IZAGA 1 - IsiNdebele 2012 Translation

Isethulo: Ihloso nesihloko

¹ Izaga zakaSolomoni umsa kaDavida ikosi yakwa-Israyeli

² Ngezokwazi ubuhlakani nokuyelelisa, kanye nokuzwisisa amezwi welemuko;

³ iye, ukuzuza ukulaywa okunokuhlakanipha, ukulunga, ubulungiswa nokufaneleko.

⁴ Abanganalwazi zibanikela ilemuko, omncani ilwazi nokuhlukanisa.

⁵ Ohlakaniphileko akalalele, azuze ingqondo nonekghono afumane indlela yoburholi,

⁶ ukuze azwisise isaga nesitjho okutjho amezwi neenrarejo zabahlakaniphileko.

⁷ Ukwesaba uSomnini kukuthoma kokuhlakanipha, kodwana isidlhadlha sinyaza ubuhlakani nokusolwa.

⁸ Ndodanami, lalela isiyeleliso sakayihlo, ungalahli ifundiso kanyoko;

⁹ mbala, lokho kuzakuba mbhode kufaneze ihlokwakho, kube sigejo entanyenakho.

¹⁰ Ndodanami, nakube izoni ziyakuyenga, ungaphiki nazo.

¹¹ Nakube zithi, “Namba nathi, sikhukhuthele iingazi zothileko, sinanabele umphefumulo omsulwa,

¹² iye, sibaginye baphila njengokufa, njengalabo abehlela ethuneni basaphelele;

¹³ sizazifumanela imihlobohlobo yobuphaziphazi, sizalise iinkumba zethu ngepango,

¹⁴ nawuphosa ifumbakho kanye nathi bese sahlukaniselana isikhwama”,

¹⁵ ndodanami, ungaphiki nazo. Ungalibhadi emzilenazo,

¹⁶ ngombana iinyawo zazo, zigijimela ekoneni, ziyarhaba ukuthulula iingazi.

¹⁷ Akusizi ukubeka isifu khisibe zoke iinyoni zikuqalile.

¹⁸ Abantwaba bakhukhuthela iingazi zabo, bananabela ipilwabo!

¹⁹ Zinjalo iindlela zabo boke abazifunela inzuzo ngokurhabileko: Kuthatha ipilo yabanikazi benzuzo leyo!

²⁰ Unokuhlakanipha urhuwelela endledlaneni, uphakamisa iphimbo ematatawini.

²¹ Umemeza ekabeni yeendledlana eziyaluzelako, akhulume amezwi wokuhlakanipha ebungenweni bamasango wedorobho athi:

²² “Kuzabe kube nini nina eninganalwazi nithanda ukungabi nelwazi na? Kuzabe kube nini iinyefuli zijajuliswa kukokomeja neendlhadlha zizonda ilwazi na?

²³ Nangathana khenalalela ukukhalima kwami, bengizokuthululela ummoya wokuhlakanipha kini, nginazise amezwami.

²⁴ Kodwana ngebanga lokobana nalile nangibizako, nangayelela nangelula isandla sami,

²⁵ nathalalisa zoke iinluleko zami, nangavuma ukukhalima kwami,

²⁶ nami-ke ngizokuhleka ihlekelelenu, ngininyefule nanehlelwa kukwesaba,

²⁷ iye, ukwesaba nakunehlela njengesiwuruwuru, ihlekelelenu nayivuthela njengesivunguvungu, nalokha nanembathwa lisizi neenkathazo.

²⁸ “Yeke bazangibiza, ngingabaphenduli, bangifunisise, bangangifumani.

²⁹ Njengombana bahloye ilwazi, bangakhethi ukwesaba uSomnini,

³⁰ bangamukeli iseluleko sami, badelela koke ukukhalima kwami,

³¹ bazakugoma isithelo sendlelabo, bazaliswe ngomphumela wamaqhingabo.

³² Ukuphambuka kwabanganalwazi kuyababulala nokuzethemba kweendlhadlha kuyazibhubhisa.

³³ Kodwana ongilalelako, uzakuphila aphephile, azigedle, angabi nokwesaba ihlekelele.”