IZAGA 12 - IsiNdebele 2012 Translation

¹ Othanda ukusolwa uthanda ilwazi, ozonda ukukhalinywa usiyila.

² Umuntu olungileko ufumana umusa kuSomnini, kodwana uyamlahla umuntu onobuqili.

³ Umuntu akanzinzi ngobukhohlakali; isisekelo sabalungileko sinzinzile.

⁴ Umfazi oqotho unjengesihlohlo endodenakhe, kodwana ohlazisako unjengesidliso emathanjenayo.

⁵ Amano wabalungileko alungile, kodwana iseluleko seenkhohlakali siyikohliso.

⁶ Amezwi weenkhohlakali acuphe iingazi, kodwana umlomo wabaqotho uyabahlenga.

⁷ Abakhohlakeleko bayaketulwa banyamalale, kodwana ikumba yabalungileko iyadzimelela.

⁸ Umuntu udunyiswa ukuya ngokuhlakanipha kwakhe, kodwana onomkhumbulo ophambeneko uyanyazeka.

⁹ Kungcono ukuba phasi khibe nokho unekhoboka, kunobana uzenze umuntu kanti udobha phasi.

¹⁰ Olungileko unakekela iindingo zefuywakhe, kodwana imizwa yeenkhohlakali ililunya.

¹¹ Olima isimakhe uzakufumana ukudla okunengi, kodwana ogijimisana nelize akanangqondo.

¹² Okhohlakeleko uyakhanuka, iingilamkhuba ziyarhiribidela, kodwana ipande yabalungileko iyathela.

¹³ Omumbi ubanjwa ziimphambeko zomlomakhe, kodwana olungileko uphunyurha emirarweni.

¹⁴ Esithelweni somlomakhe umuntu utlonyeliswa okuhle, njengombana imisebenzi yezandla zakhe imvuza.

¹⁵ Indlela yesidlhadlha ibonakala ilungile kiso, kodwana ohlakaniphileko ulalela iseluleko.

¹⁶ Isidlhadlha siyarhaba ukukhombisa ukunyenya kwaso, kodwana ovuthiweko uyayithalalisa ihlamba.

¹⁷ Ufakazi weqiniso ukhuluma iqiniso, kodwana wekohliso ubika amanga.

¹⁸ Kunabantu abanamezwi ahlaba njengesabula, kodwana ilimu labahlakaniphileko liyaphilisa.

¹⁹ Iimbhena zeqiniso zijame mlibe, kodwana ilimu lamanga ngelesikhatjhana.

²⁰ Kunekohliso eenhliziyweni zabahlosa okumbi, kodwana kulithabo kilabo abakhuthaza ukuthula.

²¹ Olungileko angeze ehlelwa ngokumbi, kodwana abakhohlakeleko bazele ngehlupheko.

²² Iimbhena ezikhuluma amanga zisinyenyiso kuSomnini, kodwana uthokoziswa mumuntu oneqiniso.

²³ Umuntu ovuthiweko uzigoba ngengqondo nangelwazi; iindlhadlha zipepeza ubudlhayela.

²⁴ Izandla zabakhutheleko zizakubusa, kodwana ubuvila buphelela emsebenzini okatelelako.

²⁵ Obalabala ngehliziyo uyawurubajeka, kodwana ilizwi elakhako liyamthabisa.

²⁶ Olungileko ukhombisa wekhabo indlela, kodwana indlela yabakhohlakeleko iyabadurhisa.

²⁷ Isibozi asiyibasi inyamazana, kodwana ukukhuthala kulilifa eliligugu emuntwini.

²⁸ Endleleni yokulunga kunokuphila nokukhamba emzileni wakhona akunakufa.