IZAGA 27 - IsiNdebele 2012 Translation

¹ Ungazikhakhazisi ngengomuso ngombana awukwazi kwamhlokho.

² Akube ngomunye okudumisako, ungazidumisi wena; iye, kube ngotjhili, kungabi mlomakho.

³ Ilitje libudisi netjhwabatjhwaba imuthwalo, kodwana ukukholwa sidlhadlha kubudisi ukudlula kokubili.

⁴ Ilaka lililunya nokusilingeka kusikhukhula, kodwana ngubani ongajamelana nesikhwele?

⁵ Kungcono ukusola okusemtarini kunethando langemsitheleni.

⁶ Amanceba owavezwa mngani ayamukeleka, kodwana ukumangwa sisitha akuthembisi.

⁷ Osuthiko unyelisa isihlaka seliju, kodwana kolambileko nokumunyu kuyanandipha.

⁸ Njengenyoni etjhiya indlwanayo, unjalo umuntu ohlamuka ikhaya lakhe.

⁹ Amakha netjhwalo kuletha ithabo ehliziyweni, kunjalo nokuthandeka komngani; kungokwezeluleko zehliziyo.

¹⁰ Ungamlahli umnganakho nomngani kayihlo, ungabalekeli kwamfowenu nawehlelwa yihlekelele, kungcono umakhelwana oseduze kunomfo okhatjhana.

¹¹ Hlakanipha mntwanami, ulethele ihliziywami ukwenama; ngizakwazi ukuphendula woke umuntu onginyazako.

¹² Ovuthiweko nabona ingozi uyabhaca, kodwana abanganalwazi bayaragalala, bahlupheke.

¹³ Thatha ingubo yowenzela umqhamuka isibambiso, iye, ithathe ngombana ujamele unondindwa.

¹⁴ Obingelela umakhelwanakhe ngamasa arhuwelela, kuzakuthathwa bonyana sithuweleliso.

¹⁵ Umfazi obalabalako, ufana nephahla elinethosi nakuna izulu;

¹⁶ ukumvala sekufana nokuvala ummoya namkha ukubamba amafutha we-oliva ngesidla.

¹⁷ Njengesimbi nayilola enye, nomuntu ulola omunye.

¹⁸ Onakekela umuthi wamakhiwani, ugoma iinthelo zawo notjheja umphathakhe uzakudunyiswa.

¹⁹ Njengamanzi nabonisa ubuso, injalo nehliziyo, ibonisa ubunjalo bomuntu.

²⁰ Indawo yabafileko neyokubhujiswa ayaneliseki, anjalo namehlo womuntu.

²¹ Isincibilikiseli senzelwa isiliva, ikehla yomlilo ingeyegolide nomuntu uhlolwa ngedumo elimfaneleko.

²² Nanyana isidlhadlha ungasigiga ngesigigweni, iye, ngesigigo hlangana namakariya, angeze wabususa ubudlhadlha baso kiso.

²³ Qinisekisa bonyana wazi ubujamo bezimvu zakho, ubeke ihliziywakho emhlambinakho

²⁴ ngombana umnono awubambeleli, nesihlohlo angeze saphepha iinzukulwana ngeenzukulwana.

²⁵ Nakususwa utjani bese kuvela obutjha, kubuthwe nefuru eentabeni,

²⁶ amaqamana azakupha kokwembatha, neembuzi zikuphe inani lenarha.

²⁷ Ube nebisi elaneleko leembuzi, ukuzondla wena nomndenakho kanye neencekukazi zakho.