IZAGA 10 - IsiNdebele 2012 Translation

Izaga zakaSolomoni

¹ Izaga zakaSolomoni Umntwana ohlakaniphileko ujabulisa uyise, kodwana osidlhadlha ulisizi kunina.

² Umnono wobukhohlakali awunanzuzo, kodwana ukulunga kusindisa ekufeni.

³ USomnini akavumi kobana olungileko alambe, kodwana isifiso somumbi uyasiphaya.

⁴ Izandla ezidondako zichakisa umuntu, kodwana zabakhutheleko ziyanothisa.

⁵ Obuthelela isivuno ehlobo uhlakaniphile, kodwana otutumalako nakuvunwako usiphoqo.

⁶ Iimbusiso zisihlohlo ehloko yolungileko, kodwana umlomo weenkhohlakali ufihle inturhu.

⁷ Ukukhunjulwa kolungileko kusibusiso, kodwana amabizo weenkhohlakali asisikgha.

⁸ Ohlakaniphileko engqondweni wamukela imiyalo, kodwana isidlhadlha esipepezako siyabhubha.

⁹ Ophila ngobuqotho uyalondeka, kodwana oziphatha magwegwe usemtarini.

¹⁰ Oncinza ilihlo ngobukhohlakali ubanga isizi nesidlhadlha esipepezako siyabhubha.

¹¹ Umlomo wolungileko umthombo wokuphila, kodwana weenkhohlakali ufihle inturhu.

¹² Izondo ivusa ukucabana, kodwana ithando lisibekela zoke iimphambeko.

¹³ Ukuhlakanipha kufunyanwa eembheneni zohlolisisako, kodwana iswazi libekelwe umhlana wonganangqondo.

¹⁴ Abahlakaniphileko babulunga ilwazi, kodwana umlomo wesidlhadlha uzibizela ukonakala.

¹⁵ Umnono wabanjingileko ulidorobho labo elinemithangala, kodwana abachakileko baqedwa buchaka babo.

¹⁶ Ikokhelo yolungileko ikuphila, kodwana inzuzo yesikhohlakali sisono.

¹⁷ Ovuma ukusolwa usendleleni yokuphila, kodwana ongafuni ukuyeleliswa uyadurhisa.

¹⁸ Ofihla izondo anayo uneembhena zamanga norhatjha amahlebezi usidlhadlha.

¹⁹ Eenkulumeni ezinengi isiphambeko asitlhogeki, kodwana ogoba ilimu lakhe uhlakaniphile.

²⁰ Ilimu lolungileko lilisiliva elikhethekileko, kodwana ingqondo yeenkhohlakali ayisililitho.

²¹ Iimbhena zolungileko zondla abanengi, kodwana iindlhadlha ziyafa ngokungabi nengqondo.

²² Isibusiso sakaSomnini siletha umnono nomtjhikatjhika awengezi litho kiwo.

²³ Isidlhadlha sithokoziswa kuziphatha kumbi, kodwana umuntu onehloko uthokoziswa kuhlakanipha.

²⁴ Okhohlakeleko wehlelwa ngakusabako, olungileko unikelwa akufisako.

²⁵ Nasele isivunguvungu sidlulile okhohlakeleko uyatjhabalala, kodwana olungileko uyanzinziswa nini nanini.

²⁶ Njengesibharha emazinyweni nentuthu emehlweni, linjalo-ke nevila kilabo abalithumako.

²⁷ Ukwesaba uSomnini kungezelela amalanga wokuphila, kodwana iminyaka yeenkhohlakali iyaphungulwa.

²⁸ Abalungileko balindela itokozo, kodwana ithemba leenkhohlakali liyanyelela.

²⁹ Indlela kaSomnini isiphephelo koqotho, kodwana ikubhubha kweengilamkhuba.

³⁰ Olungileko angeze asikinywa, kodwana iinkhohlakali angeze zahlala ephasini.

³¹ Umlomo wolungileko uyaphumelela ekuhlakanipheni, kodwana ilimu labonakeleko liyaquntulwa.

³² Iimbhena zolungileko ziyakwazi okufaneleko, kodwana umlomo weenkhohlakali wazi okuphambeneko.