IZAGA 3 - IsiNdebele 2012 Translation

¹ Ndodanami, ungakhohlwa ifundiswami, kodwana ihliziywakho ayibulunge imiyalwami;

² Mbala izakwelula amalangakho iye, ingezelele iminyaka nokuthula kuwe.

³ Nawungatjhiyi ukwethembeka neqiniso, okutjho ukukubophelela entanyenakho, ukutlole emiqebethwini yehliziywakho,

⁴ uzakuzuza umusa, ubukwe nguZimu nabantu.

⁵ Themba uSomnini ngehliziywakho yoke, ungeyami ekwazini kwakho.

⁶ Nawazisa uSomnini kizo zoke iindlela zakho, yena uzakwenza imizilakho ilelezeke.

⁷ Ungaziboni inga uhlakaniphile emehlwenakho, yesaba uSomnini, utjhide ebumbini.

⁸ Lokhu kuzakuletha ipilo emzimbenakho, nokondleka emathanjenakho.

⁹ Nawuhlonipha uSomnini ngomnonwakho, iye, ngesilumo semikhiqizwakho yoke,

¹⁰ yena uzakuzalisa iinlulu zakho ngokwaneleko neembekelelo zakho ziphuphume ngesitjhidela sewayini.

¹¹ Ndodanami, ungadeleli ukusola kwakaSomnini, ungadinwa kukhalima kwakhe,

¹² ngombana uSomnini uyamkhalima amthandako, njengobaba endodanenakhe ayithandako.

¹³ Ubusisiwe umuntu ofunyana ubuhlakani, iye, umuntu ozuza ukuzwisisa,

¹⁴ ngombana ingcono inzuzo yakhona kuneyesiliva, iye, imbuyiselo yakhona kuneyegolide.

¹⁵ Kuligugu ukudlula amaparele; mbala akunalitho olifisako elingafana nakho.

¹⁶ Ipilo ede ingesigomeni sakanokwazi, ngesinceleni sakhe kunomnono nedumo.

¹⁷ Iindlela zakhe ngezithokozisako, nemizilakhe ikuthula.

¹⁸ Umumuthi wokuphila kilabo abamamukelako, abanamathela kuye bazakubizwa bona ngabathakasileko.

¹⁹ USomnini wendlale iinsekelo zephasi ngobuhlakani, wanzinzisa amazulu ngokuzwisisa,

²⁰ ngelwazi lakhe amanzi agobhoza, umkayi wathontisa umbethe.

²¹ Ndodanami, bulunga ubuhlakani nokuhlolisisa, ungavumi kusuke emehlwenakho,

²² kuzakuba kuphila emphefumulwenakho, kube mkghabiso entanyenakho.

²³ Yeke uzakukhamba endlelenakho uphephile, nenyawo lakho angeze lakhutjwa.

²⁴ Lokha nawuyokulala, angeze wesaba, iye, nawuleleko, uzakuba nobuthongo obumnandi.

²⁵ Ungabi nevalo ngehlekelele yamsinya nangamatshwenyeko lokha nehlela abakhohlakeleko,

²⁶ ngombana uSomnini uzakuba seqadi kwakho, alonde inyawo lakho ekubanjweni sisifu.

²⁷ Ungathi nawunamandla wokwenza okuhle, ubagodlele labo okufanele ubenzele.

²⁸ Ungathi komunye umuntu: “Khamba, ubuye kusasa, ngizakupha”, khisibe unakho lokho akukhombelako.

²⁹ Ungeluki amano wokulimaza omunye umuntu ohlezi nawe ngokukwethemba.

³⁰ Ungasoli umuntu ngaphandle kwesizathu khisibe akakakoni ngalitho.

³¹ Ungafisi ipumelelo yomuntu onenturhu, ungakhethi nayinye yeendlela zakhe,

³² ngombana uSomnini uyamnyenya ophambukela kizo, kodwana unesikhozi nabaqotho.

³³ Isithuweleliso sakaSomnini siphezu kwekumba yokhohlakeleko, kodwana ubusisa ihlalo yabalungileko.

³⁴ Yena unyefula iinyefuli, abazithobileko abaphe umusa.

³⁵ Abahlakaniphileko bazuza idumo, kodwana iindlhadlha zizandisela ihlazo.