IZAGA 15 - IsiNdebele 2012 Translation

¹ Ipendulo ethobekileko idambisa itukuthelo, kodwana ilizwi elihlabako livusa ilaka.

² Ilimu labahlakaniphileko liphakamisa ilwazi, kodwana umlomo weendlhadlha uphuphuma ubudlhadlha.

³ Amehlo kaSomnini akoke, aqaphele abakhohlakeleko nabalungileko.

⁴ Ilimu elithambileko limumuthi wokuphila, kodwana elinobuqili liqoba umphefumulo.

⁵ Isidlhadlha sidelela ukusolwa nguyise, kodwana olalela ukukhalinywa uvuthiwe.

⁶ Umuzi wolungileko unomnono omkhulu, kodwana inzuzo yokhohlakeleko ilibibi.

⁷ Iimbhena zabahlakaniphileko zifafaza ilwazi, kodwana akusinjalo ngengqondo yeendlhadlha.

⁸ Umhlabelo weenkhohlakali usinyenyiso kuSomnini, kodwana uthokoziswa mthandazo wabaqotho.

⁹ Indlela yokhohlakeleko isinyenyiso kuSomnini kodwana uthanda orhuluphela ukulunga.

¹⁰ Ukuyelelisa okuqinileko kubekelwe otjhiya indlela elungileko; ozonda ukukhalinywa uzokufa.

¹¹ Indawo yabafileko nendawo yokubhujiswa zisemtarini phambi kwakaSomnini; kangangani-ke imizindlo yomuntu!

¹² Isinyefuli asithandi ukukhalinywa; yeke asiyi kabahlakaniphileko.

¹³ Ihliziyo enamileko yenza ubuso busuleke; iinkathazo zehliziyo ziqoba umphefumulo.

¹⁴ Ihliziyo ehlolisisako ifuna ilwazi, kodwana umlomo weendlhadlha uphila ngobudlhadlha.

¹⁵ Woke amalanga wesichaka mambi, kodwana odlhudlhekako uzizwela umgidi njalo.

¹⁶ Kungcono ukuba nokuncani, khibe nokho wesaba uSomnini, kunokobana ube nomnono omnengi, kodwana uneenkathazo.

¹⁷ Singcono isabelo semirorho lapha kunethando khona, kunesekunzana enonisiweko, khibe kunezondo.

¹⁸ Umuntu onehliziywana uvusa ukucabana, kodwana obuthaka ekusilingekeni urhobhisa ukulwa.

¹⁹ Indlela yevila ifana nomqoqo wameva, kodwana umzila wabaqotho ulelezekile.

²⁰ Umntwana ohlakaniphileko ulethela uyise itokozo, kodwana osidlhadlha unyaza unina.

²¹ Onganangqondo ukarwa budlhadlha, kodwana onengqondo ukhamba ngokunqomba.

²² Lapha kunganakubonisana khona, amaqhinga ayatjhabalala; kodwana ngabeluleki abanengi ayaphumelela.

²³ Umuntu ufumana itokozo lokha naphendule kuhle. Maye lihle kangangani ilizwi elifike ngesikhathi!

²⁴ Indlela yokuphila irholela ekuphakameni, ukuze umuntu adede endaweni ephasi yabafileko.

²⁵ USomnini ubhuruza ikumba yabazitjhayako, kodwana uqinisa imikhawulo yomhlolokazi.

²⁶ Amaqhinga wokukhohlakala asinyenyiso kuSomnini, kodwana amezwi amahle ahlambulukile kuye.

²⁷ Omarhamaru uletha imiraro emzinakhe, kodwana ozonda ukufunjathiswa uzakuphila.

²⁸ Ihliziyo yolungileko ihlolisisa iimpendulo zayo, kodwana umlomo wabakhohlakeleko uphafuza ubumbi.

²⁹ USomnini ukude nabakhohlakeleko, kodwana uphendula umthandazo wabalungileko.

³⁰ Ubuso obuthokozileko buthabisa ihliziyo neendaba ezimnandi zinepilo emathanjeni.

³¹ Umuntu onendlebe elalela ukukhalinywa okunepilo uzakuba sekhaya hlangana nabahlakaniphileko.

³² Odela ukusolwa uzinyaza yena, kodwana olalela ukukhalinywa uzuza ingqondo.

³³ Ukwesaba uSomnini kufundisa umuntu ukuhlakanipha, nokuzehlisa kulandelwa lidumo.