IZAGA 30 - IsiNdebele 2012 Translation

Isitjho saka-Aguri

¹ Amezwi ka-Aguri, umsa kaJakhe Umlayezwakhe Isitjho sendoda le sithi: “Ngiphele amandla, Zimu! Iye, ngiphele amandla! Ngiphelelwe!

² Mbala, ngisiyila ukudlula boke; anginakho ukuzwisisa komuntu.

³ Azange ngifunde ukuhlakanipha, azange ngibe nelwazi loCwengileko.

⁴ Ngubani owakhe wenyukela ezulwini godu wabuya? Ngubani owabuthelela ummoya etendeni yezandla zakhe? Ngubani ogubuzese amanzi ngengubakhe? Ngubani odzimelelise amagumbi wephasi? Ngubani ibizo lakhe nebizo lendodanakhe? Yewungitjele nakube uyazi!”

Ipendulo ku-Aguri

⁵ Elinye nelinye ilizwi lakaZimu licwebile, usihlangu salabo ababalekela kuye.

⁶ Ungangezeleli emazwinakhe, nakungasinjalo uzakusola akukhombise bonyana umleyimanga.

Umthandazo womuntu obalekela kuZimu

⁷ Kunezinto ezimbili engizikhombela kuwe, Somnini; ungangigodleli zona nangisaphilako:

⁸ Dedisa ikohliso namanga kimi; ungangiphi ubuchaka namkha ubunjinga, kodwana ngipha kwaphela okwaneleko.

⁹ Nangingasutha khulu ngizakukhohlwa ngithi: “Konje phana ngubani uSomnini loyo?” Nangingaswela ngizakweba, ngokwenza njalo, ngihlambalaze ibizo lakaZimami.

Ezinye izaga

¹⁰ Ungakhulumi kumbi ngenceku kumniniyo, nakungasinjalo izakuthuka, ube semlandwini.

¹¹ Kunalabo abathuka aboyise, bangabusisi abonina.

¹² Kunalabo abazibona bamsulwa, kodwana babe bangakahlambuluki ekungcoleni kwabo.

¹³ Kunalabo abazitjhayako, bathwala iimpumulo.

¹⁴ Kunalabo abanamazinyo aziinsabula nemihlathabo imimikhwa, kobana barhiribidele abachakileko ephasini nabadududu hlangana nabantu.

¹⁵ Ikhalani linamadodakazi amabili, alila athi: “Sipha! Sipha!” Kunezinto ezintathu ezinganelisekiko, iye, ezine ezingakghoni ukuthi: “Sesanele!”

¹⁶ Zona ngilezi: indawo yabafileko, isibeletho esiyinyumba, inarha enganelisekiko ngamanzi nomlilo ongatjhoko uthi: “Nganele!”

¹⁷ Amehlo anyefula uyise, adelela ukulalela unina, azakugobolwa magubulu emmangweni, adliwe madlanga.

¹⁸ Kunezinto ezintathu ezisimanga kimi, iye, ezine engingazizwisisiko:

¹⁹ indlela yedlanga esibhakabhakeni, indlela yenyoka emadwaleni, indlela yomkhumbi phakathi kwelwandle nendlela yesokana entombini.

²⁰ Nasi indlela yesihlobongi: Siyagoma bese sizisula umlomo, sithi: “Akunanto embi engiyenzileko.”

²¹ Ngaphasi kwezinto ezintathu inarha iyahlengezela, iye, ezine eziyenza ingabambeleli:

²² inceku nayiba yikosi, iindlhadlha nazisuthako,

²³ umfazi osisaliwakazi emendweni nencekukazi esele ithathele umniniyo indawo.

²⁴ Kunezinto ephasinapha ezincani, kodwana zihlakaniphe ngokweqileko:

²⁵ Abonontsitsinyani balibutho elinganamandla, kodwana ehlobo bazilungiselela ukudla kwabo;

²⁶ iimbila zilibutho elinganamandla, kodwana zakha iinkhundlana zazo emadwaleni;

²⁷ isikhonyani asinakosi, kodwana sizihlela soke ngeenqhema;

²⁸ isibhadwa ungasibamba ngesandla, kodwana sitholakala nesigodlweni.

²⁹ Kunezinto ezintathu ezikhamba ngejamo, iye, ezine ezinamaqa anejamo:

³⁰ ibhubezi eliyikosi yeenyamazana elingahlehliswa lilitho;

³¹ mkukurumbu okhambela phezulu, ipongo nekosi ongekhe wajamelana nayo.

³² Nakube wenze ubudlhadlha, waziphakamisa, namkha nawutlame ubumbi, beka isandla emlonyenakho!

³³ Njengombana ukuphehla amakghamatha kuveza umlaza nokutlhorholoja ipumulo kuveza iingazi, kunjalo nokutlhorholoja ilaka kuveza ukucabana.