IZAGA 22 - IsiNdebele 2012 Translation

¹ Ibizo elihle lithandeka khulu kunomnono omnengi; ukuhlonipheka kungcono kunesiliva negolide.

² Abanjingileko nabachakileko bafana ngalokhu: Boke njalo badalwe nguSomnini.

³ Ovuthiweko nabona ingozi uyabhaca, kodwana abanganalwazi bayaragalala, bahlupheke.

⁴ Umphumela wokuzithoba nokwesaba uSomnini uletha umnono, idumo nepilo.

⁵ Endleleni yokonakala kunameva nezifu, kodwana owelusa umphefumulwakhe uba kude nalokho.

⁶ Nawukhulisa umntwana ngendlela azakukhamba ngayo, nasele akhulile, angeze aphambuka kiyo.

⁷ Injinga ibusa phezu kweenchaka, nobolekako ulikhoboka lobolekisanako.

⁸ Otjala okuphambeneko, uvuna ihlekelele neswazi letukuthelwakhe lizakutjhabalaliswa.

⁹ Umuntu onesisa uzakubusiswa, ngombana ukugoma kwakhe ukwabelana nabadududu.

¹⁰ Nawuqotjha isinyefuli, kuphuma ukucabana, ukumangalelana nehlamba kuyaphela.

¹¹ Othanda ihliziyo emsulwa nonekulumo enezwelo, uzakuba mngani wekosi.

¹² Amehlo kaSomnini aqaphele ilwazi, uphambanisa amezwi wongathembekiko.

¹³ Ivila lithi: “Kunebhubezi ngaphandlapha! Ngizokubulawa eendledlaneni!”

¹⁴ Umlomo kanondindwa umugodi otjhingako wesifu, onikelelwe nguSomnini urhohlomela ngakiwo.

¹⁵ Ubudlhadlha bubotjhelelwe ehliziyweni yomntwana, kodwana iswazi lokuyala libutjhidisela kude naye.

¹⁶ Ogandelela ochakileko ngehloso yokwandisa umnonwakhe, nopha abanjingileko izipho, bobabili njalo bagcina bachakile.

Izaga zabahlakaniphileko

¹⁷ Yelela bese ulalela izitjho zabahlakaniphileko, beka ingqondwakho kengikufundisako,

¹⁸ ngombana kuzakarisa nawukubeka ehliziywenakho, kuhlale kulungiselelekile emlonyenakho.

¹⁹ Nawe ngikwazisa zona namhlanjesi ukuze ithemba lakho libe kuSomnini.

²⁰ Angithi ngikutlolele izitjho ezimatjhumi amathathu, iye, izitjho zokweluleka nokuhlakaniphisa,

²¹ bonyana zikufundise iqiniso namezwi wokwethembeka ukuze ube nependulo enqophileko kabakuthumileko.

²² Ungadlelezeli ochakileko ngombana umbona achakile begodu ungagadangeli odududu ebandla.

²³ Mbala uSomnini uzamumela onjalo emlandwini, adlelezele labo abamdlelezelako.

²⁴ Ungakhi ubungani nomuntu onehliziywana, ungazimanyanisi nomuntu orhaba ukuthukuthela,

²⁵ nakungasinjalo uzakufunda imikhubakhe, ufake ipilwakho engozini yesifu.

²⁶ Ungabi hlangana nabenze isibopho ngesiga sokuqhawulana, iye, labo abenza isithembiso malungana neenkolodo.

²⁷ Nakube awunalitho lokukhokha, kubayini omkolodako akuthathele umbhedakho uqalile na?

²⁸ Ungatjhidisi isikhonkhwani sekadeni esabekwa boyihlomkhulu.

²⁹ Uyambona umuntu onekghono emsebenzinakhe na? Nguye-ke ozakusebenza phambi kwamakhosi, akazukusebenza phambi kwabantukazana.