IZAGA 23 - IsiNdebele 2012 Translation

¹ Lokha nawuhlala phasi bona ugome nombusi, tjheja khulu loyo ophambi kwakho.

² Bamba umphimbakho, nakube umumuntu okhaluzako.

³ Ungakhanukeli iinkhanakhana zakhe ngombana uzazikhupha isithunzi ngazo.

⁴ Ungatjhabatjhekeli ubunjinga, yiba nokuhlakanipha ukuze uzithibe.

⁵ Nawususa amehlwakho kibo, abuzukunyamalala na? Ngambala buzazenzela iimpiko ezinjengezedlanga, buphaphele esibhakabhakeni.

⁶ Ungagomi ukudla komuntu odimanako, ungakhanukeli iinkhanakhana zakhe;

⁷ ngombana uhlala acabanga ngeendleko. Unje-ke yena, uthi kuwe, “Goma usele!” kodwana khibe uyakutshima.

⁸ Uzakuhlanza ngitjho nokuncani okugomileko, ngalokho uzabe udlale ngamezwi amahle.

⁹ Ungakhulumi nesidlhadlha, ngombana sizakunyefula ubuhlakani bamezwakho.

¹⁰ Ungatjhidisi isikhonkhwani sekadeni, ungadlelezeli amasimu weentandani,

¹¹ ngombana uZimu umHlengazo unamandla; uzazimela emlandwini ophakathi kwakho nazo.

¹² Beka ihliziywakho ekuyalweni neendlebe zakho emazwini welwazi.

¹³ Ungalisi ukukhalima umntwanakho; akazukufa nawumnunga ngeswazi.

¹⁴ Wena nawumbetha ngeswazi, uzabe usindisa umphefumulwakhe ekufeni.

¹⁵ Mntwanami, nakube ihliziywakho ihlakaniphile, yeke nami ngizakujabula ehliziyweni.

¹⁶ Ilingaphakathi lami lizakujekezela, iimbhena zakho nazikhuluma okufaneleko.

¹⁷ Ihliziywakho ayingakhanuki beyiyengwe zizoni, kodwana hlala njalo wesaba uSomnini;

¹⁸ nje-ke uzakuba nengomuso nethemba lakho angeze lafeleliswa.

¹⁹ Lalela mntwanami, uhlakaniphe, ubeke ihliziywakho endleleni elungileko.

²⁰ Ungahlanganyeli nabarhuqa iwayini nabarhiribidela inyama.

²¹ Mbala iindakwa neenrhiribideli ziyachaka, ukuyenda kuzembathisa amanikiniki.

²² Lalela uyihlo owakubelethako, unganyazi unyoko nasele aluphele.

²³ Zuza iqiniso uligugudlhele, fumana ukuhlakanipha, ukuyalwa kanye nokuzwisisa.

²⁴ Uyise wolungileko unetokozo ekulu, obeletha ohlakaniphileko uyathokoza ngaye.

²⁵ Inga uyihlo nonyoko bangajekezela ngawe, iye, loyo okubelethileko uyajabula!

²⁶ Mntwanami, nginikela ihliziywakho, amehlwakho uwabeke eendleleni zami,

²⁷ ngombana ingwadla imugodi otjhingako wesifu, nonondindwa uyipetsi emkghotha.

²⁸ Nguye okhokhobela amadoda endleleni njengesigebengu, andise isibalo salawo angasathembekiko.

²⁹ Ngubani othi, “Maye!” nothi, “Wo!”? Ngubani onepikiswano? Ngubani oneenghonghoyilo? Ngubani obengakafanelwa maduma? Ngubani onamehlo abomvu?

³⁰ Ngilabo abalibele ngewayini, abanandipha ngemarhabheni wewayini eliwunyelweko!

³¹ Ungarhuduleli amehlo iwayini nalibomvu, lokha nalicwazimula ngesiqokweni, lehle butjhelelezi emphinjeni!

³² Ekugcineni liluma njengenyoka, lifakela isihlungu njengerabi.

³³ Amehlwakho azakubona imihlolo, nengqondwakho ihumuzele ngokuphambeneko.

³⁴ Uzazizwa inga ulele elwandle, iye, njengolele phezu kweentambo zomkhumbi.

³⁵ Bese uthi: “Ngiduliwe, nokho akhange ngizwe! Ngibethiwe, kodwana angazi bona kwenzeke nini! Kanti ngizakuqaquluka nini na? Ngifuna ukuyoqabula godu!”