ISILILO 5 - IsiNdebele 2012 Translation

Ukubawa umusa

¹ Khumbula Somnini, lokho okwenzeke kithi, qala, uyelele ihlazo lethu.

² Ilifa lethu linikelwe amaphandle, amakhayethu aphiwa imiqhamuka.

³ Sese siziintandani, asinabobaba, abomma babahlolokazi.

⁴ Sisela amanzethu ngemali, iinkuni zethu sezitholakala ngentengo.

⁵ Abasigijimisako basihlezi entanyeni sidiniwe begodu asinakuphumula.

⁶ EGibhide sikhongozele, iye, e-Asiriya kobana sisuthiswe ngesikwa.

⁷ Abobaba abonako abasekho, nje-ke thina sibhesele icala labo.

⁸ Amakhoboka abusa phezu kwethu begodu akunamuntu ongasitjhaphulula ezandleni zawo.

⁹ Sifunyana isikwa sethu ngokubeka ubuphilo bethu engozini ngebanga lesabula eserhalawumbeni.

¹⁰ Isikhumba sethu sitjhisa njenge-ondo ngebanga lokurhwaya kwendlala.

¹¹ Abafazi bagagadlhelwe eZiyoni namatlawu emizini yakwaJuda.

¹² Amakhosana anekwe ngezandla zawo; ukubakhona kwabaphathi akusatjho litho.

¹³ Amasokana agaya esigayweni abesana batherezeliswa yinyanda yeenkuni.

¹⁴ Abaphathi basukile ebandla, amasokana akasalilisi iinara.

¹⁵ Ithabo liphelile eenhliziyweni zethu; igido lethu liphenduke isililo.

¹⁶ Isihlohlo siwile eenhloko zethu. Maye thina ngombana sonile!

¹⁷ Ngebanga lalokho, iinhliziyo zethu zidanile, ngebanga lezintwezi, amehlwethu afiphele

¹⁸ ngentaba yeZiyoni esele ingasenamuntu; iimpungutjha sele zitanasa lapho!

¹⁹ Kodwana wena, Somnini, ubusa nini nanini, isihlalo sakho sobukhosi ngeseenzukulwana ngeenzukulwana.

²⁰ Kubayini usikhohlwa mlibe na? Kubayini usilahle isikhathi eside kangaka na?

²¹ Yewusibuyisele kuwe ukuze sibuye; vuselela imihlethu njengekadeni.

²² Kghani usilahlele safuthi na? Usithukuthelele ngaphezu kokwenza na?