IZAGA 4 - IsiNdebele 2012 Translation

Iseluleko sababelethi

¹ Bantwana, lalelani ukuyala kwakababa, niyelele ilwazi lokuzwisisa,

² ngombana ngininikela umqondo omuhle; ngalokho ningalahli ifundiswami.

³ Lokha nangisese msana kababa, ngisese manzi ngiyithorwana kamma,

⁴ ubaba wangifundisa wathi kimi: “Ihliziywakho ayibambisise amezwami. Nawulonda imiyalwami, uzakuphila.

⁵ Nawuzuza ubuhlakani, uzakufumana ilwazi. Ungakhohlwa begodu ungaphambuki emezwini womlomami.

⁶ Nawungalahli ukuhlakanipha, kuzakulonda; nawukuthandako, kuzakubulunga ipilwakho.

⁷ Ukuthoma kokuhlakanipha ngilokhu: Zuza ubuhlakani nangepahlakho yoke zuza ilwazi.

⁸ Nawuphatha kuhle ubuhlakani, buzakuphakamisa, buzakudumisa nawubugonako.

⁹ Buzakwethwesa umbhode wokufaneza, bukunikele isihlohlo sedumo.”

¹⁰ Lalela ndodanami, nawamukela amezwami, uzakwengezelelelwa iminyaka yokuphila.

¹¹ Ngakufundisa indlela yokuhlakanipha, ngakurholela emizileni elungileko.

¹² Nawukhamba kiyo, angeze wathikamezeka, nalokha nawugijimako, angeze wakhutjwa.

¹³ Bambelela ekuyalweni, ungakulisi, kweluse ngombana kukuphila kwakho.

¹⁴ Ungakhambi emzileni wabakhohlakeleko, ungabeki inyawo endleleni yabambi.

¹⁵ Icwaye, ungakhambi kiyo; deda kiyo uhlabele phambili.

¹⁶ Abambi abalali bangakenzi okumbi; ubuthongo abehli bangakakhubazi umuntu.

¹⁷ Iye, bagoma isikwa sobukhohlakali, basele iwayini lenturhu.

¹⁸ Umzila wabalungileko ufana nomkhanyo welanga: Ukusukela ekuphumeni kwalo, umkhanyo lo ukhanya ukuya ngokuya bekube semini.

¹⁹ Kodwana indlela yabakhohlakeleko, ibumnyama obuphathekako, abazi bona bakhutjwa yini.

²⁰ Ndodanami, lalela amezwami; ubeke indlebakho kilokho engikutjhoko.

²¹ Ungavumi kusuke emehlwenakho; kulonde ngehliziywenakho,

²² ngombana kuyipilo kabakufunyanako, nokuphiliswa komzimba woke.

²³ Kikho koke okulondako, yelusa khulu ihliziywakho, ngombana imuthombo wokuphila.

²⁴ Susa ikulumo yokonakala kuwe nokuphambana kweembhena kube kude nawe.

²⁵ Amehlwakho akaqale phambili, ukugolozela kwakho kube phambi kwakho.

²⁶ Utjheje umzila walapha ugadanga khona, ngalokho iindlela zakho zizakunqopha.

²⁷ Ungaphambukeli ngesigomeni namkha ngesinceleni, susa inyawo lakho ebumbini.