IZAGA 31 - IsiNdebele 2012 Translation

Imiyalo kanina kaLemuweli

¹ Lawa mamezwi uLemuweli ikosi yeMasa awafundiswa ngunina.

² “Lalela msanami! Lalela ndodana engiyibelethileko! Lalela ndodana yeemfungo zami!

³ Ungaziqedi ngabafazi, amandlakho aphelele kababhubhisa amakhosi.

⁴ “Akusikho kwamakhosi, Lemuweli; akusikho kwamakhosi ukurhuqa iwayini, akusikho kwamakhosana ukomela utjwala.

⁵ Nakungasinjalo azakusela abe akhohlwe iimiso, aphambanise amalungelo wabo boke abagandelelweko.

⁶ Thatha utjwalobo ubunikele obhubhako newayini kilabo abamunyu emmoyeni;

⁷ abasele bakhohlwe ubuchaka babo, bangasakhumbula isizi labo.

⁸ “Khulumela abangakwaziko ukuzikhulumela, iye, labo abathintwe ziingameko.

⁹ Khuluma bewugwebe ngeqiniso, jamela amalungelo wochakileko nodududu.”

Isiphetho: Umfazi okhutheleko

¹⁰ Ngubani ongafumana umfazi onezandla? Inani lakhe lidlula amaparele.

¹¹ Indodakhe imethemba ngokuzeleko; ayisweli inzuzo.

¹² Ipilwakhe yoke wenzela indodakhe okuhle, ingasi okumbi.

¹³ Ukhetha iwulu nelineni, asebenze ngezandla ezivumako.

¹⁴ Ufana nemikhumbi yabarhwebi evela khatjhana imlethele okugonywako.

¹⁵ Uvuka ngesamarimarima, alungisele umndenakhe ukugoma, abele neencekukazi zakhe imisebenzazo.

¹⁶ Uyacabangisisa, athenge isimu, ngesithelo sezandla zakhe utjala isidiribe.

¹⁷ Ulungele ukwenza nanyana ngimuphi umsebenzi, iingalo zakhe ziqinile emsebenzinakhe.

¹⁸ Uyalemuka bona ukurhweba kwakhe kunenzuzo, nje-ke isibani sakhe asicimi ebusuku.

¹⁹ Uthatha iwulu kobana eluke, ngesandla sakhe uphotha iintambo.

²⁰ Abachakileko ubavulela izandla, azilulele abadududu.

²¹ Nakukhithika iliqhwa, akesabi litho ngomndenakhe; ngombana boke ubembese ezitlerebede.

²² Wenzela umbhedakhe amatjhila, wembatha izambatho ezimhlophe zelineni nezibubende.

²³ Indodakhe iyahlonitjhwa ebandla lokha nayihlezi hlangana nabaphathi bendawo.

²⁴ Wenza izambatho zangaphakathi bese uyazithengisa, anikele abathengi imikhungo yokuthekeleza.

²⁵ Wembathiswe amandla nesithunzi, akesabi litho ngelikusasa.

²⁶ Ukhuluma ngokuhlakanipha, nomyalo othembekileko uselimini lakhe.

²⁷ Utjheja iindaba zomzakhe, akagomi isikwa sobuvila.

²⁸ Abantwabakhe nabavukako bayamthokoza; nendodakhe yenza njalo begodu iyambuka ithi:

²⁹ “Banengi abafazi abanezandla, kodwana wena mkami, ubadlula boke.”

³⁰ Ukuthandeka kuyikohliso, nobuhle bulilize, kodwana umfazi owesaba uSomnini ufanele ukudunyiswa.

³¹ Mnikeleni umvuzo wezandla zakhe, kuthi imisebenzakhe imdumise esangweni ledorobho.