ISAMBULO 7 - IsiNdebele 2012 Translation

Bakwa-Israyeli babekwa iphawu

¹ Ngemva kwalokho ngabona iingilozi ezine zijame emagumbini womane wephasi. Bezibambe imimoya emine yephasi khona kungazukuba khona ummoya ovunguzako ephasinapha namkha elwandle nanyana uphephule umuthi.

² Ngabona enye ingilozi ikhuphuka ngepumalanga iphethe iphawu lakaZimu ophilako. Yarhuwelela ngelizwi elikhulu iingilozi ezine ebezinikelwe amandla wokona iphasi nelwandle,

³ yathi kizo: “Ningaloni iphasi, ilwandle namkha imithi singakagibi iphawu eempandla zeenceku zakaZimethu.”

⁴ Godu ngezwa isibalo salabo abagitjwa ngephawu, bebaziinkulungwana ezilikhulu namatjhumi amane nane bagitjwe ekorweni enye nenye yabantu bakwa-Israyeli:

⁵ Iinkulungwana ezilitjhumi nambili ekorweni yakaJuda; iinkulungwana ezilitjhumi nambili ekorweni yakaRubeni; iinkulungwana ezilitjhumi nambili ekorweni yakaGadi;

⁶ iinkulungwana ezilitjhumi nambili ekorweni yaka-Atjheri; iinkulungwana ezilitjhumi nambili ekorweni yakaNafitali; iinkulungwana ezilitjhumi nambili ekorweni yakaManase;

⁷ Iinkulungwana ezilitjhumi nambili ekorweni yakaSimiyoni; iinkulungwana ezilitjhumi nambili ekorweni yakaLevi; iinkulungwana ezilitjhumi nambili ekorweni yaka-Isakari;

⁸ iinkulungwana ezilitjhumi nambili ekorweni yakaZebuloni; iinkulungwana ezilitjhumi nambili ekorweni yakaJosefa; iinkulungwana ezilitjhumi nambili ekorweni yakaBhenjamini.

Isiqubuthu esikhulu

⁹ Ngemva kwalokho ngaqala ngabona isiqubuthu esikhulu ebesingekhe sabalwa ngobunengi. Besivela kizo zoke izizwe, iinkoro, abantu neenlimi, sijame phambi kwesihlalo sobukhosi naphambi kweMvana sembethe okumhlophe siphethe amatjhwaba womuthi wesundu ngezandla.

¹⁰ Sarhuwelela ngelizwi elikhulu sathi: “Isindiso ingeyakaZimethu ohlezi esihlalweni sobukhosi neyeMvana!”

¹¹ Iingilozi zoke bezijame esihlalweni sobukhosi mazombe, godu kuzombe abaphathi neembunjwa ezine eziphilako. Boke labo bawa ngobuso bathi mbo phambi kwesihlalo sobukhosi balotjha uZimu,

¹² bathi: “Amen. “Idumo nephazimulo, ukuhlakanipha, ukuthokozwa nokuhlonitjhwa, iye, amandla neenkhwepha akube kuZimethu nini nanini! Amen.”

¹³ Omunye wabaphathi wangibuza wathi: “Bobani laba abembethe ezimhlophe begodu bavelaphi na?”

¹⁴ Ngathi kuye: “Kosami, nguwe owaziko.” Nje-ke wathi kimi: “Laba ngibo abavela ekuhluphekeni okukhulu. Bazihlanzile iingubo zabo bazenza zaba mhlophe eengazini zeMvana.

¹⁵ Kungakho bajame phambi kwesihlalo sobukhosi sakaZimu, “bamlotjha imini nobusuku ngethempelini lakhe, iye, loyo ohlezi esihlalweni sobukhosi uyobafukamela.

¹⁶ Abayokulamba, abasayokoma, abasayokutjhiswa lilanga nanyana sivuthevuthe

¹⁷ ngombana iMvana ephakathi kwesihlalo sobukhosi izakuba ngumelusi wabo. Izabadosela emithonjeni yamanzi wokuphila, uZimu abasule zoke iinyembezi emehlweni wabo.”