IZAGA 5 - IsiNdebele 2012 Translation

¹ Ndodanami, lalelisisa ukuhlakanipha kwami, ubeke indlebakho elemukweni lami,

² ukuze ulonde ingqondo ehle neembhena zakho zimumathe ilwazi.

³ Yelela, iimbhena zakanondindwa ziwuluka iliju norhwalabhakhe ubutjhelelezi ukudlula amafutha.

⁴ Kodwana ekugcineni unondindwa loyo ubaba njengomrhalagani, ubukhali ukudlula isabula ebukhali mahlangothi woke.

⁵ Iinyawo zakhe zehlela ekufeni, amagadangwakhe atjhinga endaweni yabafileko.

⁶ Ugobanisa imizilakhe ukuze akulahlekise emtlhaleni wokuphila, wena angeze wakwazi lokho.

⁷ Nje-ke ndodanami, yewungilalele; ungaphambuki emezwini womlomami!

⁸ Khambela kude naye, ungatjhideli esangweni lekumbakhe,

⁹ ukuze ungazehlisi isithunzi kabanye nejamo lakho ngomfazi osihlola,

¹⁰ iye, nemiqhamuka ingazisuthisi ngelifa lakho, bese imijulukwakho iphelele ekumbeni yomfazi otjhili.

¹¹ Ekupheleni usale ungasenanto, uqume lokha nasele umzimbakho ukhehlile,

¹² uzakuthi: “Maye, ngazonda ukusolwa! Ihliziywami yanyaza ukukhalinywa!

¹³ Akhange ngilalele abafundisi, nanyana ngibeke indlebe ebelulekini bami.

¹⁴ Ngipheze ngabhujiswa nya ehlanganweni nemphakathini.”

¹⁵ Sela amanzi emphathamanzinakho, uzikholise ngomthombakho ogelezako.

¹⁶ Kumele imithombakho iphuphumele ngaphandle nemiselakho eendledlaneni na?

¹⁷ Akube ngokwakho wedwa, ungakwabelani nemiqhamuka.

¹⁸ Asibusiswe isiyalu sakho, uthokoze emfazini wobutjha bakho,

¹⁹ ihlangukazimataka ethandekako, iye, imbuzikazi yeentaba! Inga amabelakhe angakwanelisa soke isikhathi, uhlanyiswe lithando lakhe njalo.

²⁰ Ndodanami, kubayini uhlanyiswe ngunondindwa? Kubayini ugone isifuba sesihlobongi na?

²¹ Mbala iindlela zomuntu zisemtarini phambi kwakaSomnini. Yena uhlolisisa yoke imizilakhe.

²² Isikhohlakali sibanjwa macalaso, iinkawule zesono saso zisibambe tli.

²³ Sifa ngokuswela ukuzibamba ngombana sibhaduzeliswa budlhayelakazi baso.