ISILILO 1 - IsiNdebele 2012 Translation

Idorobho elitjhiyiweko

¹ Maye, linesizungu idorobho, elalihlala liphithizela abantu! Awu, sese lifana nomhlolokazi, yena ebegade amkhulu phakathi kwezizwe! Gade liyindlovukazi phakathi kweemfunda, kwanjesi sele lisisembamgodi.

² Ebusuku likhihla isililo, iinyembezi zehle emihlathinalo. Phakathi kwazo zoke iinthandwa zalo, asikho nesisodwa esiliduduzako. Boke abangani balo balirhwalile, baphenduke izitha zalo.

³ UJuda uye ekuthunjweni ngeenhlungu nangokusebenza nzima. Gadesi uhlala hlangana nezizwe, angafunyani indawo yokuphumula; boke abamgijimisako bamthelekela aseensizini zakhe.

⁴ Iindlela eziya eZiyoni ziyalila ngombana akakho oza eminyanyeni; woke amasangwalo akanabantu, abaphristi balo bayaquma, amatlawanalo ayabubula, nalo linobumunyu.

⁵ Izitha zalo ziyihloko amanabalo ayaphumelela ngombana uSomnini ulihlunguphazile ngeemphambeko zalo ezinenginengi. Abantwabalo baye ekuthunjweni baragwa sisitha.

⁶ Boke ubukhosi balo busukile endodakazini yeZiyoni. Amakhosanalo afana neenhlangumataka ezingafunyani amadlelo zigijima zinganamandla phambi kwabazigijimisako.

⁷ Emihleni yokuhlunguphazwa nokundinda kwalo, iJerusalema likhumbula zoke izinto ezihle ebekungezalo emihleni yakade. Lokha abantu balo nabawela ezandleni zezitha, azange kwaba khona olisizako, izitha zaliqala zahleka ukuwa kwalo.

⁸ IJerusalema lone khulu, nje-ke, sese liphenduke isihlekiso. Boke ebebalihlonipha sele balidelela ngombana balibonele. Nalo ngokwalo liyaquma, lifulathele.

⁹ Ukusilaphala kwalo bekuseemvunulweni zalo, lokha nalonako azange licabange ngekusasa lalo. Ukuwa kwalo bekuphazamisa khulu ngombana belinganamduduzi. Lathi: “Maye Somnini, akhe uqale iinhlungu zami ngombana isitha singihlulile!”

¹⁰ Isitha selulele isandla saso phezu kwawo woke amagugwalo begodu libone izizwe zizingenela endawenalo ecwengileko, wena Somnini owayala kobana zingangeni ehlanganwenakho.

¹¹ Boke abantu balo bayabubula nabafunana nesikwa, banana amagugwabo ngokugoma ukuze bavuselele umphefumulo. Qala Somnini, ubone kobana angisenabubhadekelo.

¹² Noke nina enidlula ngendlela, akutjho litho kini lokhu na? Qalani nibone nakube kunesizi elifana nelameli, engapharwa ngalo, iye, uSomnini angihlunguphaza ngalo ngelanga letukuthelwakhe evuthako.

¹³ Wathumela umlilo uvela phezulu, wawehlisela emathanjenami, wendlalela iinyawo zami inede, wangibuyisela emuva. Wangitjhiya nginganabuyo, imini yoke ngibuthakathaka.

¹⁴ Wangibophelela ijogi leemphambeko zami, iye, ngesandla sakhe bezibotjhelelwe ndawonye. Zabekwa entanyenami ngaphelelwa mamandla. USomandla wanginikela kilabo engingeze ngajamelana nabo.

¹⁵ USomandla ulahle abosaziwako bami ngaphakathi kwami; wamemezela isikhathi sokuvuna phezu kwami kobana abhule amasokanami. USomandla ugadange itlawu lakwaJuda, njengebutlhodlhelweni bewayini.

¹⁶ Ngiyalila ngezintwezi, ilihlo, iye, ilihlo lami liwuluka iinyembezi; mbala, umduduzi ukude nami, okunguye ongavuselela umphefumulo. Abantwabami abanabuyo ngombana isitha sihlulile.

¹⁷ IZiyoni likhongozele, kodwana alinamduduzi. USomnini uyale ngoJakopo kobana abamzombileko babe zizitha; iJerusalema sele lisinyenyiso phakathi kwabo.

¹⁸ USomnini ulungile ngombana ngihlubuke ilizwi. Lalelani noke nina zizwe, niyelele isizi lami: Amatlawu namasokanami asiwe ekuthunjweni.

¹⁹ Ngabiza iinthandwa zami kodwana zona zangihlamuka. Abaphristi nabaphathi bami babhubhela ngedorobheni nabasazifunela kokugoma kobana bavuselele umphefumulwabo.

²⁰ Qala Somnini, ngisesizini! Isisu sami siyasika nehliziyo ngaphakathi kwami iwurubajekile ngombana ngihlubuke khulu. Endledlaneni isabula ingilobisele abantwana, ngekumbeni kunokufa kwaphela!

²¹ Somnini, yizwa ukububula kwami ngombana anginamduduzi. Zoke izitha zami zezwa ngamatshwenyekwami, zajabula kobana nguwe owangehlisela wona. Ilanga owalimemezelako ulilethile. Nazo azibe njengami.

²² Akuthi zoke izenzo zazo ezimbi zibe phambi kwakho nazo uzenze owasenza kimi ngebanga lazo zoke iimphambeko zami. Mbala, ukububula kwami kukhulu nehliziywami idanile.