ISAMBULO 6 - IsiNdebele 2012 Translation

Amaphawu

¹ Nje-ke ngabona iMvana inamulula elinye lamaphawu alikhomba; ngezwa esinye seembunjwa ezine eziphilako sirhuwelela inga mdumo sithi: “Yewuze!”

² Ngithe nangiqalako ngabona injomani emhlophe, umkhweli wayo gade aphethe umsebe; nje-ke wanikelwa isihlohlo, waphuma angohlulako, wahlula.

³ Kuthe lokha iMvana nayinamulula iphawu lesibili, ngezwa isibunjwa sesibili esiphilako simemeza sithi: “Yewuze!”

⁴ Nje-ke kwaphuma enye injomani ebovu be; umkhweli wayo wavunyelwa bona asuse ukuthula ephasini ukuze abantu babulalane, begodu wanikelwa isabula ekulu.

⁵ Kuthe lokha iMvana nayinamulula iphawu lesithathu, ngezwa isibunjwa sesithathu esiphilako simemeza sithi: “Yewuze!” Nje-ke ngaqala, qala bekunenjomani enzima, umkhweli wayo aphethe iinlinganiso ezimbili esandleni sakhe.

⁶ Ngezwa okungathi lilizwi hlangana neembunjwa ezine eziphilako lisithi: “Isiqwebu sinye sekoroyi ngesipaparwana neenqwebu ezintathu zebhali ngesipaparwana, kodwana ungoni amafutha we-oliva newayini!”

⁷ Lokha iMvana nayinamulula iphawu lesine ngezwa isibunjwa sesine simemeza sithi: “Yewuze!”

⁸ Ngithe nangiqalako, naso injomani etshetlha ibizo lomkhweli wayo nguKufa, alandelwa nguHadesi. Banikelwa amandla phezu kwengcenye yesine yephasi bona babulale ngesabula, ngendlala, ngezifo nangeembandana zommango.

⁹ Lokha iMvana nayinamulula iphawu lesihlanu, ngabona ngaphasi kwe-aldari imiphefumulo yalabo egade babulewe ngebanga lelizwi lakaZimu nangebanga lobufakazi ababe nabo.

¹⁰ Barhuwelela bathi: “Somnini Somandla, wena ocwengileko noqinisileko, kuzabe kube nini ngaphambi kobana ugwebe begodu usibuyiselele ngeengazi zethu na?”

¹¹ Nje-ke omunye nomunye wanikelwa isambatho esimhlophe bekwathiwa akhe baphumule kwesikhatjhana bekuphelele isibalo seenceku abakanye nazo nesabazalwana ebebasazokubulawa njengabo.

¹² Lokha iMvana nayinamulula iphawu lesithandathu, ngaqala, qala bekunokusikinyeka kwephasi okukhulu: Ilanga lafiphala laba nzima njengomsizi, inyanga yaba njengeengazi;

¹³ iinkwekwezi zesibhakabhaka zawela ephasini njengomuthi wamakhiwani nawuthintitha iinthelo zawo zebusika lokha nawusikinywa mumoya.

¹⁴ Isibhakabhaka sanyamalala njengomsongo nawusongeka wenyuka, iintaba neenhlengele zatjhidiswa eendaweni zazo.

¹⁵ Amakhosi wephasi, ababusi, iinkhulu, iinjinga neemphathimandla, omunye nomunye, olikhoboka nokhululekileko, bazifihla emarharheni naphakathi kwamadwala weentaba;

¹⁶ barhuwelela iintaba namadwala bathi: “Welani phezu kwethu nisisithe ebusweni balowo ohlezi esihlalweni sobukhosi nebukhalini beMvana!

¹⁷ Mbala ilanga elesabekako lelaka labo lifikile! Alo, ngubani ongalijamela na?”