IZAGA 17 - IsiNdebele 2012 Translation

¹ Kungcono ukudobhelela iintshutshuru, ube nokuthula, kunekumba ezele idili, kodwana khibe kunenturhu.

² Inceku ehlakaniphileko izakubusa phezu kwendodana enganasimilo, ihlanganyele ilifa njengomunye wabafo.

³ Isincibilikiseli senzelwa isiliva nekehla yomlilo ingeyegolide; umhloli weenhliziyo nguSomnini.

⁴ Owenza okumbi ulalela iimbhena ezonakeleko, umleyimanga uyelela ilimu elilimazako.

⁵ Ohlekisa ngesichaka unyaza umenzaso, nohleka ihlekelele uzakuhlunguphazwa.

⁶ Iinzukulwana zisihlohlo ebantwini abadala, nababelethi baligugu ebantwaneni babo.

⁷ Ikulumo ehle ayisifaneli isidlhadlha, kangangani-ke emamanga emlonyeni wesikhulu.

⁸ Isifumbathiso sifana nelitje lomlingo emehlweni wosiphetheko, ucabanga bona uyaphumelela kikho koke akwenzako.

⁹ Ositha isiphambeko ukhuthaza ithando; ovumbulula isikhubekiso wahlukanisa abangani.

¹⁰ Ukukhalima kuyazika konengqondo, ukudlula imivuvu elikhulu phezu kwesidlhadlha.

¹¹ Omumbi nabanga ukuhlubuka, uzakunikelelwa ngesithunywa esinelunya.

¹² Kungcono ukuqalana nonomrhaso othathelwe abantwana, kunokuqalana nesidlhadlha esiduda ebudlhayeleni baso.

¹³ Nakube umuntu ubuyisela okuhle ngokumbi, ubumbi abusoze baphuma emzinakhe.

¹⁴ Ukuthoma inturhu, kufana nokubhoboza amanzi, yeke, lisa indaba ngaphambi kobana kuthome ukulwa.

¹⁵ Omela isikhohlakali bona simsulwa nolahla olungileko bona usikhohlakali, bobabili njalo basinyenyiso kuSomnini.

¹⁶ Buyini ububhadekelo bemali nayisesandleni sesidlhadlha na? Ingaba kuthenga ukuhlakanipha khibe asinangqondo?

¹⁷ Umngani uhlala athembekile, iye, ungumfo obelethelwe iinkhathi ezibudisi.

¹⁸ Umuntu ogijimela ukuzibopha, abe sibambiso somunye, akanangqondo.

¹⁹ Othanda isiphambeko, uthanda ukucabana; onomlomo omkhulu uzibizela ihlekelele.

²⁰ Onehliziyo eyonakeleko akaphumeleli, nonelimu elikhohlisako uwela engozini.

²¹ Obeletha isidlhadlha usesizini, akunathabo kumbelethi wesidlhadlha.

²² Ihliziyo enamileko iyintatha ehle, kodwana umphefumulo oqobekileko womisa amathambo.

²³ Isikhohlakali sizithathela isifumbathiso ngencilini ukuphambanisa iindlela zomthetho.

²⁴ Onengqondo ubeka ukuhlakanipha phambi kwakhe, kodwana amehlo wesidlhadlha asepelazwe.

²⁵ Umntwana osidlhadlha ulisizi kuyise nobumunyu kombelethileko.

²⁶ Akusikuhle ukuhlawulisa umuntu omsulwa namkha ukubetha iinkhulu ngokungakafaneli.

²⁷ Owazi ilwazi ulonda amezwakhe nonommoya ophasi umumuntu ozwisisako.

²⁸ Ngitjho nesidlhadlha sithathwa inga sihlakaniphile nasizithuleleko, kuthiwe sinengqondo nasivale umlomo.