IZAGA 29 - IsiNdebele 2012 Translation

¹ Umuntu okhunyalala ngekani ngemva kokusolwa, uzakutjhabalaliswa msinyana, angabi nentatha.

² Abalungileko nabandako, abantu bayathaba; kodwana nakubusa isikhohlakali, abantu bayabubula.

³ Othanda ukuhlakanipha, ulethela uyise itokozo, kodwana umngani weengwadla uchitha umnono.

⁴ Ngokulunga ikosi inikela inarha idzimelelo, kodwana ethanda iimbiko iyayilulaza.

⁵ Umuntu oyenga umakhelwanakhe, uzibekela isithiyo senede eenyaweni zakhe.

⁶ Kunesithiyo esiphambekweni sesikhohlakali, kodwana olungileko uyabhina, athokoze.

⁷ Olungileko ukhambisana nokuphathwa kuhle kwabachakileko, kodwana okhohlakeleko akanakho ukuyelela okunjalo.

⁸ Iinyefuli ziphehla idorobho, kodwana abahlakaniphileko barhobhisa ilaka.

⁹ Ohlakaniphileko naya ebandla nesidlhadlha, siyadlharuma, senze amahlaya, kungabi nokuthula.

¹⁰ Abanukelwa ziingazi bazonda omsulwa, kodwana abaqotho bahlenga ipilwakhe.

¹¹ Isidlhadlha sigugeka khulu ngemizwaso, kodwana ohlakaniphileko uyasidambisa.

¹² Lokha umbusi nalalela amanga, zoke iinkhulu zakhe ziba ziinkhohlakali.

¹³ Isichaka nombolekisi bafana ngalokhu: USomnini ubaphe amehlo wokubona bobabili.

¹⁴ Ikosi egweba abachakileko ngeqiniso, isihlalo sayo sobukhosi sizakunzinziswa isikhathi soke.

¹⁵ Iswazi nokukhalima kupha ukuhlakanipha, kodwana umntwana ozilawulako uhlazisa unina.

¹⁶ Iinkhohlakali nazandako nesiphambeko siyanda, kodwana zizakuwa, abalungileko babukele.

¹⁷ Khalima umntwanakho, uzakunikela ukuthula iye, uzakuletha ithabo ehliziywenakho.

¹⁸ Lapha kunganambono khona, abantu abalawuleki, kodwana ubusisiwe ogcina umthetho.

¹⁹ Inceku ayikhalinywa ngamezwi nje kwaphela, nanyana izwisisa, angeze yalalela.

²⁰ Ukhe wambona umuntu okhuluma angacabangi na? Kunethemba elikhulu ngesidlhadlha kunaye.

²¹ Umuntu natotosa inceku ebutjheni bayo, ekugcineni izakuragalala.

²² Umuntu othukutheleko uvusa ukucabana, nosififana ubanga iimphambeko ezinengi.

²³ Ukuziphakamisa komuntu kuyamehlisa, kodwana onommoya ophasi uzuza idumo.

²⁴ Ohlanganyela nesela uzonda ipilwakhe: Uzwa abaphathi bakhuluma amanikelela, kodwana akanikeli ngelwazi.

²⁵ Ukwesaba umuntu kusisifu, kodwana othembela kuSomnini uyaphepha.

²⁶ Abanengi bafuna umusa wombusi, kodwana ukulunga kufunyaneka kuSomnini kwaphela.

²⁷ Abangakathembeki basinyenyiso kabalungileko; abaqotho basinyenyiso kabakhohlakeleko.