IZAGA 13 - IsiNdebele 2012 Translation

¹ Umntwana ohlakaniphileko uyamukela uyise namsolako, kodwana isideleli asilaleli nasikhalinywako.

² Eenthelweni zomlomakhe umuntu uzuza okuhle, kodwana amaqili omela inturhu.

³ Olonda umlomakhe ulonda ipilwakhe; okhulumela butjhilweni uyonakala.

⁴ Umphimbo wevila uyakhaluza, kodwana awuzuzi; wabakhutheleko uyaneliswa.

⁵ Olungileko uyalizonda ilizwi lekohliso, kodwana okhohlakeleko uletha iinhloni nehlazo.

⁶ Ukulunga kuyamlondoloza omsulwa, kodwana isiphambeko sihlakaza isoni.

⁷ Kunomuntu ozenza injinga anganalitho; omunye azenze isichaka anjingile.

⁸ Umnono womuntu ungaba yihlawulo yepilwakhe, kodwana isichaka asethuseleki.

⁹ Umkhanyo wabalungileko udarhile, kodwana isibani seenkhohlakali siyacima.

¹⁰ Ngokuzikhukhumeza, onganahloko ubanga ukucabana; kodwana ukuhlakanipha kuhlala nabamukela izeluleko.

¹¹ Umnono ozuzwa ngokuphanga uyaphela, kodwana obuthelelwa kancani kancani uyanda.

¹² Ithemba eliriyadiswako ligulisa ihliziyo; isifiso esiphumeleliswako simumuthi wokuphila.

¹³ Onyefula umyalo kuzakuba kumbi ngaye, kodwana owuhloniphako yena, uyavuzwa.

¹⁴ Ifundiso yohlakaniphileko imthombo wokuphila, ibuyisa umuntu ezifwini zokufa.

¹⁵ Ukuzwisisa okuhle kuveza umusa, kodwana indlela yamaqili iyihlekelele.

¹⁶ Woke ovuthiweko wenza izinto ngelwazi, kodwana isidlhadlha sizembula ubudlhadlha.

¹⁷ Isithunywa esikhohlakeleko siwela engozini, kodwana esithembekileko siletha ukuphila.

¹⁸ Odela ukusolwa wehlelwa buchaka nehlazo, kodwana oyelela ukukhalinywa uyahlonitjhwa.

¹⁹ Isifiso esiphumelelisiweko simnandi emphefumulweni, kodwana ukudeda kokumbi kusikghabhudlho kwabaziindlhadlha.

²⁰ Okhambisana nabahlakaniphileko naye uyahlakanipha, kodwana odlhemadlhema neendlhadlha uyahlupheka.

²¹ Ilitjhwa lilandelela izoni, kodwana abalungileko bavuzwa ngokuhle.

²² Olungileko utjhiyela iinzukulwana zakhe ilifa, kodwana umnono wesoni ubekelwa olungileko.

²³ Isimu etlayiweko yeenhloko zemindeni ingakhiqiza ukugoma okunengi, kodwana ukudlokho kungathathwa ngokungakafaneli.

²⁴ Obabalela iswazi uzonda umntwanakhe, kodwana omthandako ukhuthalela ukumkhalima.

²⁵ Olungileko ugoma abe aneliseke, kodwana izisu zeenkhohlakali ziyaswela.