IZAGA 11 - IsiNdebele 2012 Translation

¹ Isilinganiso samanga sisinyenyiso kuSomnini, kodwana ujabulela amatje afaneleko wokulinganisa.

² Lokha ukuzikhukhumeza nakufikako kulandela ihlazo, kodwana abazithobako banokuhlakanipha.

³ Ukwethembeka kwabaqotho kuyabahlahla, kodwana abangakathembeki babhujiswa buqili babo.

⁴ Umnono awunabubhadekelo ngelanga lelaka, kodwana ukulunga kuhlenga ekufeni.

⁵ Ukulunga kwabamsulwa kubenzela indlela enqophileko, kodwana okhohlakeleko uwiswa bukhohlakali bakhe.

⁶ Ukulunga kwabaqotho kuyabahlenga, kodwana amaqili abhajwa eenkanukweni zawo.

⁷ Lokha okhohlakeleko nafako, ithemba lakhe liyatjhabalala; akulindele emnothwenakhe kuyanyelela.

⁸ Olungileko wenyelwa emirarweni, kuthi okhohlakeleko adlhunyekwe kiyo.

⁹ OnganaZimu ubulala wekhabo ngomlomakhe, kodwana abalungileko benyelwa ngelwazi.

¹⁰ Lokha olungileko naphumelelako, idorobho liyajekezela, kuthi okhohlakeleko nabhubhako, kube nehlokomo.

¹¹ Ngesibusiso sabaqotho, idorobho liyaphakanyiswa, kodwana ngomlomo weenkhohlakali, liyabhujiswa.

¹² Onyaza wekhabo akanangqondo; ozwisisako ubamba ilimu lakhe.

¹³ Umdlhevezi udlheveza ifihlo, kodwana othembekileko unefihlo.

¹⁴ Ngokuswela iseluleko isizwe siyawa, kodwana ukuphepha kuza ngabeluleki abanengi.

¹⁵ Owenzela omunye isibambiso, uba neenhlupheko ezinengi, kodwana ozonda ukufaka isandla esibambisweni uphephile.

¹⁶ Umfazi onomusa uyahlonitjhwa, kodwana iinrhonga zizuza umnono kwaphela.

¹⁷ Onomusa uzenzela ubuhle, kodwana onesihluku uzilimaza yena.

¹⁸ Okhohlakeleko uzuza umvuzo owonakeleko, kodwana otjala ukulunga uvuna umvuzo weqiniso.

¹⁹ Onzinze ekulungeni uzifumanela ipilo, kodwana olandela ubumbi uzibizela ukufa.

²⁰ Abaneenhliziyo ezonakeleko basinyenyiso kuSomnini, kodwana uthokoziswa ngabaneendlela ezimsulwa.

²¹ Nakanjani okhohlakeleko uzakuhlunguphazwa begodu isizukulwana sabalungileko sizakuhlengwa.

²² Njengesali legolide epumulweni yewotji, sinjalo-ke nesimomondiya somfazi onganasimilo.

²³ Isifiso sabalungileko siphelela ebuhleni; ithemba leenkhohlakali liphelela etukuthelweni.

²⁴ Omunye unikela ngokutjhaphuluka, nokho azuze khulu, omunye ugodla ngokungakafaneli, kodwana agcine achakile.

²⁵ Umuntu ophanako uyaphumelela nokholisa abanye naye uyakholiswa.

²⁶ Abantu bathuwelelisa umuntu ogodla ikoroyi, kodwana isibusiso siphezu koyithengisako.

²⁷ Ofuna okuhle uyamukeleka, ofuna ubumbi buyamehlela.

²⁸ Othembela emnonwenakhe uyawa, kodwana abalungileko batlhurha njengamakari.

²⁹ Olimaza umndenakhe uzuza ummoya; isidlhadlha esinjalo siba likhoboka lesihlakaniphi.

³⁰ Isithelo solungileko simumuthi wokuphila; ohlakaniphileko ubuthelela abantu kuye.

³¹ Nakube olungileko ufumana okumfaneleko, kangangani-ke okhohlakeleko nesoni!