IZAGA 2 - IsiNdebele 2012 Translation

Ukuhlakanipha kunomvuzo omuhle wokuziphatha

¹ Ndodanami, nakube wamukela amezwami, ufihle imiyalwami ehliziywenakho,

² indlebakho ilalele ukuhlakanipha, welulele ihliziywakho ekuzwisiseni,

³ iye, lokha nawufisa ukwazi, urhuwelele ubize ukuzwisisa,

⁴ nakube lokho ukufuna njengesiliva, ukufunisise njengegugu elifihliweko,

⁵ khona-ke uzakuzwisisa ukwesaba uSomnini, bese ufumana ukumazi uZimu.

⁶ USomnini unikela ukuhlakanipha, emlonyenakhe kuvela ilwazi nokuzwisisa.

⁷ Ubekela abaqotho ipumelelo usihlangu kilabo abaneendlela ezimsulwa,

⁸ ubulunga imizila yokulunga, alonde indlela yabathembekileko bakhe.

⁹ Khona-ke uzakulemuka ukulunga, ubulungiswa nokuhleleka, iye, enye nenye indlela elungileko.

¹⁰ Mbala, ubuhlakani buzakungena ehliziywenakho, unandiphelwe lilwazi emphefumulwenakho.

¹¹ Ukuhlolisisa kuzakulonda nokuzwisisa kukubulunge,

¹² kukuhlenge endleleni yokonakala, iye, ebantwini abakhuluma okuphambeneko,

¹³ kilabo abaphambuka emizileni elungileko kobana bakhambe eendleleni zobumnyama,

¹⁴ bajabulele ukwenza okumbi, bathabe ngokuphambukela ebumbini;

¹⁵ labo iindlela zabo zimasongesonge, nemizilabo iyalahlekisa.

¹⁶ Ukuzwisisa kuzakuhlenga kunondindwa, iye, umfazi otjhili onelimu elibutjhelelezi,

¹⁷ otjhiye umlingani wobutjha bakhe, wakhohlwa isivumelwano sakhe noZimu.

¹⁸ Ikumbakhe yehlela ekufeni, nemizilakhe iya kabafileko.

¹⁹ Boke abaya kuye ababuyi, abasayifumani imizila yokuphila.

²⁰ Ngalokho khamba ngendlela yabalungileko, unamathele emizileni yabamsulwa.

²¹ Mbala, abaqotho bazakunzinza enarheni nabanganamlandu bahlale kiyo;

²² kodwana iinkhohlakali zizakujutjwa enarheni, nabangathembekiko basitjhulwe kiyo.