IZAGA 26 - IsiNdebele 2012 Translation

¹ Njengeliqhwa ehlobo namkha izulu nakuvunwako, linjalo nedumo alifaneli isidlhadlha.

² Njengomrwibili nawuphaphako namkha ikonjani ezulazulako, sinjalo nesithuweleliso esinganasizathu, asenzeki.

³ Isibebhu ngesenjomani, itomu ngelakadumbana neswazi ngelomhlana weendlhadlha!

⁴ Nawungaphenduli isidlhadlha ngobudlhadlha baso, sithatha bona nawe ufana naso.

⁵ Nawuphendula isidlhadlha ngobudlhadlha baso, sithatha bona sihlakaniphile.

⁶ Othumela umlayezo ngesidlhadlha uzibandakanya enturhwini; ufana noziqunta iinyawo.

⁷ Njengemilenze elembeleleko yorholopheleko, sinjalo nesaga emlonyeni weendlhadlha!

⁸ Njengokubophelela ilitje esarwayini, kunjalo nokuhlonipha isidlhadlha.

⁹ Njengeliva elihlabe isidakwa esandleni, sinjalo nesaga emlonyeni weendlhadlha!

¹⁰ Njengomdumuzi womsebe olimaza angakhethi, unjalo nomuntu oqatjha isidlhadlha namkha abadlulingendlela.

¹¹ Njengenja ebuyela emahlanzwenayo, sinjalo nesidlhadlha esibuyela ebudlhayeleni baso.

¹² Ukhe wabona umuntu othatha bona uhlakaniphile na? Kunethemba elikhulu ngesidlhadlha kunaye.

¹³ Ivila lithi: “Kunebhubezi ngaphandlapha, iye, kunengwenyama eendledlaneni!”

¹⁴ Njengomnyango ojika ngeenkhonkwani zawo, linjalo nevila lijikajika embhedenalo.

¹⁵ Ivila lifaka isandla ngesitjeni linghwathe, kodwana livilaphe ukusisa emlonyeni!

¹⁶ Ivila lizitjela bona lihlakaniphile kunabantu abalikhomba abaphendula ngokuhlolisisa.

¹⁷ Njengomuntu obamba inja ekhwabithako ngeendlebe, unjalo nozifaka ekucabaneni okungakamfaneli.

¹⁸ Njengehlanya elidumuza imisubela evuthako, iye, imisubela eyingozi,

¹⁹ unjalo nomuntu okhohlisa wekhabo bese athi: “Awa bese ngizidlalela!”

²⁰ Ngaphandle kweenkuni, umlilo uyacima; ngaphandle kwehlebo, ukucabana kuyaphela.

²¹ Njengeensahlela ezivuthisa amalahle, nanjengeenkuni emlilweni; unjalo nomuntu othanda ukucabana, uphemba ipikiswano.

²² Amezwi wokuhleba afana neenkhanakhana, ehla ngesiphundu emuntwini.

²³ Njengokutshidzwa komjeka okumanyako, injalo nekulumo yokugugeka esithwe yihliziyo embi.

²⁴ Isitha sizifihla ngekulumo, khibe ngehliziywenaso sifukamele ikohliso.

²⁵ Nanyana ikulumaso iyenga, ungasikholwa ngombana ehliziywenaso kuzele ukuphelela kweenyenyiso.

²⁶ Izondwaso singayembesa ngokuzenzisa, kodwana ubukhohlakali baso buzakwembulwa ebandla.

²⁷ Owemba umgodi, uzakurhohlomela ngakiwo; nogeda ilitje, lizakuhlehlela phezu kwakhe.

²⁸ Ilimu elinamanga lizonda elibalimazako, nomlomo obutjhelelezi ubanga ihlekelele.