IZAGA 24 - IsiNdebele 2012 Translation

¹ Ungakhanukeli abantu abakhohlakeleko, ungafisi ukuhlanganyela nabo

² ngombana iinhliziyo zabo ziphehla inturhu, neembhena zabo zikhuluma umonakalo.

³ Indlu yakhiwa ngokuhlakanipha inzinziswe ngokuzwisisa;

⁴ ngelwazi amalawu wayo azaliswe ngomnotho oligugu nomuhle.

⁵ Ingorho ehlakaniphileko inamandla, kodwana umuntu onelwazi udlulele ngeenkhwepha.

⁶ Yeke, yilwa ipi ngamano iye, ukuphepha kuza ngabeluleki abanengi.

⁷ Ukuhlakanipha kuphakeme khulu esidlhayeleni; nakuhlangenwe ebandla asibi nalitho esingalitjho.

⁸ Ophemba ubumbi uzakwaziwa bona mgulukudu.

⁹ Iqhinga lesidlhadlha sisono nesinyefuli sisinyenyiso ebantwini.

¹⁰ Nawunyefako ngesikhathi sokubandezelwa, umkhawulo wamandlakho uyabonakala.

¹¹ Hlenga labo abadoselwa ekufeni, ukhandele abadzimelela banqombe ekubulaweni,

¹² ngombana nawuthi, “Qala akhange sazi litho ngalokhu”, nje-ke ohlola iinhliziyo, nguye ozakwazi iqiniso; iye, owelusa ipilwakho, nguye olaziko, uzakubuyiselela umuntu ngalokho akwenzileko.

¹³ Goma iliju mntwanami ngombana limnandi, iye, iliju lesihlaka liyanandipha kurhwalabhakho.

¹⁴ Yazi-ke bona nokuhlakanipha kunjalo emphefumulwenakho, nawukufumanako, uzakuba nengomuso, nethemba lakho angeze lafeleliswa.

¹⁵ Wena sikhohlakali ndina, ungalindeli ukudla idlelo lolungileko, ungasusi isikhundla sakhe sokuhlala

¹⁶ ngombana nanyana olungileko angawa kalikhomba, uyavuka azithathe, kodwana iinkhohlakali zona zizakuguqiswa yihlekelele.

¹⁷ Ungathabi ngokuwa kwesitha sakho, ihliziywakho ingajekezeli nasikhutjwako.

¹⁸ Nakungasinjalo, uSomnini uzakubona lokho kube kumbi emehlwenakhe, asuse itukuthelwakhe phezu kwaso.

¹⁹ Ungakhathazeki ngabenzi bobumbi, ungakhanukeli iinkhohlakali

²⁰ ngombana alikho ilingomuso kowenza okumbi nesibani seenkhohlakali siyacima.

²¹ Mntwanami, yesaba uSomnini, uhloniphe ikosakho, ungahlanganyeli nabahlubukako,

²² ngombana behlelwa yihlekelele msinyana. Ngubani owazi isizi elivela kuSomnini nekosi na?

Ezinye izitjho zabahlakaniphileko

²³ Nanzi godu ezinye izitjho zabahlakaniphileko: Akusikuhle ukukhetha ubuso ekugwebeni.

²⁴ Nanyana ngubani othi konomlandu, “Umsulwa wena”, umphakathi uzamthuwelelisa nabantu bamhlanuke;

²⁵ kodwana kilabo abakhalima onomlandu, kuzakuba kuhle kibo nesibusiso esinothileko sizakwehlela phezu kwabo.

²⁶ Ipendulo enqombileko ifana nokuncwangwa eembheneni.

²⁷ Ncama ngomsebenzakho wangaphandle, unake umsebenzi wamasimakho; ngemva kwalokho, wakhe ikumbakho.

²⁸ Ungafakazi ngomuntu wekhenu kunganasizathu. Kubayini iimbhena zakho zifafaze amanga?

²⁹ Ungathi: “Ngizamenza angenze sona; ngizazibuyiselela ngalokho angenze khona.”

³⁰ Ngidlule esimini yevila, ngadlula esidiribeni somuntu onganagqondo,

³¹ qala-ke, yoke indawo imile ikhula, iqulwani ivalwe mitjhatjhana nesibiyelo samatje sibhurukile.

³² Lokha nangiyelela lokho, ngazibuza, iye, nangibona lokho ngafunda isifundo:

³³ Uyalalalala, uyendayende, usongasonge izandla uphumule,

³⁴ ngalokho ubuchaka buzakubhudungela njengesela, nokweswela njengendoda ehlomileko.