IZAGA 16 - IsiNdebele 2012 Translation

¹ Umuntu angahlela amasu engqondweni, kodwana ilizwi lokugcina livela kuSomnini.

² Zoke iindlela zomuntu zimsulwa emehlwenakhe, kodwana uSomnini uhlola iinhloso.

³ Nawunikela okwenzako kuSomnini, amasu wakho azakuphumelela.

⁴ USomnini wenze koke kwaba nomnqopho, iye, nokhohlakeleko umenzele ilanga lehlekelele.

⁵ Woke onehliziyo ezikhukhumezako usinyenyiso kuSomnini. Nakanjani onjalo uzakuhlunguphazwa.

⁶ Ngokwethembeka nangeqiniso icala liyahlawuleka, ngokwesaba uSomnini umuntu ugegeda okumbi.

⁷ Lokha iindlela zomuntu nazithokozisa uSomnini, wenza nezitha zakhe ziphile ngokuthula naye.

⁸ Kungcono ukuba nokuncani, khibe nokho kunokulunga, kunokobana ube nesivuno esinengi, kodwana kungekho ukulunga.

⁹ Ehliziywenakhe umuntu utlama indlelakhe, kodwana uSomnini uhlosa amagadangwakhe.

¹⁰ Lokha isigwebo nasiseembheneni zekosi, umlomayo awuphambanisi isiqunto.

¹¹ Isilinganiso namatje wokulinganisa afaneleko abuya kuSomnini; iye, woke amatje wokulinganisa angemgodleni ngewakhe.

¹² Amakhosi ayasinyenya isenzo esimbi ngombana ubukhosi bakhelwe phezu kokulunga.

¹³ Amakhosi athatjiswa ziimbhena ezithembekileko, anegugu ngomuntu okhuluma iqiniso.

¹⁴ Itukuthelo yekosi iziinthunywa zokufa, kodwana umuntu ohlakaniphileko uyayidambisa.

¹⁵ Ukuhlambuluka kobuso bekosi kutjho ukuphila, ukwamukela kwayo kufana nelifu lezulu ngesilimela.

¹⁶ Kungcono khulu ukufumana ukuhlakanipha kunegolide nokufumana ukuzwisisa kungcono kunokukhetha isiliva.

¹⁷ Indlela ekulu yabaqotho igegeda ubumbi, owelusa indlelakhe ubulunga ipilwakhe.

¹⁸ Ukuzikhukhumeza kulandelwa kubhujiswa nokuwa kulandela umphefumulo oziphakamisako.

¹⁹ Kungcono ukuzehlisa hlangana nabazithobileko, kunokuhlanganyela ipango nabazikhukhumezako.

²⁰ Ozwisisa okuthileko uyaphumelela, kodwana othembela kuSomnini ubusisiwe.

²¹ Onehloko waziwa bona unengqondo namezwi amnandi angezelela ukuzwisisa.

²² Ukuzwisisa kumthombo wokuphila kilabo abanakho, kodwana ifundiso yeendlhadlha ibudlhayela.

²³ Ingqondo yohlakaniphileko iphumelelisa ikulumakhe neembhena zakhe zingezelela ukuzwisisa.

²⁴ Amezwi amnandi aliliju, anandipha emphinjeni, asihlahla emathanjeni.

²⁵ Kunendlela ebonakala ilungile emuntwini, kodwana isiphetho sayo sikukufa.

²⁶ Iphango lesisebenzi liyasisebenzela, indlala yaso iyasiqhuba.

²⁷ Isibhidlamnyanya sifunana nobumbi, nekulumaso ifana nomlilo oqothulako.

²⁸ Isigilamkhuba sivusa inturhu, nokuhleba kwahlukanisa abangani.

²⁹ Umuntu onenturhu uyenga wekhabo, amrholele endleleni embi.

³⁰ Oncinza ilihlo ngobukhohlakali ugila umkhuba, noluma umlomakhe ufukamele ubumbi.

³¹ Iinhluthu ezimhlophe zisihlohlo sedumo, zifumaneka endleleni yokulunga.

³² Kungcono obuthaka ekusilingekeni kunengorho, nokwazi ukuzibamba kunofuna ukuthumba idorobho.

³³ Ifumbe iphoselwa ngembadaneni yeporiyana, kodwana soke isiqunto sayo sivela kuSomnini.