IZAGA 21 - IsiNdebele 2012 Translation

¹ Ihliziyo yekosi isesandleni sakaSomnini, uyinqophisa njengomsele wamanzi, ayise nanyana kukuphi lapha athanda khona.

² Zoke iindlela zomuntu zibonakala zizihle kuye, kodwana uSomnini uhlola ihliziyo.

³ Ukwenza okuhle nokulungileko, kwamukeleke khulu kuSomnini ukudlula imihlabelo.

⁴ Amehlo aziphakamisako nehliziyo ezigqajako kusisono esisibani seenkhohlakali!

⁵ Amaqhinga wokhutheleko aletha inzuzo, kodwana woke opharhazelako uletha ukuswela.

⁶ Umnono ofunyanwa ngelimu elinamanga, umrhwamuko onyelelako; abanjalo bazumana nokufa.

⁷ Inturhu yabakhohlakeleko iyabarhurhula, ngombana bala ukwenza okulungileko.

⁸ Indlela yonomlandu imagwegwe, kodwana omsulwa unezenzo ezilungileko.

⁹ Kungcono ukuhlala ejikeni phezu kwephahla kunokuhlalisana nomfazi onenturhu.

¹⁰ Umphimbo wokhohlakeleko ukhanukela ubumbi, umuntu wekhabo akafumani umusa kuye.

¹¹ Lokha isinyefuli nasihlawuliswako onganalwazi uzuza ukuhlakanipha; lokha umuntu ohlakaniphileko nayalwako uzuza ilwazi.

¹² USokulunga uyelela ikumba yokhohlakeleko; ahlakazele iinkhohlakali ehlekeleleni.

¹³ Ovala indlebakhe lokha nezwa ukulila kwesichaka, naye uzakulila kodwana angaphendulwa.

¹⁴ Isipho sangemsitheleni sidambisa itukuthelo, nokufunjathiswa okufihlwe ngesambatho kwehlisa ngitjho nelaka elikhulu.

¹⁵ Ukwenziwa kobulungiswa kulethela olungileko itokozo; kodwana kabaziingilamkhuba kuletha ukubhujiswa.

¹⁶ Umuntu odurha endleleni yokwazi uphumula hlangana nomkhambathi wabafileko.

¹⁷ Othanda ukuzithabisa uzakuswela, iye, othanda iwayini namafutha uzakuchaka.

¹⁸ Okhohlakeleko utlhaga esikhundleni solungileko, nongakathembeki esikhundleni soqotho.

¹⁹ Kungcono ukuhlala erhalawumbeni, kunokuhlala nomfazi onenturhu nobanga isizi.

²⁰ Emzini wohlakaniphileko kunamagugu akhethekileko namafutha, kodwana isidlhadlha sona sirhiribidela koke lokho.

²¹ Orhuluphela ukulunga kanye nokwethembeka uzuza ipilo, okuhle nedumo.

²² Ohlakaniphileko usahlela idorobho leenrhonga, agirize isiphephelo ezithembele kiso.

²³ Owelusa umlomakhe nelimu lakhe ulonda ipilwakhe ehlekeleleni.

²⁴ Osideleli nozitjhayako ubizwa bona “sinyefuli” ngombana uziphatha ngokuziphakamisa okukhulu.

²⁵ Isifiso sevila sizakuba kukufa kwaso ngombana izandla zaso azifuni ukusebenza.

²⁶ Selihlala lineemfiso ezingapheliko ilanga loke, kodwana olungileko unikela ngokungababaleli.

²⁷ Umhlabelo weenkhohlakali usinyenyiso, kangangani-ke nawulethwa ngehloso embi!

²⁸ Ufakazi wamanga uzakubhubha, kodwana ofakaza ngakuzwileko akazukuthuliswa.

²⁹ Okhohlakeleko uqinisa ubuso, kodwana oqotho uqinisa iindlela zakhe.

³⁰ Akunakuhlakanipha, ukuzwisisa neseluleko okuzakuphumelela ukujamelana noSomnini.

³¹ Injomani ilungiselelwa ilanga lepi, kodwana ukuhlula kungekwakaSomnini.