IZAGA 19 - IsiNdebele 2012 Translation

¹ Singcono isichaka esikhamba ngobuqotho kunomuntu onomlomo owonakeleko, osidlhadlha.

² Ukuba netjisakalo ngaphandle kwelwazi akusikuhle, nomuntu opharhazelako ulahla indlela.

³ Ubudlhadlha bomuntu buhlakaza indlelakhe, ngalokho ihliziywakhe ilwisana noSomnini.

⁴ Umnono uletha abangani abanengi, kodwana isichaka sifulathelwa bangani.

⁵ Ufakazi wamanga uzakuhlunguphazwa, nophafuza ikohliso akazukusinda.

⁶ Abanengi bafuna ukuthandwa sikhulu, woke umuntu umungani wophana ngezipho.

⁷ Boke abafo besichaka bayasigega, nakubangani baso babakude khulu naso. Nanyana sesilandelela umbiko, asifunyani litho!

⁸ Ozuza ubuhlakani, uthanda ipilwakhe nolonda ukuzwisisa ufumana okuhle.

⁹ Ufakazi wamanga uzakuhlunguphazwa, nophafuza ikohliso uzakubhubha.

¹⁰ Akusifaneli isidlhadlha ukunethezeka, kangangani-ke ikhoboka nakumele libuse amakhosana!

¹¹ Ohlakaniphileko ubuthaka ekusilingekeni, ukunganaki isikhubekiso kulidumo lakhe.

¹² Itukuthelo yekosi ifana nokubhodla kwebhubezi, kodwana umusayo ufana nombethe phezu kotjani.

¹³ Umntwana osidlhadlha uchakisa uyise, nomfazi obalabalako ufana nephahla elinethosi.

¹⁴ Ikumba nomnono kulilifa elibuya kubabelethi, kodwana umfazi ohlakaniphileko uvela kuSomnini.

¹⁵ Ubuvila bubangela ubuthongo obukhulu, nomuntu obharaleleko ubulawa yindlala.

¹⁶ Olalela imiyalo ulonda ipilwakhe, kodwana ongakhathali ngendlelakhe uzakufa.

¹⁷ Onomusa kochakileko, uboleka uSomnini, yeke uzamvuza ngalokho.

¹⁸ Khalima umntwanakho kusese nethemba, ungavumi bonyana akhambe endleleni yokufa.

¹⁹ Ovutha ngelaka kumele ahlawuliswe ngombana wamenyela kanye, uzakurhobelela.

²⁰ Lalela iseluleko bese wamukela ukusolwa ukuze ekugcineni uzuze ukuhlakanipha.

²¹ Manengi amaqhinga asehliziyweni yomuntu, kodwana ukuphumelela kwawo kusentandweni kaSomnini.

²² Ukuba marhamaru komuntu kulihlazo kuye, kungcono ukuba sichaka kunokuba namanga.

²³ Ukwesaba uSomnini kurholela ekuphileni; onjalo ulala anelisekile, angeze athintwa miraro.

²⁴ Ivila lifaka isandla ngesitjeni linghwathe, kodwana livilaphe ukusisa emlonyeni!

²⁵ Manya isinyefuli, ukuze onganalwazi abe ngovuthiweko; sola umuntu onengqondo, uzakuzuza ukuzwisisa.

²⁶ Onepehla kuyise, aqotjhe unina usihlola esiletha iinhloni nehlazo.

²⁷ Mntwanami, nawungasalaleli ukusolwa, uzakulahlekelwa mamezwi welwazi.

²⁸ Ufakazi okhohlakeleko unyefula ukulunga nomlomo wesonakali urhiribidela ubumbi.

²⁹ Isibetho senzelwe abanyefuli neswazi lenzelwe imihlana yeendlhadlha.