IZAGA 18 - IsiNdebele 2012 Translation

¹ Umuntu onganabuntu uzifunela kwakhe, ukhuluma kumbi ngabaphumelelako.

² Isidlhadlha asithandi ukuzwisisa, sizwana nokuveza imibonwaso.

³ Nakufika ubukhohlakali nokunyaza, kulapho ihlazo liletha khona ukurhubutjhwa.

⁴ Amezwi womlomo womuntu amamanzi azikileko nomthombo wokuhlakanipha umlanjana ogobhozako.

⁵ Akusikuhle ukukhetha ubuso kokhohlakeleko nokubekela eqadi omsulwa ekugwebeni.

⁶ Iimbhena zesidlhadlha zisifaka epikiswaneni nomlomaso usibangela ukubethwa.

⁷ Umlomo wesidlhadlha usichitho saso neembhena zaso zisisifu kiso.

⁸ Amezwi wohlebako afana neenkhanakhana, ehla ngesiphundu emuntwini.

⁹ Umuntu osidondi emsebenzinakhe, ungumfowabo lesibhidlamnyanya.

¹⁰ Ibizo lakaSomnini limubhotjhongo oqinileko, olungileko ubalekela kiwo angalalameleki.

¹¹ Umnono wonjingileko ulidorobho lobuphephelo kuye, ngokubona kwakhe uwuthatha inga mthangala ophakemeko.

¹² Ngaphambi kobana kwehle ihlekelele ihliziyo yomuntu inamagugwana, kodwana ukuzithoba kulandelwa lidumo.

¹³ Ophendula angakezwa, kubudlhadlha nehlazo kuye.

¹⁴ Umphefumulo womuntu uyamsekela nagulako, kodwana ngubani ongathwala umphefumulo oqobekileko?

¹⁵ Ihliziyo yonengqondo izuza ilwazi neendlebe zabahlakaniphileko zifuna ukuzwisisa.

¹⁶ Isipho sivulela ophako indlela, simrholela kabakhulu.

¹⁷ Obika indabakhe ntange ubonakala aseqinisweni bekufike lapha omunye amfaka khona imibuzo.

¹⁸ Ifumbe iqeda ipikiswano; ilamule iinrhonga.

¹⁹ Umfo okhubekileko ulikhuni kunedorobho elinemithangala, iye, ukucabana kufana nesiqabo sombhotjhongo.

²⁰ Isisu somuntu sisuthiswa sithelo somlomakhe, waneliswa mkhiqizo weembhena zakhe.

²¹ Ilimu linamandla wokuphila nokufa nabalithandako bazakugoma isithelo sakhona.

²² Ofumana umfazi ufumene isipho esihle begodu uzuza umusa kaSomnini.

²³ Isichaka sikhuluma ngokuncenga, kodwana injinga iphendula ngokukgharameja.

²⁴ Umuntu wabangani abanengi uyaphela, kodwana kunomngani wamambala osekela ngcono kunomfo.