IZAGA 25 - IsiNdebele 2012 Translation

Ezinye izaga zakaSolomoni

¹ Nanzi ezinye izaga zakaSolomoni ezakhuphelwa ziinkhulu zakaHezekhiya ikosi yakwaJuda:

² Kulidumo lakaZimu ukusitheka kwento, kodwana kulidumo lamakhosi ukuhlolisisa ifihlakalo.

³ Njengombana izulu liphakamile nephasi lizikile, zinjalo neenhliziyo zamakhosi: Azihlolisiseki.

⁴ Nawususa amanyela esiliveni elincithikiswako, khona-ke usosino uzakukhanda isitja;

⁵ nawususa isikhohlakali phambi kwekosi, isihlalo sayo sobukhosi sizakunzinziswa ngokulunga.

⁶ Ungaziphakamisi nawuphambi kwekosi, godu ungazibeki phambili nawusebantwini abakhulu;

⁷ kungcono kube yikosi ethi kuwe: “Yewenyukele lapha”, kunokobana wehliswe phambi kwesikhulu. Okubone ngamehlwakho,

⁸ ungarhabi ukuse ebandla ngombana uzakuthini ekugcineni nasele umuntu wekhenu akurhubutjha?

⁹ Nawubanga umlandu nomuntu wekhenu ungembuli ifihlo yomunye umuntu;

¹⁰ nakungasinjalo okuzwileko uzakuhlazisa, nezwabatjho ngawe asoze yaphela.

¹¹ Ilizwi elikhulunywe ngesikhathi esifaneleko lifana namahabhula wegolide akghabise esitjeni sesiliva.

¹² Njengesali legolide namkha umkghabiso wegolidembala, kunjalo nokusola kohlakaniphileko endlebeni ezwako.

¹³ Njengokuqanda kweliqhwa ngesikhathi sokuvuna, sinjalo-ke nesithunywa esethembekileko kiloyo osithumileko; siqabula umphefumulo womniniso.

¹⁴ Njengamafu wekungu kanye nommoya onganazulu, unjalo nomuntu ozidumisa ngezipho azigodlileko.

¹⁵ Ngokubekezela, umrholi uyancengeka nelimu elithambileko lingephula ithambo.

¹⁶ Nawufumana iliju, ligome ngokulingeneko; nakungasinjalo uzabhinjidelwa bese uyagonyuluka.

¹⁷ Ungaqheli ukuya ekumbeni kamakhelwana, uzakanye akusuthe bese uyakunina.

¹⁸ Njengesibhuku, isabula namkha umsubela obukhali, unjalo nomuntu ofakaza amanga ngomuntu wekhabo.

¹⁹ Njengezinyo elibuhlungu namkha inyawo elenyeleko, kunjalo nokwethembela kongakathembeki ngeenkhathi zobudisi.

²⁰ Njengomuntu ohlubula ingubo mhlana kumakhaza nanjengesibharha esithelwa esilondeni, unjalo nobhina iingoma ngomuntu osesizini.

²¹ Nakube isitha sakho silambile, siphe ukudla sigome; nakube somile, siphe amanzi sisele.

²² Ngokwenza njalo, uzabe inga udindela amalahle avuthako ehlokwaso, uSomnini uzakuvuza.

²³ Njengommoya wetlhagwini nawuletha umwuluko wezulu, nelimu elihlebako liletha ukuqalana kumbi.

²⁴ Kungcono ukuhlala ejikeni phezu kwephahla kunokuhlalisana nomfazi onenturhu.

²⁵ Njengamanzi aqandako emphinjeni owomileko, zinjalo neendaba ezimnandi ezivela khatjhana.

²⁶ Njengesiyalu esinedaka namkha umthombo ongcolisiweko, unjalo olungileko ohlehlela emuva phambi kweenkhohlakali.

²⁷ Akusikuhle ukugoma iliju ngokweqileko, kunjalo nokufuna idumo phezu kwedumo.

²⁸ Njengedorobho elinemithangala egirikileko, unjalo nomuntu ongakghoni ukuzibamba.