyanya esonakaleko sikhamba sikhuluma ikohliso,

¹³ sincinze amehlo, sikhombise ngenyawo nangemino;

¹⁴ sinomkhumbulo ophambeneko, silumba amano wokulimaza, sihlala sicabanisa.

¹⁵ Ngalokho uzakwehlelwa yihlekelele msinyana, ubhujiswe ngokuphazima kwelihlo, kungabi nantatha.

¹⁶ Kunezinto ezisithandathu ezizondwa nguSomnini, iye, ezilikhomba ezisinyenyiso kuye:

¹⁷ amehlo aziphakamisako, ilimu elileya amala, izandla eziphalaza iingazi ezimsulwa,

¹⁸ ihliziyo elumba amano wokonakala, iinyawo ezirhaba ukugijimela ebumbini,

¹⁹ ufakazi wekohliso ophafuza amanga nomuntu ocabanisako hlangana nabafo.

Isiyeleliso ekuhlobongeni

²⁰ Ndodanami, bulunga umyalo kayihlo, ungalahli ifundiso kanyoko.

²¹ Kubophelele ehliziywenakho mlibe, ukuthekeleze entanyenakho.

²² Nawukhambako, kuzakuhlahla; nawulalako, kukweluse; nawuvukako, kukukhulumise.

²³ Mbala umyalo usibani; ifundiso imukhanyo. Ukusolwa ngemiyalo kuyindlela yokuphila,

²⁴ ukuze ulondeke emfazini owonakeleko, iye, elimini elibutjhelelezi lesihlobongi.

²⁵ Ungakhanuki ubuhle baso ehliziywenakho, ungavumi bona sikuwunge ngeenkophe zaso,

²⁶ ngombana ikokhelo yengwadla sisikwa esindulungu, kodwana umfazi wenye indoda uyingozi epilwenakho eligugu.

²⁷ Indoda ingathwala umlilo ngesifuba, kodwana izambatho zayo zingatjhi na?

²⁸ Indoda ingakhamba phezu kwamalahle avuthako, kodwana ingatjhi iinyawo na?

²⁹ Unjalo-ke umuntu olalana nomfazi wenye indoda, akunamuntu ongathinta umfazi loyo angahlunguphazwa.

³⁰ Abantu abalideleli isela eleba ukuze lizisuthise ngoba lilambile.

³¹ Nakube liyabanjwa lizakukhokha ngokubuyelelwe kalikhomba belinikele ngayo yoke ipahla yekumbalo.

³² Kodwana umuntu ohlobongako, uswela ingqondo; owenza njalo uyazibhubhisa.

³³ Uzakufumana amaduma nehlazo, ukuhlaziseka kwakhe angeze kwasulwa.

³⁴ Mbala isikhwele sivusa itukuthelo yendoda, angeze yaba nomusa mhlana izibuyiselelako.

³⁵ Angeze yamukela ihlawulo, angeze yavuma ukufunjathiswa, ngitjho nanyana kungaba ngokungangani.