ISILILO 3 - IsiNdebele 2012 Translation

Ukuncenga uZimu

¹ Ngimumuntu owazi ubuhlungu beswazi letukuthelo kaSomnini.

² Ungiqotjhile bewangikhambisa ebumnyameni obunganamkhanyo.

³ Ngambala, isandla sakhe singiphendukele kanenginengi, imini yoke.

⁴ Ukhehlise isikhumba nenyamami, wafahlaza amathambami.

⁵ Ungivimbezele ngeenqabo, wangizombeleza ngobuthi nangobudisi.

⁶ Ungihlalise eendaweni ezimnyama njengalabo abafa kade.

⁷ Ungibiyele ngeboda ukuze ngingabaleki; wenza amakhamandelami aba budisi.

⁸ Ngitjho nanyana ngirhuwelela ngifuna isizo, uvalela umthandazwami ngaphandle.

⁹ Uqabe iindlela zami ngamatje abaziweko, wasonganisa imizilami.

¹⁰ Ulibhere elinanabelako, iye, ibhubezi elibadaleleko.

¹¹ Uvale iindlela zami, wangidabula; wangenza ihlekelele.

¹² Wacupha umsebakhe, wangenza isinenjwa semisubelakhe.

¹³ Wahlaba indenami ngemisubela engemgodlenakhe.

¹⁴ Ngaba sihlekiso sabo boke abantu bekhethu, iye, ingomabo yesiphoqo imini yoke.

¹⁵ Wangifunza umhlonyani wangiseza isibharha.

¹⁶ Wenza amazinywami aququda igagadu, wangibhudabhuda emlotheni.

¹⁷ Umphefumulwami awunakuthula nokuhle angisakwazi.

¹⁸ Yeke ngathi: “Idumo lami liphelile; iye, ebengilirhuluphele kuSomnini.”

¹⁹ Somnini, khumbula isizi nokuzula kwami, iye, isibharha nobuthi.

²⁰ Umphefumulwami uhlala ukukhumbula lokhu nommoyami uphasi.

²¹ Kodwana nakhu engizakubeka engqondweni ngalokho nginerhuluphelo:

²² Kungebanga lokwethembeka kwakaSomnini kobana singabhujiswa, iye, kungenca yesirhawu sakhe esingapheliko.

²³ Siba sitjha njalo ekuseni; mbala, bukhulu ubuqotho bakhe.

²⁴ Umphefumulwami uthi: “USomnini usisabelo sami, yeke ngizakurhuluphela kuye.”

²⁵ USomnini ulungile kilabo abathembela kuye, iye, kiloyo omfunako.

²⁶ Ulungile uSomnini, nje-ke, rhuluphela ngokuthula isindiswakhe.

²⁷ Iye, ulungile emuntwini lokha nathwala ijogi asesemutjha.

²⁸ Akahlale yedwa athule, ngombana uSomnini umthwese lona.

²⁹ Akawe ngobuso phasi, mhlamunye kunethemba lapho.

³⁰ Akanikele umhlathakhe kiloyo omwakalako, abe anele ngehlazo.

³¹ Ngambala, uSomandla akalahleli safuthi.

³² Nanyana ahlunguphaza, uzakuba nesirhawu ukuya ngokwethembeka kwakhe okukhulu

³³ ngombana akuveli ehliziywenakhe ukugandelela nokuhlunguphaza abantu.

³⁴ Abantu bathi: “Isitha sigadangele ngaphasi kweenyawo zaso zoke iimbotjhwa zenarha.

³⁵ Siphambanisa amalungelo wobuntu ngaphambi kongoPhezulu;

³⁶ simdlelezela ilungelo lomthetho. Kodwana uSomandla akakuboni lokho.”

³⁷ Ngubani oyale ukwenzeka kwehlekelele? Lokho azange kuvele emlonyeni kaSomandla.

³⁸ Emlonyeni wongoPhezulu akuveli okumbi, kodwana okuhle kodwa.

³⁹ Kubayini umuntu ophilako anghonghoyila ngomphumela wezono zakhe na?

⁴⁰ Asihloleni iindlela zethu sizizizinye, sibuyeleni kuSomnini.

⁴¹ Asiphakamiseleni iinhliziyo nezandla zethu kuZimu osezulwini, sithi:

⁴² “Ngithi esiphambukileko besahlubuka begodu wena azange ukhohlwe.

⁴³ “Uzembese ngetukuthelo bewasigijmisa, warhayila ngaphandle kwesirhawu.

⁴⁴ Uzembese ngelifu kobana ungafikelelwa mthandazo.

⁴⁵ Usenze amanyela neenzibi hlangana nezizwe.

⁴⁶ “Zoke izitha zethu zikhulume khulu ngathi.

⁴⁷ Isabelo sethu kukwesaba nethunzi elimnyama, ukubhujiswa nokutjhabalaliswa.”

⁴⁸ Amehlwami awuluka imilanjana yamanzi ngebanga lokuphodlheka kwabantu bami.

⁴⁹ Amehlwami azakugeleza mlibe, iye, angaqedi

⁵⁰ kufikela lapha uSomnini aqala khona phasi, abone asezulwini.

⁵¹ Engikubonako kungilethela isizi ngebanga lawo woke amadodakazi wedorobho lekhethu.

⁵² Izitha zami zangizuma njengenyoni, ngaphandle kwesizathu.

⁵³ Zaqeda ipilwami ngemthathamanzini: Zangiphosa ngamatje;

⁵⁴ amanzi angigubuzesa, ngadlumbana bona kuphelile ngami!

⁵⁵ Ngabiza ibizo lakho wena Somnini, ngisekuzikeni komphathamanzi;

⁵⁶ wezwa isililo sami lokha nangithi: “Ungavali indlebakho ngokurhitjhwa kwami nalokha ngifuna isizo.”

⁵⁷ Nangikubizako begade useduze nami, wathi kimi: “Ungesabi.”

⁵⁸ Somandla, wajamela indabami lokha umphefumulwami usengozini, wahlenga ipilwami.

⁵⁹ Somnini, ubonile ukugandelelwa kwami, nje-ke, jamela indabami!

⁶⁰ Ubonile koke ukuzibuyiselela kwabo, woke amano abanawo ngami.

⁶¹ Somnini, uzizwile iinhlamba zabo, woke amano wabo ngami,

⁶² ukuhlebeza nokuphoqa kwabajamelani bami imini yoke.

⁶³ Yelela koke abakwenzako; sengiyingomabo yesiphoqo.

⁶⁴ Bavuze njengokubafaneleko, Somnini, ngokuya ngemisebenzi yezandla zabo.

⁶⁵ Banikele ihliziyo enesizi, amanikelelakho abe phezu kwabo!

⁶⁶ Bagijimise ngetukuthelo, ubabhubhise ngaphasi kwamazulwakho, Somnini.