IZAGA 28 - IsiNdebele 2012 Translation

¹ Okhohlakeleko ubaleka nanyana kungekho omgijimisako, kodwana abalungileko banesibindi njengebhubezi.

² Ilizwe nalinokuvukelana, vane linababusi abanengi, kodwana onengqondo nelwazi wenza kube nokuthula.

³ Ochakileko nagandelela abachakileko, ufana nezulu elirhurhula litjhiye kungasenasivuno.

⁴ Abalahla umthetho badumisa iinkhohlakali, kodwana abawugcinako balwisana nazo.

⁵ Abantu abonakeleko abakuzwisisi ukulunga, kodwana abafuna uSomnini bakuzwisisa ngokupheleleko.

⁶ Singcono isichaka esineendlela ezimsulwa kunenjinga eneendlela ezikhohlakeleko.

⁷ Ogcina umthetho mntwana ozwisisako, kodwana umkhozi wamahlongandlebe uhlazisa uyise.

⁸ Owandisa umnonwakhe ngenzalo ehlukahlukeneko, uyibuthela omunye ozakuba nomusa kabachakileko.

⁹ Ofulatheza indlebakhe kobana angezwa umthetho, ngitjho nemithandazwakhe isinyenyiso.

¹⁰ Orholela abaqotho eendleleni zobukhohlakali, uzakurhohlomela ngemgodini azenzele wona, kodwana abamsulwa bazakufumana ilifa elihle.

¹¹ Injinga ingazitjela bona ihlakaniphile, kodwana isichaka esinokuzwisisa sibona amaqhingayo.

¹² Abalungileko lokha nabajekezelako, kuba nedumo elikhulu, kodwana abakhohlakeleko nababa barholi, abantu bayabhaca.

¹³ Ofihla iimphambeko zakhe akaphumeleli, kodwana ozivumako abe azitjhiye ufunyana isirhawu.

¹⁴ Ubusisiwe umuntu ohlala esaba uSomnini njalo, kodwana oqinisa ihliziywakhe uwela engozini.

¹⁵ Njengebhubezi elibhodlako namkha ibhere elibhozomelako, unjalo nokhohlakeleko nabusa phezu kwabadududu.

¹⁶ Umbusi onganangqondo udlondlobala ngokususa abantu elifeni labo, kodwana ozonda inzuzo engakalungi uzakwandisa amalangakhe.

¹⁷ Umuntu owurubajwa sisazela sokubulala, uzakuhlala abalekela ethuneni; akungabi nomuntu omvimbako.

¹⁸ Onekambo emsulwa uyaphepha, kodwana oneendlela zokonakala uzakuwa msinyana.

¹⁹ Otjheja amasimakhe uzakuba nenala, kodwana ogijimisana nelize uzakuba nobuchaka.

²⁰ Othembakeleko uzakuba neembusiso ezinengi, kodwana opharhazela kobana anjinge, uzakuhlunguphazwa.

²¹ Akusikuhle ukukhetha ubuso ekugwebeni, kodwana umuntu uyaphambuka ukuze afumane igedzwana lesikwa.

²² Umuntu odimanako upharhazela bona anjinge, kodwana akayeleli bonyana ubuchaka bumlindele.

²³ Osola umuntu, ekugcineni uzakufumana umusa ukudlula loyo onelimu elibutjhelelezi.

²⁴ Odlelezela uyise nanyana unina bese athi, “Akusiso isiphambeko lokho”, umukhozi waloyo obhubhisako.

²⁵ Umuntu omarhamaru uvusa ukucabana, kodwana othembela kuSomnini uzakunotha.

²⁶ Othembela ekwazini kwakhe usidlhadlha, kodwana okhamba ngokuhlakanipha uyaphepha.

²⁷ Opha abachakileko, angeze aswela litho, kodwana obadima amehlo ufumana amanikelela amanengi.

²⁸ Iinkhohlakali naziba barholi, abantu bayabhaca; kodwana nazibhubhako, abalungileko bayanda.