IZAGA 14 - IsiNdebele 2012 Translation

¹ Unokuhlakanipha uzakhela ikumba, kodwana unobudlhadlha uyigiriza ngezandla zakhe.

² Okhamba ngobuqotho wesaba uSomnini, kodwana osendleleni ephambukileko uyamnyaza.

³ Umlomo wesidlhadlha usibangela iswazi emhlana, kodwana iimbhena zabahlakaniphileko ziyabavikela.

⁴ Lapha kunganankomo khona, kunekerebhe yamabele kwaphela; kodwana ngamandla weenkomo, kuba nesivuno esinengi.

⁵ Ufakazi weqiniso akaleyi amanga, kodwana wekohliso uphafuza amanga.

⁶ Isinyefuli sifuna ukuhlakanipha, singakufumani; kodwana ilwazi liyazehlela konengqondo.

⁷ Tjhida emuntwini osidlhadlha ngombana akunalwazi eembheneni zakhe.

⁸ Ukuhlakanipha kovuthiweko kumbonisa indlela, kodwana ubuwiliwili beendlhadlha buyazikhohlisa.

⁹ Iindlhadlha zinyefula umnikelo werhobhe, kodwana phakathi kwabaqotho kunommoya omuhle.

¹⁰ Ihliziyo yazi ubumunyu bayo, nephandle angeze lahlanganyela itokozwayo.

¹¹ Indlu yeenkhohlakali izokutjhabalaliswa, kodwana itende labaqotho lizakuphumelela.

¹² Kunendlela ebonakala ilungile emuntwini, kodwana isiphetho sayo sikukufa.

¹³ Ngaphakathi kwesihleko ihliziyo ingase ibe buhlungu, netokozo ingaphelela esizini.

¹⁴ Owonakeleko uzakufunyana umvuzo weendlela zakhe nomuntu olungileko avuzwe ngokwekambakhe.

¹⁵ Onganalwazi ukholwa nanyana yini, kodwana ovuthiweko uyaqaphelisisa amagadangwakhe.

¹⁶ Ohlakaniphileko uyayelela, atjhide kokumbi, kodwana isidlhadlha siyatepeleka sizilahlele phasi.

¹⁷ Onguhliziywana wenza ubudlhayela, nomuntu onobuqili uyazondwa.

¹⁸ Abanganalwazi bazuza ubudlhadlha, kodwana abavuthiweko bathweswa isihlohlo selwazi.

¹⁹ Abambi bazokuguqa phambi kabalungileko nabakhohlakeleko emasangweni wolungileko.

²⁰ Abachakileko bagegedwa ngitjho nababantu bekhabo, kodwana abanjingileko banabangani abanengi.

²¹ Onyaza wekhabo uyona, kodwana ubusisiwe onesisa koswelako.

²² Abatlama okumbi bayadurha, kodwana abatlama okuhle bazuza ukwethembeka neqiniso.

²³ Woke umsebenzi obudisi uletha inzuzo, kodwana ikulumo engayindawo irholela ebuchakeni.

²⁴ Umnono wabahlakaniphileko sihlohlo sabo, kodwana ubudlhadlha beendlhadlha budlhadlha.

²⁵ Ufakazi weqiniso uhlenga amaphilo, kodwana ophafuza amanga umkhohlisi.

²⁶ Ukuhlonipha uSomnini kunikela umuntu isiqiniseko samambala; lokho kubuphephelo ebantwaneni bakhe.

²⁷ Ukwesaba uSomnini kumthombo wokuphila, kudedisa umuntu ezifwini zokufa.

²⁸ Abantu abanengi balidumo lekosi; ngaphandle kwabantu, isikhulu asinabuyo.

²⁹ Obuthaka ekusilingekeni unokuzwisisa okukhulu, kodwana isififana sikhombisa ubudlhadlha.

³⁰ Ihliziyo enokuthula ikuphila komzimba, kodwana umrhawu usidliso emathanjeni.

³¹ Ogandelela abachakileko unyaza uMbumbi wabo, kodwana onesisa koswelako uhlonipha uZimu.

³² Ophambeneko uwiswa bukhohlakali bakhe, kodwana olungileko uphephela ebuqothweni bakhe.

³³ Ukuhlakanipha kuhlala ehliziyweni yonengqondo, ngitjho neendlhadlha ziyakwazi lokho.

³⁴ Ukulunga kuphakamisa isizwe, kodwana isono silihlazo ebantwini.

³⁵ Ikosi ithokoziswa yinceku ehlakaniphileko, kodwana itukuthelwayo iphezu kwelihlazo.